بصراحة نفسي أكون محترمة من زوجي. لكن هو معطيني لا احترام ولا حتى كلمة في مواضيع النساء. ومهما بذلت لسة مقصرة في عينه. أنا طبعا ما أمدح في نفسي فوالله أنا شايفة عيوبي من قبل لا يتكلم زوجي. لكن أنا مهما مشيتله من عيوب وتجاهلتها أجد عيوبي منغصة عيشة زوجي ويرددها أمام أهلي وأهله.

حيرانة لآني لسة أحبه وأكره اللي عمله الفراق فيني وولدي لما كنت عند أهلي. ولدي اللي كان عمره وقتها سنتين ونصف تقريبا لمن شافنا هدينا وقدرنا نجلس جنب بعض لأول مرة والله ما أكدب إنه كان يمسد على راسي و على راس أبوه.

بعد ما سكنت معاه شفته راق أول شهر وبعدين من تاني شهر بدأت المشاكل من جديد والتهديد بالطلاق كل ماله يزيد. يعني في الأسبوعين أسمعها مرة.
الوالد يقول لوطلعتي من البيت وسكنت مع أخوك فلا تفكري ترجعيله لآن زوجك طبعه كدا وما راح يتغير. أنا أدري إن زوجي مخه حجر بس ما كان ودي أقفل باب العودة من قبل لا أخرج. أنا كنت أبغ أرجع بشروطي يا إما يتقبلها ونرجع لبعض أو يعاند وبالتالي أتيقن إن الراجل ما منه فايدة.

أنا أدري إن موضوعي صعب ويمكن في نقاط مجهولة لكني فعلا بحاجة لردود القراء سواء مع أو ضد. أنا عمري ٢٧ وزوجي 30

صح إنه مافي فرق كبير بالعمر لكن زوجي جاد لايحب المزاح وبيتوتي وانشغاله في عمله ٢٤ ساعة. حتى بالبيت. وأنا عارفة إن حتى كاسة الشاي يفضل يشربها وهو في مكتبه أمام شاشة الكمبيوتر.

نفسي كان مرة نفتح موضوع نتكلم فيه بدون ما يفرض رأيه ويتقبل إن حتى في الدين والسياسة والعالم من حولنا في أكتر من رأي وليس الذي اقتنع به هو فقط. ولأني اجتماعية أموت لو أجلس بدون ما أتكلم مع أحد أقوم أدخل عليه أقله اللي عندي وأخرج. يمكن عنده تعليق أو سؤال ويمكن لا . والمصيبة إنه مع كدا يكره يشوفني أتكلم مع صديقاتي. ويسأل إنت اتصلت أو هي؟ ولا يقول قومي اهتمي بولدك وبيتك.

يمكن تقولوا إنه بخيل لكنه مجرد أناني. يعني ما يبخل لما يتكلم بالساعة والأتنين لكن لا يشوفني أنا اللي بتكلم. من الأشياء اللي كانت تاكل فيني وأنا عند أهلي إن بعد ما اتصالحنا واسنيت يفتحلي البيت كنت أتصل أقله إني مشتاقتله. إذا ماله نفس يتكلم معاي ما يقول أكلمك بعدين ولامزاجي مو رايق ولا أكلمك في الليل. كان يقول إيش تبغي؟ وأرد ولا شي بس مشتاقة. يقول المكالمة بفلوس ويقفل في وجهي. وبعدين لمن أزعل يقول ما كان لي نفس أتكلم. وانا نفسي أفهم كم سنة لازم أصبر عشان النفس تجيه؟

مع كدة أنا شفت منه الطيب لكن أظنه ضاع في طريق العودة من السفر لأنتهاء دراسته. كما ضاع حنانه علي وحبه لي. فهو يعترف أنه لايحبني مثل السابق وكلمة أحبك ما تخرج منه ولو طلبتها طلب. ولما لأقله إني أحبه يرد و إيش جاييني من حبك؟؟؟