[مميز] مهلبية الأناناس و القرفه
السلام عليكم ورحمة الله
حبيباتي اليوم الروقان معياره ألف عندي 
اللهم لك الحمد
قمت صورت
لا وابشركم تعلمت اصغر الصور 
مين قدي انا بس
الموهيــــــــــــــــــــــــم
سويت مهلبيه لها معاي تقريبا عشر سنوات ------- صارت عروسه في رابع ابتدائي 
لا جد
ماقد سويتها الا تنطلب ياربي لك الحمد
المقادير يا اقمار
في القدر
14 ملعقه نيدو او اي حليب بودره
3 فناجيل قهوه سكر او حسب رغبتك اقل اكثر بس كذا مزبوط
فانيليا
بيضه
ثلاث ملاعق كبيره نشا
ثلاث اكواب و نص مويه
المرحله الثانيه
علبتين قشطه
في الكاسات
بسكوت شاي
موية الأناناس
للوجه
علبة اناناس شرايح
فستق مطحون
اولا نجهز كاسات الحلا بالبسكوت
طريقتي اني اغمس البسكوت في موية الأناناس
منها طعم لذيذ
ومنها عشان تلزق بأسفل الكاس فما تطلع معاي لما اصب المهلبيه --- ياما جنني اول ما اعتمدتها
طبعا نخلط جميع المقادير اللي في القدر بالماء .. بمضرب سلك .. ونحطها ع النار ونفتح علب القشطه وتخلينها جنبك
على نار متوسطه .. تستمرين في الخلط ما توقفين ابد علشان لا تحترق او يصير فيها كلاكيع او عقد ( الله يعينك بس اعتبريها أجر )
بمجرد مايتماسك تمام القوام ويغلظ تطفين النار وتحطين القشطه وتخلطين تمام وتتأكدين انها تجانست مع باقي المهلبيه
طبعا كاساتك جاهزه .. خلاص صبي فيهم .. وخليها تقريبا عشر دقايق لحد ما تخف حرارتها شوي
الحين خلاص جاهزه للتزيين
طريقتي احط الفستق اول علشان اضمن اكبر كميه
ثم الأناناس الجميل مع رشه بسيطه ع الوش فستق
وهذول العصابه بعد ما تم القبض عليهم للتحقيق
آآآآآآآآآآآآه عفوا
وهذي كاسة الكنق حبيب ألبي :14:
واخيرا حياكم تفضلوا
طبعا تتسائلون وين القرفه
لما تحطينها ع النار تقدرين تحطين عليها عود قرفه محترم .. يعني حجمه لا بأس فيه علشان يبان الطعم.. لا تحطي بودره علشان لا تسود
وتكملين طبخها عادي جدا
وعلى الوش تحطين جوز هند .. طبعا انا ماسويتها .. في انتظار عضوه كذا تتهور مثلي وتعملها بالقرفه و تصورها
يارب تجربونها وتدعون لي
13-04-2010, 07:07 PM
ضوابط المشاركة
العرض الشجري