باقي 29 يوم على الزواج والأحوال تردت(حلت المشكله ولله الحمد)
السلام عليكم ورحمة الله وبركاته
أسعد الله أوقاتكم بكل خير اخواني واخواتي في الله
الحقيقه انا سبق ونزلت موضوع لكم هنا ويمكن احدكم يذكره وكان طويل والحمد لله انحل وتيسرت اموري ..
اليوم جايكم بموضوع مع ثقتي في نفسي وثقتي بعقلانيتي وحسن تصرفي مع خطيبتي لكن الشق أكبر من الرقعه وهالبنت زودتها الله يسامحها وما أبغى اتسرع واخربها على راسها ..
أنا ما عندي شي أخسره نهائياً ولله الحمد سوى الخساره الماديه , والمال حنا نجيبه مو هو اللي يجيبنا يعني دام خسارتي ماديه فلا فكرت , لا تفكرون ان أحوالي الماديه تمام لكن كل أمور زواجي ديون وأنا ما عندي مانع أتدين واتعب لكن هل البنت اللي بتزوجها بتكون في الأخير تستاهل هالتعب كله !!
قصتي مع خطيبتي بدأت الاسبوع الماضي من يوم الأربعاء مو الماضي , اللي قبله بالضبط , طبعاً زواجي في العيد الجاي ان شاء الله ..
تملكت عليها في شهر صفر الماضي وكنا بنخلي الزواج في بداية شهر شعبان قدر الله بعد ملكتنا بأسبوعين يتوفى جدي وجدها عليه رحمة الله ( لأنها بنت عمي ) المهم حنا ما كان عندنا مانع بالزواج بعد أربعة أشهر لكن هي سوت زحمه وزعل ومن هالكلام وأجلته علشان خاطرها لعيد الأضحى !!
مشت الامور تمام وحصل مشاكل وعفسه وانحلت وتصير بعض الأمور وتنحل ولله الحمد , المهم في شهر شعبان توفت جدتي أيضاً ام ابوي اللي تصير جدتها بعد , المهم في شهر رمضان وفي احد المكالمات وقالت نبي نؤجل الزواج !!!! قلت ليه خير ان شاء الله , قالت بس انا اخاف يقولون ما فيه طقطقه ورقص ومن هالكلام علشان موت جدتي , قلت : واذا صار ما فيه طقطقه وش المشكله فيه , الله أراد ان جدتي تتوفى وش تبيني أسوي , أروح أطلعها من قبرها يعني والا وش اسوي , قالت لا مو المسأله كذا بس المسأله ان هذي فرحتي ومن هالكلام , قلت شوفي أنا ما عندي أي مانع لأن زواجنا بيكون في العيد يعني بعد 4 أشهر , ومسألة اني اقعد كل شوي اتأخر في زواجي لا هذي مرفوضه لان كل الناس بتموت وانا ما تزوجت إذا جلست على هالحال وبعدين أنتي تبيني والا تبين الطقطقه وهالكلام , قالت أكيد أنت بس لام نحط طقاقات ويكون زواج مثل كذا .. المهم قلت ابشري ما عليك بنحط طقاقات وابوي وابوك ما راح يرفضون وانا بقنعهم لأن وفاة جدتي بيكون مر عليها وقت .. << تحسفت بعدييييين على اني قلت هالكلام لكن زلة لسان ..
المهم مرت الأيام ووصلنا للتحضير للزواج من الاسبوع الماضي , استأجرنا قاعه هي كانت تبيها ( طبعاً عندنا البنت مالها دخل بالقاعه الزوج هو المتصرف في كل شي حتى لو يحط خيمه هي مالها دخل ) المهم قالت لي تكفى ابي القاعه الفلانيه لأنها قريبه من صديقاتي وابيهم يحضرون , قلت ابشري ومن عيوني بحاول إذا ضروفي سمحت والا ترا بناخذ القاعه اللي تزوجوا فيها عيال عمي لأن سعرها مناسب لي وانا ظروفي صايره تعبانه , قالت تكفى ومن هالكلام ..
المههم ابوي قال لي انا علي تكاليف القاعه وبناخذ القاعه اللي تزوجوا فيها عيال عمك , رخيصه وكويسه , قلت يا بوي انا ابي هذيك القاعه , المهم الله كتب لي هالقاعه اللي تبيها هي وتيسرت الامور ..
جينا عند الطقاقات وكلمتني , هاه بشر استأجرت والا لا لأني ابي رقمهم علشان الزفه ومدري ايش , قلت ابشري هاليومين , كلمت ابوي وقلت وش رايك انا ما ابي نحط طقاقات الا بعد اذنك انت وعمي قال لا مو لازم جدتك ما بعد امداها تتوفى وتبينا نروح نطقطق , قلت يا بوي لو اضمن جدتي تطلع من قبرها كان ما حطيت شي , المهم قال شاور عمك , رحت لعمي وابتسم وقال مهوب ضروري ( مثل اللي يقول اغصبني واطيع ) , طبعاً عمي يسوي نفسه اني عنتر بن شداد وشغلات النسوان ما تمشي ومن هالكلام ..
