السلام عليكم ورحمة الله وبركاته
كيف حالك اختي ان شاء الله تكوني بخير
والله الجميع كفوا ووفوا وماقصروا
اغلب الاعضاء مستغربين تصرفات زوجك
لاتستغربون والله ماعمري شفت شمالي زوجته مرتاحه معه
والله فيهم هالطبع قوة وجبروت اعوذبالله ومافيه رحمه وبدون اي سبب
الا من رحم الله
شوفي اختي قبل اي شي
وكلي امرك لله وكثري من الاستغفار لليل نهار لايبطل الاستغفار من فمك
ثانيا لازم تكوني قويه امرأه حديديه
زوجك ياحياتي بيرجعك
انتي راجعه راجعه باذن الله
لكن عندك طريقتين للرجوع
اما ترجعين منذله ومهانه وماتغير شي ويزيد سب واهانه فيك وحياتك كلها غم وهم ونكد ويروح شبابك ويضيع عمرك بحسره والم ومذله
وهذا لو رجعتي الان بدون رضا ابوك وبدون اي احترام لنفسك
يتصل تردين
يقولك كلام تتجاوبين معه
يضغط عليك بأولادك تخورين
وبعدها ترجعين ويستمر المسلسل وكل مره يزيد الموضوع لحد مايطق عليك زوجه ثانيه ولا يطلقك ولا الله اعلم وش يصير
والطريق الثاني انك ترجعين وانتي بكرامتك ومتعدل ومتأدب معك وعارف قيمتك وماشي على الخط المستقيم
وهذا ماراح يصير الا في حاله وحده اذا بينتي انك خلاص ماتبينه تبين ورقتك
وتبينين له ان اولادك ان جابهم لك كان بها وزين على زين وان ماجابهم فهم بإيد امينه
لازم تفهميه انك تبين ورقتك
بهذي الطريقه والله والله والله هو اللي بيركض وراك
ويمكن يوسط ناس عشان ترجعين
وترجعين بشروطك واذا رجعك بيعمل حساب الف مره قبل مايقول اي كلمه
لانه بيعرف انك خلاص بايعه
ياختي لاتعصين كلام ابوك
لان زوجك ماهو سند لك
سندك هو ابوك ولو خسرتي ابوك
خسرتي السند بعد الله
ثانيا انتي بنت ناس زوجك طق الباب وخطبك واخذك على سنة الله ورسوله ماجابك من الشارع
عشان يطردك وكل شوي يقول انقلعي
ولزقه وماعندك كرامه فيك وفيك
يكذب عليك عند اهله
ويكره اولادك فيك
وش هالكلام وين عقلك ياختي
وفوق هذا تنسين كل شي وتردين عشان العيال
العيال يعزون الزوجه بنظر زوجها وتصير غاليه لانها امهم ام عياله
مو يخليهم ورقة ضغط على ام عياله
ويزيد اهانه
ياختي الرجل اللي مافيه مرؤه وشهامه وطيبه وخوف من الله وش تبين فيه
هذي امك تطلقت من ابوك ضعتوا صار فيكم شي
ماصار شي
زوجك يبيك وبيرجعك
بس ارجعي بكرامتك
استغلي هالفرصه
ارسلي له مسج قولي يابو فلان انا بستخير وبرد لك
وقفلي جوالك
لاتفتحينه خلي ابوك يتصرف
خليه لو يجلس مية سنه
اشغلي نفسك
صلي ودعي ربك ان الله يسخره لك
زوري قريباتك روحي مع خواتك اطلعي
اهتمي بشكلك ونفسك
طنشيه كم شهر
لاتسمعين كلام اللي يقلون لك ارجعي
لانهم ينظرون للمشكله نظره وقتيه
لان رجوعك سيجعلك تدخلين هنا مره اخرى وتقولين طردني مره ثانيه
وش اسوي؟
ارجعي بكرامتك وبشروطك يكفي يكفي يكفي اهانات
يوقلك انقلعي ويطلعك من بيتك
والله مايسويها اي رجل عنده شهامه
لاترجعين لو يقولك ابوك روحي لاتروحين لاترجعين
اصحي لنفسك خلي العاطفه على جنب
فهمي ابوك انك تبن ترجعين بس تبين ترجعين بكرامتك قولي لابوك مالي غيرك ومابي اترك عيالي ولا ابي ارجع بمذله قوليله ابي ارجع بكرامتي ابي ارجع وانا عارفه ان حياتي بتصير افضل وقوليله انا معتمده عليك بعد الله
وصدقيني هو رجال ويعرف وش يسوي
ادعي ربك بكل صلاه
واستغفري وقوي قلبك
والله يسر امورك
قولي لزوجك انت مو سند لي بعد الله
كل زوجه ترى ان الامان والسند لها بعد الله هو زوجها
وانت مو مكان الامان ولا السند ارجعلك ليش عشان تطردني مره ثانيه
ولا عشان تقولي انقعلي
عيالي مردهم لي لي لو يصيرون شياب
ومالي الا الله بستخير واللي يكتبه الله يصير وقفلي جوالك
وزي ماقلت لك خلي الموضوع لابوك
التعديل الأخير تم بواسطة daimound22 ; 08-11-2009 الساعة 12:45 AM
السبب: دمج المشاركات
07-11-2009, 11:29 PM
ضوابط المشاركة
العرض الشجري