السلام عليكم يااخوان...عساكم بخير ان شاء الله


سالفتي يااخوان اني متقدم لخطبة بنت من عائلة محترمة ومتدينة ، سألنا عنهم الى ان قلنا امين والحمد لله فيهم الخير والبنت خلوقة ومؤدبة واهلي وصفوها لي وعجبتني ، وتمت الموافقة من قبلهم وجالسين ينتظرون حضورنا عشان نتفق على موضوع الملكة والزواج

قبل لا نروح لهم بـ ليلة وحدة وصلني خبر سيء من احد الاصدقاء يقول لي فيه ان هذا البيت عندهم بنت لها علاقات مع شاب ومن هالكلام ، انا اولا انصدمت ثانيا ماصدقت هالكلام فـ قلت له انت متأكد من كلامك قال هذا اللي وصلني ..فـ صابتني صدمة ذيك الليلة وتحيرت ايش اسوي انا ماني مصدق هذا الكلام لاني واثق من سؤالنا عنهم بس في قلبي نسبة شك صغيرة ان هالكلام يطلع صدق ، فـ صارحت ابوي بالموضوع وابوي للأسف زاد الطين بلة ورغم محاولاتي معه قال سكر هالموضوع خلاص

بعد ماسكرت الموضوع ومرت فترة بسيطة (تقريبا اسبوعين) رجع لي نفس الشخص يعتذر ويقول ان هالكلام اللي كان كله اشاعات والبنات مالهم علاقات ولا شي بس احتمال يكونون كلمو احد بالانترنت . انا اولا عتبت عليه وصار بيني وبينه حوار حاد بحكم انه تكلم في شي مو متأكد منه وهو ندم وقدم لي اعتذاره واعتذار الناس اللي نقلو لي الخبر

وبنفس اليوم كلمني ابوي وقالي انه مؤنبه ضميره والمفروض نحل الموضوع بشكل سلمي بحكم اننا سألنا عن البيت وعرفنا منهم الصلاح والمفروض مانستقبل اشاعات او كلام مانعلم صحته فـ عرض علي اني لو كنت مرتاح لهم ممكن هو يرجع الموضوع

انا بصراحة رغم اني سكرت الموضوع كله من راسي الا اني الى الان مرتاح لهم ومرتاح للبيت كـ كل وانا اعرف ان ابوها انسان متفهم وممكن نحل الموضوع بطريقة سلمية ، بس انا خايف بكرة من كلام الناس ..اخاف يجي بكرة ويقول فلان عني شي او عن عرضي شي وانا مستحيل اقبل هالشي وممكن يكون لكلام الناس اثار سيئة تنعكس على حياتي معاهم وتنعكس على صورتي قدام الناس فـ انتو تعرفون ان كلام الناس مايوقف وله تأثيره في مجتماعتنا المتخلفة للأسف


فـ ماادري قلت خل اسجل بالمنتدى واستطلع اراؤكم واقتراحاتكم

ولكم مني ارق تحية