المهم جاها الخبر من امي في نفس الليله , دقت علي معصبه , وليش تسوي كذا وانت وعدتني من قبل ومن هالكلام , قلت اركدي والعني ابليس وابشري باللي تبينه , بعدين أنا دايم ما أقصر معك في شي حتى القاعه خليتك تختارينها ( طبعاً انا معودها أشاورها واللي تبيه ما أقصر معها فيه ) قالت : يا رجال القاعه أدري انكم حصلتوا هذيك محجوزه وانجبرتوا على هذي والا مو علشاني ولا شي, قلت والله ثم والله انها علشان خاطرك ( طبعا نزلت علي هالكلمه مثل الصاعقه لأن قد حصل لي اكثر من موقف منها مثل كذا بالضبط ) , لكن انتي هدي وابشري الموضوع ما انتهى بكلم ابوي وعمي واضغط عليهم وما راح يقصرون وانتي روحي توضي وصلي ركعتين وبتهدا نفسك وان شاء الله الامور تتيسر , قالت وشلون تتيسر فهمني ابي اعرف كيف تتيسر , قلت انا قلت بتتيسر يعني ابشري .. ( طبعا كنت متعمد ما أشد معها لأنها معصبه وفرحتها ومن هالكلام وقلت أخليها لين تهدا )
كلمت ابوي وعمي اليوم الثاني قلت يا ابوي البنت تبغى وعلشان خاطرها وهذي فرحتها , قال ابوي وش رايك دام بنتك تبي وملزمه انا ما عندي مانع ( يقصد عمي ) , قام عمي يتمتم وعصب علي وانت ازعجتني وانت ولد مطفوق ومن هالكلام ( لانه ما يقدر على حرمته جاي يسوي عنتر علي لان حرمته عله وترفع الضغط والمشاكل كلها ما تجي الا من تحت راسها ) , ابوي زعل ولا هي بعادته وقام قال له : انت لو هجدت اللي عندك في البيت ما كان جتنا هالصجه كلها لكن امتحنونا من امس وانت عندنا تسوي الرجال العظيم اللي كلمتي ما تنثني , يا رجال رح رتبك امورك وسكت اللي عندك في البيت ولا يصير اللي صار ..
انا قمت وحبيت راس عمي وابوي وطلع ابوي ومشى وانا توجهت لوظيفتي يوم الجمعه لاني مو في نفس المنطقه واستقرينا على اننا نحجز طقاقات ..
طبعا البنت دقت علي وانا في الطريق وش العلوم ومن هالكلام قلت لها انا في الطريق الحين وقربت اوصل ولا جبت طاري الطقاقات وكنت رسمي بالحيل وخليتها لين السبت في الليل ودقيت , سلام كيف الحال ترا ابوك وافق وخلاص تفاهمي مع امي على مسألة الطقاقات , احجزوا وعلموني ارسل لكم فلوسها , قالت اوكي قلت يالله مع السلامه , طبعا بكل رسميه ( طبعا انا موضوع القاعه ضايقني وقهرني بشكل كبير ) ..
جلسنا لين يوم الاثنين وانا بالعاده ما اقاطعها ,دقت وما رديت بعدها ارسلت لي رساله اخر الليل ( اشتقت لك يالقاطع 
)
خليتها لين جا الصبح وانا في الدوام وارسلت لها رساله ( ما اقطع من دون سبب , دوري لسبب واكيد راح تلقين )
ردت علي الظهر برساله ( دورت كثيييييير وما لقيت سبب )
رديت عليها برساله طويله ( ما راح اقطع من دون سبب بس الظاهر من كثر ما صرتي تغلطين علي ولا تقدريني صرتي تنسين ..
انا ان رحت او جيت عادي عندك ما همك , ان سويت والا ما سويت ما همك , حتى لو يسوي خالد المستحيل لعيونك ما راح تتغير نظرتك السوداويه تجاهه وظنونك فيه .. وتبغيني ما انسحب واقطع ؟
إذا حس أي شخص انه ماله قبول عند غيره اكيد بينسحب الا اذا كان ذليل وواطي !! صدقيني كل شي يهون الا الكلام الجارح مع انك ما ترضين ان احد يجرحك بكلمه , لكن انا اللي استاهل وصدق من قال ( عز نفسك تجدها !! )
انا ما كتبت هالكلام اللا من الغبنه والزعل , واللي خلقك ان زعلي لو يوزع على الخلق ما يكفيهم ..
اي انسان يحاول ينسحب ويقطع اتصالاته مع شخص يعزه وخصوصا اذا اعطاه قلبه الا انن خاطره مضيوم ومقهور وفضل انه يبتعد علشان يتفادى الجاي لان وش يبغى بالهموم والقلق النفسي , فيعيش حياته لان الدنيا ما تسوى التعب ..
يمكن انك تنظرين لكلامي هذا على انه خوف او ذل لكن لا يجي في تصورك اني في يوم من الايام راح اخاف او اذل لاني اعرف نفسي ما اخااف الا من ربي وخوفي منه يردعني عن امور كثيره ..
