هل الفتاة الملتزمة تقبل بشاب غير ملتزم؟؟
إذا كانت البنت ملتزمة دارسة شريعة وتحب طلب العلم
تقدم لها شاب غير ملتزم يعني:
لا يصلي في المسجد/ يسمع أغاني / حليق / مسبل / يشرب الدخان
هل توافق عليه وأقصد بسؤالي الفتاة التي تجاوزت منتصف العشرينات و قربت من الثلاثينات أو دخلتها
يعني صارت في مرحلة العنوسة هل تقبل به ؟؟
وهل ستستقيم حياتها معه؟؟
فقد اتصلت امرأة تخطبني وقالت أن الولد يريد ملتزمة
ولكنه غير ملتزم
فقلت لوالدتي أن تسألها إذا كان يصلي في المسجد ممكن أقبل
ولكن والدتي لم تسألها وحددت يوم لرؤيتي
فقلت لأمي أن تجعل الحريم يأتون أولا ثم إن حصل اتفاق يأتي الولد لأني
كل مرة أخرج للخاطب واكتشف فيه عيوب وينصرف
ولا أريد أن يحدث نفس كل مرة فلست محل للفرجة
ولكن أمي مارضت قالت هم جايين من مكان بعيد ومايصير يتعنون
وجاء يوم الرؤية وخرجت للحريم وسؤلوني كم سؤال ع السريع وعرفوا عمري
وعرفت أني أكبر من ولدهم بسنتين ثم أخبروني بأن الولد يريد رؤيتي ولم
اتمكن من سؤالهم عن شيء
دخلت لأبس حجابي فسمعت وانا خارجة
انه ليس فقط حليق او يسمع اغاني بل لا يصلي في المسجد
وفوق هذا مدخن
هنا اصابني ضيق شديد وحسيت بغصة لكن حبست دموعي
وجاءت والدتي تقولي يله الولد يبي يشوفك فقلت لها وانا معصبه لااريد الخروج
ليش ما سألتي قبل ما يأتون مو كان أحسن من هذا التعب كله.. يوم كامل
نجهز ونرتب ونشيل ونحط حتى نستقبلهم وقبلها بثلاثة ايام تفكير وقلق
والحين ننحرج جدامهم
مادري ليش امي تصرفت هكذا كأنه أول مرة أنخطب فيها ،، ولابس تبيني اتزوج اي واحد وخلاص
وهي استانست لأنه أعزب لأنه صار لي أكثر من سنتين ماتقدم لي إلا مطلق وعنده عيال
قلت لها مارح اطلع وهي قعدت تطالعني معصبه والدمعه بعيونها
طيب انا شنو ذنبي هي تعرف انه شرطي الوحيد ان يكون متدين وبالأخير
قلت يله بس أبيه يصلي في المسجد ..
ادري انه الموقف محرج لكن مابي اكشف عليه وانا ما ابيه
طلعت امي وقالت لهم اني مابي اطلع والولد كان موجود وسمعته قام وطلع ع طول والحريم بعضهم زعل وقال فرصة سعيده
وفي وحده قالت لامي خليها تصلي الحين ركعتين استخارة قبل مانطلع ولاتستعجل بالرفض،،
وجت أمي وقالت لي هالكلام!! شلون اصلي استخارة وارد عليهم بنفس اللحظه!!
طلعت لهم امي وسمعتها بكت قدامهم وتقولهم هذي بنتي الوحيدة وكل ماقول انفرجت تتسكر ومااقدر اغصبها<< مادري ليش امي سوت جذيه ناقصنا فشيله
فقالو خليها تطلع نبي نكلمها
طلعت لهم عشان خاطر امي وحتى ما احرجها
وحاولوا فترة يقنعون فيني وان مو شرط اذا كان ملتحي يكون زين وضربوا لي
مثال بواحد حافظ للقرآن و امام مسجد تزوج وحده على أنه اعزب وطلع متزوج وغيره من هالكلام
طيب انا ماقلت شرط الملتحي يكون متدين لكن غالبا اللي يكون ملتزم باطنا
تبين عليه علامات الصلاح في الظاهر ،، ولو المسألة وقفت على أنه مو
ملتحي بس كان هين لكن الولد مايصلي جماعة ويدخن وهذي صعبه
وحاولوا فيني لين خلوا الولد يدخل ويوشوفني وانا من داخلي مو راضية لكن عشان امي ومابي افشلها
والولد ماتلكم ولا كلمه بس لما قالو له عن شرطي انه يصلي في المسجد
ويترك الدخان قال إن شاء الله وحسيت انه ما يعرف يتكلم او مادري شفيه..
وامه قالت انه تقدم لبنت عمه لكنها رفضته لأنه تعلثم بالكلام وحسبت إنه
يتأتأ وهو مافي شي بس لأنه كان مرتبك لأنه أول مره يقعد مع بنت !!
هذا كله كلام الأم وقعدت تمدح بولدها أنه ماعرف خرابيط ولايكلم بنات
ومايشرب خمر !! <<مادري هل هذا مدح
وبعد ماراحو قعدت سكرت علي الباب وقعدت ابكي وابكي
لأني وضعي صار صعب حيل ومحرج جدام اهلي حتى الخدامه صرت استحي
منها لماتشوفنا نجهز وبعدها ولاشي
حتى ابوي ماصار يهتم لما تقوله امي انه في واحد بيتقدم لي لدرجة انه
مايسألها عن اسمه او عائلته!!
اهلي ملو مني ،، وإن كانوا تعبوا فأنا تعبت اكثر منهم لكن شسوي هل اتزوج أي واحد حتى يرتاحون
اتمنى تجاوبون على السؤال اللي سألته في البداية هل عادي وحدة ملتزمه تاخذ واحد غير ملتزم
وإن كان لكم تعليق على قصتي أو دعاء فلا تحرموني
__________________
يارب افرجها
التعديل الأخير تم بواسطة جوهرة الكويت ; 18-04-2010 الساعة 10:26 PM
18-04-2010, 10:17 PM
ضوابط المشاركة
العرض الشجري