(( خطيباتـي الثلاث وزوجتي الرابعه)) - منتدى عالم الأسرة والمجتمع

12-01-2011, 08:41 AM

دنيا ومن يدري

عضو جديد

تاريخ التسجيل: Jan 2011

المشاركات: 27

(( خطيباتـي الثلاث وزوجتي الرابعه))

((بـــســــم الله الرحـــمـــن الرحيــــــم))

الــســـلأمـ علــيــكمـ *** أطيــب التحأاأاأيــه الى كل القائمين على الموقع المتميز

رأاأح ادخـــل في صــلب الموضوع,, بـــس هــا حاب ارجع كم سنه للورى عشان احــط النقط ع الحروؤوؤوفـ

قبـــل 7 سنــوات ,

من المعروف ان كل انسان يطمح ان يتزوج انسانه كامله والكمال لله لكــــن..! ((نقدر نقول ارزاق))

وحاب اختصر الموضوع كثر ما اقدر مابي ادش بتفاصيل وتعبكم

بعد ان تخرجت من الثانويه اكملت مشواري الدراسي خارج الوطن لاتمام الشهاده الجامعيه ..

ووقعت المصيبه اني حبيت بنت مسيحيه وحاولت اقنع اهلي اني اتزوجها لكن لامحال رفضو وخيرونيي اكمل دراستي او ارجع الى الوطن .. وفشلت المحاوله وبتعدت عن الفتاه

بعد سنتين حبيت بنت من البحرين .. وحاولت مع والدتي وهم رفضو وذالك بسبب اختلاف العقيده
والمكان والزمان والخ... وبتعدت عن الفتاه

المحاوله الاخيـره عندما تخرجت من الجامعه وتوظفت,, حبيت بنت من بلدي ومن نفس القبيله ومن نفس الفخذ والمنطقه وبعد اهلي يعرفون اهلها ...

ولكن فشــلت المحاوله والسبب انهم صناع .. يعني مو اصيلين واحنه اصيلين انا واعوذ بالله من كلمت انا قررت ان اتزوجها واحسم الامر واضع اهلي امام وجه المدفع ...

وفعلا اخذت قرض لادفع المهر واجر شقه واضبط اموري...

وكلمت ام البنت وخلاص موعد الملجه ( كتب الكتاب) بعد يومان ؟

وللمعلومه ام البنت تقول عادي انت رجال مايحتاج ابوك يجي تبي الفكه من بنتها ماني عارف شنو السبب؟

المهم لكن فكرت شوي مع نفسي وقلت لازم استشير ااحد باله طويل من العائله وفعلا قبل كتب الكتاب بيوم..
جلست مع نفسي افكر وافكر وافكر ولا عرفت انام .. حاولت انام وماعرفت واتى وقت صلاه الفجر ورحت المسجد الي يصلي فيه خالي وصليت ونتضرته ...
وشرحت له كل شي بتفصيل
ولكن رد علي بجمله واحد فقط.. وصدمني
قال المشكله لاتخصك انت وبس بل تخص العائله كلها لو تزوجتها راح يقتلونك لانه تشوه اسم العائله
وقلت له والحل قال عطني خطوط تلفوناتك وغيرهم الصبح وانا اتصرف معاهم ولاتروح لهم ولا ترد عليهم ونصحني وفهمني كل شي والي سويته غلط واني تسرعت

وفهمته اني انا اعاني من الهيجان الجنسي ومابي اتجه الى الحرام هذي اساس المشكله

وفعلا انحلت المشكله وفتكينه..

وراح وكلم ابوي وامي ..وفهمهم كل شي وعلى الفور ابي خطب لي بنت عمي..

وهنا مـــــــربــــــــط الفرســــــ

تكفون انا ادري اني غلطت بعض الامور .. وخالي الملتزم قام يمشي معاي كل يوم وياخذني نداوت دينيه وحلقات طلب العلم

وفعلا التزمت معاه وصلاتي قمت اصليها بالمسجد ورحت بعد ماخطبو لي العمره واخذت امي وجدتي ...

وعطيت ابوي القرض يتصرف فيه بامور العرس؟

بس والله العظيم .. احس اني مبتلى

بعد ماكتبت الكتاب من خطيبتي الي هي بنت عمي
كلمتها تلفون وحصل مني اخطاء ...وكذالك هي

كلمتها بعد كتب الكتاب بسبوع بدت العلاقه مسجات تطورت مكالمات بعد فتره

1:- المشكله الاولى اني اعطيها مصروف وهي بيت اهلها ومبلغ شوي راهي(عودتها على هشي)

2:- دايمن اهاوشها على موضوع الاهتمام وفهمها الحياه مشاركه وابيها تنسى الثقل وتهتم فيني مثل ما اهتم

3:- تبجي على ابسط الامور

4:-فهمتها اني مستحيل امد ايدي عليج او اغلط عليج وفهمتها اني عصبي والي احبه واكره لكن في امور مو مستقره لها هي

5:- لما شفت البنت متغيره علي مثلا( تقول ادق عليك بعد خمس دقايق تدق بعد ساعه )
وتنطرني وهاوشها وفهمها انا ماني هندي عند عشيرتج تبجبج هذي المشكله بطت جبدي من كل ماتبجي لو اترع تبجي لو اكح تبجي