اقدر استخدم امور كثيره مع اللي حاولوا يتعرضوني بأذى لكن المشكله انهم غالين مع انهم ما قدروني بس اخاف مع طول الوقت بنفذ الصبر ويتغير الحال ..
لاني خلاص صرت اشوف ان ما فيه احد يستحق التضحيه , فققرت اسكر قلبي واستغني بالله عن الناس كلهم لان لي قلب واحد ولا يمكن اني اغامر به ..
عفا الله عن جميع الناس من عدو او صديق ..
طبعي المسامحه لان الدنيا ما تسوى في عيني شي , والا فضل اني اكون مع نفسي ومن حالي في حالي علشان اتجنب احد يعترضني واتجنب في نفس الوقت اني ما انتقم لاني اذا نويت انتقم راح ابطش ..
سامح الله الايام وش سوت ) انتهت الرساله
طبعا ارسلتها الساعه 12 الظهر ومن بعدها اتصالات ورسايل لين جا العصر وفيه رساله هزتني ( اسألك بالله ترد )
انجبرت ارد عليها برساله وهي ( لا تسأليني بالله الله يخليك , انا ما رديت برساله الا علشانه وانا الحين ما اقدر ارد عليك )
ودقت وحاولت لين الساعه 3 العصر , بعد بساعه ارسلت هالرساله ( تدري انك اول مره تكون قاسي علي لهالدرجه , طيب انت زعلان كيف اراضيك وانا مو عارفه سبب زعلك بالضبط , تقول اني جرحتك ولا قدرت اي شي تسويه لي , ليه يعني انت شايف اني جاحده لهالدرجه يعني ؟ انا قد قلت لك وبقول لك مليون مره انا لو ادور العالم ما راح الاقي مثلك جعلني ما انحرم منك , وانا ادري اني لو اطلب عيونك عطيتني اياها ما قصرت معي ولا راح تقصر , لا تزعل ولا تضيق خاطرك من شي منت فاهمه او فاهمه غلط , ولا تحط في بالك ان مالك عندي قدر , يشهد علي الله ان قدرك غالي وعزيز ..
مدري وش اقول بس احسك كرهتني من قلب )
طبعا بعدها انقطعت الاتصالات من يوم الثلاثاء لين اليوم وانا حلفت بربي ما اتصل لو يصير اللي يصير , انا ما كنت متوقع انه بتقطع بعد هالرساله وعطتني هالرساله مؤشر ايجابي لكن الظاهر امها تدخلت او اختها وقالت خليه ينطق , لاني واثق ان امها واختها المتزوجه يتدخلون كثير ..
لحد الحين ما اتصلت ولا شي , وانا ما كنت اتوقع تسوي كذا , لاني اعرفها زين مو منها هالشي , وانا ما ادري هل هي تبي ادق عليها واعلمها اني زعلت من كذا وكذا واقول لها تكفين تعالي راضيني ..
نقطه مهمه : والله الذي لا إله إلا هو اني ما قصرت عليها في شي ويمكن الشي الوحيد اللي طلبته ورفضته هو المصروف لانه مو من حقها وحسيته اسلوب استغلال ..
والله الذي لا إله إلا هو اني انا وياها عند ربي نتصافى واني ما اسامحها على اللي سوته وجالسه تسويه ..
والله الذي لا إله إلا هو اني دعيت على من يتدخل وما زلت ادعي ان الله يحرمه الذريه ويحرمه اعز ما يملك وهذي اختها الكبيره الانجاب عندها صعب جداً واحتمال كبير ما تقر تنجب ..
انا ما ودي ادعي على احد , انا رجال طيب وفيني خير لكن دمرتني الله يدمر من كان السبب وانا والله ما زلت صابر وراكد في كل اموري ولكن لا احد يقول لي دق عليها لان والله الذي لا اله الا هو ما اتصل لين تدق هي لو يكون على طلاقها ..
سامحوني يا اخواني والله اني انفعلت , انا طيب معها لابعد الحدود حتى في مره كانت زعلانه اربع ايام وانا يوميا اتصل وارسل , والله ما بقى شي الا سويته حتى المكياج طلبتني ( مع ان الخطيبه ما تطلب خطيبها ولا تعد اللي مثل كذا الا قليلة حيا ) وشريته لها والدبله غيرتها ورقم جوالها غيرته والجهاز وعدتها اغيره والبنت مو قنوعه وانا كرهت شي اسمه زواج مع علمي ان فيه بنات طيبات حيل لكن اللي صار صار ..
http://www.66n.com/forums/showthread...ED%CF%E6%E4%ED
هذا رابط موضوعي الاول علشان تتوضح لكم الصوره كامله عنها ..
ساعدوني الله يوفقكم انا ما ابي اتسرع وهي امها واختها خبيثات واخاف يدبرون لي مكيده ويقلبون الموضوع علي ..
سامحوني انا انفعلت ولا تلوموني ما زلت مقهور وزعلان ..
__________________
يالله ياللي بيدك الضيق وافراجه .. يا خالق الخلق يا قاضي حوايجها
تفرج لعين الذي اغفت بسوهاجه .. تجهز عليها الطواري لين تزعجها
24-10-2009, 02:45 PM
ضوابط المشاركة
العرض الشجري