السلام عليكم

انا اليوم حزينه حزينه

نعم حزينه لدرجة البكاء والصمت والكبت

لا اعلم هل هي تراكمات الوقت ام انني اصبحت حساسه وغامضه ولا اشكو لمن حولي ولا لي سوى الله سبحانه وتعالى ثم هذا المنتدى الذي له فضل علي بعد الله واعلم اني ضايقتكم ومن المحتمل ان اخرج من هذا المنتدى دون عوده لظروف خاصة

اعتذر للاطاله اليوم حصل موقف افجعني حيث حصل حريق في بيتي وكادت النار ان تنال مني لولا لطف الله ورحمته وصرخت وقتها وكنت في الدور الارضي وسمعتني بنتي في الدور العلوي واسمعها تبكي وتصرخ ماما ماما وتنادي ابوها وبسرعه نزلوا عندي بعد ان ساعدني الله في اخماد الحريق ولما نزل زوجي طالع فيني وقال وش فيك قلت شوف النار كيف الحمدلله ربي نجاني قام طالعني بنظرة سخط وكأنه متضايق ليش افجعهم والله العظيم غصب عني وعطاني ظهره وطلع فوق وانا جسمي يرتعش من الخوف ومو قادره اضبط اعصابي تعبانه طالعتني بنتي الله يحفظها قالت ماما وش فيك ترتعشي خايفه وضمتني وحضنتني بقوه حسيت اني ارتحت شوي ورحت وجلست ابغى ارتاح ما ارتحت جلست افكر ليه كذا زوجي معاي وحبيت اجلس وحدي وقتها وجلست استرجع شريط ذكريات
تذكرت لما كنت بالمستشفى قبل سنة لعمل عملية جراحية وفي يوم العملية الصباح لبسوني لبس العمليه وجهزوني لدخول غرفة العمليات وقالوا لي انتظري نص ساعه بعدها بندخلك عشان العملية وماكان معاي وقتها الا الله سبحانه وتعالى ثم زوجي لان اهلي ماكانوا عندي بنفس المنطقة
وتعرفوا نفسية المريض قبل دخول غرف العمليات من توتر وخوف وقلق المهم تأخروا علي اكثر من نص ساعة وقالوا انتظري شويه وزوجي كان جالس عندي بصمت رهيب ساكت ويطالع بالجوال وكل شويه يشوف الساعه ولما قالوا انتظري شويه طالعني زوجي وقال شكلهم بيتأخروا انا بروح عندي شغلات بخلصها ...

قلت له انتظر شوي لاتروح وتخليني لوحدي ماعندي اهل ولا احد احتاج وجودك نفسيا معي
واي شغلات اللي تخلصها الان وانا في هالظروف وجلس وهو طفشان متى يخلصوني
والله العظيم اني دخلت غرفة العمليات وانا متضايقه نفسيآ ع الآخر مو من العملية بس ماعرف ليش جاني شعور بالضيقه والحزن مو حاسه بالامان ماعرف ليه

ومواقف اخرى لكن الموقفين اللي ذكرتهم ما راح انساهم

لما امرض او اتعب او اشكي من اي شيء ما اعرف ليش نظرة زوجي لي وكأني دلوعه واتدلع او امثل عليه رغم اني ما اشكي واتألم الا للشديد القوي بس مايحس فيني

ومره كنت مريضه ومنومه بالمستشفى واتصل علي من البيت وكان وقت الزياره بدأ قال لازم اجي قلت له افرح بجيتك لو جيت يعني هو عارف ان اهلي مو عندي المفروض مايقول ضروري اجي ... ولما طلعت من المستشفى قلت له انت ما تحس فيني لو اشكي لو امرض قال الا قلت تصرفاتك ماتدل على كذا وذكرته بمواقفه معي قلت يمكن يحس قال اللي انا اسويه معك يسوونه كل الناس بحياتهم وشي عادي بس انتي حساسه وتتخيلين اشياء مو صحيحه ...

تحملوني والله فضفضت لاني حزينه وابكي ...

سامحوني كلامي ملخبط واشعر بغصة والعبره تخنقني ..


نفسي اطنش واعيش مرتاحه

__________________

لا اله الا انت سبحانك اني كنت من الظالمين