6:- مره صحت عليها وهاوشتها ودزت لي مسج لاتدق علي خلاص انا مليت من المشاكل وكثرها الي فيني مكفيني ومادري شنو وخل زواجنه تقليدي وشفطت علي ست ايام ماتدق ( انا ما ادق بمثل هل مواقف راح احس نزلت نفسي لو دقيت عليا وهي شاحتتني )

كلمت اختي الكبير وشرحت لها المشكله الي حصلت بس ( ماقلت لها خصوصياتنه ) بس قلت لها هاوشتها وتضايقت وقالت لاتدق

اوك ادري اني غلطان وراح تكتبون انت كلا منك انت الغلطان انت وانت وانت ياخي درينه انا غلطت لاني علمت اختي الكبيره بس انا بعدني بزر يعني عمري 500؟
لازم نستفيد من تجارب الغير وتوني وبعدني اتعلم من الحياه تبونها تلعب على شواربي مثلا؟

لا لازم اسال وعرف الصح من الغلط الانسان من كامل ولا معصوب عن الاخطاء(لازم ابرر لكم ههه)

المهم زفتها اختي ودقت علي ع طول مو لسواد عيوني عشان اختي

ورجعت المياه الى مجاريها

وبعد فتره كل ما اتصل تقرق ويا رفيجاتها بتلفون سواء البيت ولا الخاص وزفيتها ع موضوع الانتضار فـ مره من المرات دقيت وردت ع طول وقلت صبر؟ من غير لاتستاذن من وخلتني انتضار خمس دقايق..
عــــــــــاد انا اهني انبطت جبدي وقمت اعظظ اظافري واناقز بكرسي السياره ومنقهر

المهم وهاوشتها وصايحت عليها حرب البسوس صارت بينه ليـــ من

سديت بوجهها وقلت خلاص لاتتصلين علي لاعاد اشوف رقمك بجهازي ولا اجي اسطرك

وفعلا بس؟ مقيوله برا اسد وعندها مياو مياو

قمت احن وعيش بصراع نفسي وتحلطم مع نفسي

وفعلا دزيت لها مسجات ( كتبت قصايد وقصص وامثار واحاديث وامثال وححكم وفلسفه وكل شي بمسجات وسائط عشان اروضها) وفعلا روضتها

ورجعت المياه الى مجاريه

وبعدها بفتره .. قامت تقـط لي نغـزات على سيارتها كحيانه وكل شوي تخرب ومادري وشو ( الوكاد تبي سياره من جيبي يعني هز الجيب يا برنس)

وانا ارقع الموقع ياخي وديها الكراج ياخي مشي الحال فيها وارقع ووانحاش من الموقع بطريقه سلسه

الوكاد البنت قامت تتمادى علي

يعني تقولي مثل ماتسوي فيني اسوي فيك

لابوي دامني قلت الحياه مشاركه

الوكاد اخر مشكله حصلت بينه من فتره وخـــربتها وبعتها وقطيت السالفه بحظن مامه .. ورحت الامي يامامه يامامه يامامه

وتدخلت الولايات المتحده الامريكيه في الموقف المحرج

بس ها؟ قالت لها لاتكلمينه ولا يكلمك تلفون

وربي انبطت جبدي وندمت اني قلت لامي وزهقت والبنت تبيها من الله لان شفطت علي اكثر من 13 يوم

سألت اخــــــــــوي الكبيـــــر عن(( كيف تروض زوجتك وتكفخها ان بطت كبدك؟؟))

قال لي اشفط عليها شهر شهرين وتجيك تركع عند رجولك انت غلطت لانك عطينتها مصروف انت غلطت لما قلت الحياه مشاركه انت لهستها المفروض في حدود ؟

بس يا شباب البنت تبي انسان يحس فيها زوج يشاركها بكل شي اعتقد هي مو خدامه

انا انسان ديمقراطي مشكلتي والله اني واعدتها تسوق سياره الي تبيها لو رنج سبورت واعدتها اني اوديها شهر عسل لصومال هههههه ابط جبدها بهسالفه هههههههه ومرات اواعدها البسى بوشيه ونقاب وحجاب وست عبايات ودلاقات ودسوس حارس مرمى ههههه هم تلوع جبدها هههههه شسوي احب اطنز

الوكاد انا الحين منبطه جبدي .. واحاتيها وما اقدر ادق لان مراح ترد اتوقع وامي تقول ان دقيت راح تصير رخمه وتدوس على راسك بكرا ؟

وفعلا يمكن صح

بس انا احبها

والله احبها

ياخي احبها

ياهي احبها المشكله ان شريت لها خاتم الماس

ومقطوط بدرج السياره شلون اهديه لها وماتكلمني واقفه مع امي

الوكاد ؟ يويلكم ويلاه ان مارديتو لاتتفرجون لاني بقعد اطالع الي يدش ويطلع وكل شوي بسوي تحديث لصفجه اكتبو يرحم امكم

ابعدعو برائكم

لاتتفرج ياخي

لاتتفرجين ياخي

عبر عن شعورك
فرق الي بجواك

ايوووووه كده يوديـــــــــــــع

اخوكم المظلوووووم

التعديل الأخير تم بواسطة وردة بين الثلوج ; 13-01-2011 الساعة 12:55 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه