السلام عليكم ورحمة الله وبركاته .......
اولا حبيت انضم لهالمنتدى الاكثر من رائع وفعال واطرح قصتي واتمنى من الاعضاء اللي شفت فيهم كل منطقيه وعقلانيه التفاعل معي وابداء الرأي وكلي ثقه في الله ثم في ارائكم ....
انا متزوجه من اربع سنوات من انسان كنا نعرفه بحسن الاخلاق وكان صديق اخوي وبنفس الوقت اخته معي في الكليه الولد احببني لان فيه مره صادفته في البيت فجأه بالغلط وكلام اخته عني مع ان علاقتي فيها مو قويه هذاك الوقت وتقدم لي ورفضو الاهل بحكم ان فيه وحده اكبر مني ورجع كرر الخطوبه وماصار نصيب المهم خطبله ابوه وطلق بعد كم شهر ورجع وخطبني ... اللي صار اني تعلقت في هالانسان اللي مصر علي ( تعرفون مشاعر البنت لما تحس فيه احد متمسك فيها ) تحبه حتى لو كان شيفه !!!
المهم وصلنا كلام ان الولد الله يعافيكم يتعاطا مخدرات والعياذ بالله قالوله اهلي لما تترك اللي تتعاطاه تعال وجلس فتره ورجع وقال انا مو مثل قبل وانا انسان ثاني ... رفضو اهلي كلهم الا انا للاسف رحت لابوي وقلتله والله اذا كان هالانسان يحبني للدرجه ذي اكيد هو اللي بيحافظ علي ومابيتعبني واصريت ع رأيي الطفولي .. وافق ابوي وتزوجنا تهنيت كم شهر وبعدها صرت احس ان تصرفاته مو طبيعيه وانه انسان مو عادي!!!
حملت منه وبعدها زادت معاناتي وعرفت انه يتعاطا قاسيت منه كل العذاب والتجريح في اهلي وتغير 180 درجه وصبرت علشان ولدي وحملت بعده وجبت بنت وبرضو ع نفس الموال والاهانات والبعد العاطفي والنفسي كم مره اكشفه وكم مره يحلف ويبكي انها اخر مره واعذريني وانسي اللي صار ويرجع ع نفس الموااال الممل ...
كم مره زعلت عليه واجلس عند اهلي واهدده اني بأقول كل شي لو مابطل بس مافاد فيه يرجع زي اول واكثر ...
كان في باله اني ماراح اتفشل مع اهلي واقولهم انه خربان بحكم اني انا اللي اصريت عليه في البدايه يتوقع من اهلي يقولو احسن انتي اللي اخترتي ؟؟؟؟
وقبل تقريبا شهر طقت اعصابي صارت حياتي ممله جدا مالها معنى مع هالانسان اهانات سب تجريح لعن صراخ حتى الاطفال ماعاد يتحمل صراخهم ... قلتله ابي اهلي بحكم انهم في منطقه ثانيه قال لا لو تموتي تبين تفضحيني ؟؟؟ صبرت اكثر من مره وفي الاخير ناديت اخوي وصارت مشكله كبيره معاه ورحت لاهلي وخليت اطفالي عنده وانا قلبي بيتقطع بس مابيدي حيله رفض اخذهم ...
بعدها بيومين كلمه ابوي وقاله جيب العيال ولا بتظطرني اسوي شي ما ابيه وراحله ابوي وجابهم الله يخليه لي ولا يحرمني منه ....
علمأ بأن اخوي لما اخذني قاله واحد من زملائه عقيد تعال ارسل معك دوريه تجيبه لي وخذ العيال بس اخوي من طيب اصله رفض علشان لايخرب مستقبله وسمعته ..
بعدها صار يدق ع اهلي ومن بجاحته يهدد لو مايعطونه عياله واوقات يدق يتوسل يرجعوني قبل رمضان وانه راح يتغير وتوبه من الخراب ومدري وشو ..؟؟ يعني كلام دايم اسمعه منه ...

اسفه للاطاله بس ابي رايكم هل انا غلطت وهل لابد اني ارجعله وانسى بعد كل هالمعاناه اللي رفضت تنتهي ؟؟؟
لاتقولو فيه امل .. هو انسان عنيييييييييد وانتقامي ؟
انا ابي الطلاق ابي ارتااح نفسياُ؟؟ علماً بأني استخرت وكارهته جداً وما اتخيل اني بعيش معه ابد ابد ..
وش رايكم فديتكم بوضعي ................