آخر مره صارت لي مشكله واهي ان بيت عمي ( اهل زوجي ) ساكنين في بيت ابو زوجي ..بس ابو زوجي متوفي من زمان وكل اعمامه طالعين في بيت لحالهم وما باقي غير بيت عمي( ابو زوجي) والبيت قديييييييييييم دزاين أول فقدمو على الحكومة منشان يهدموه ويبنوه لهم من جديد المهم ان كل من اعمام زوجي وعماته يبي حقه يعني لا يرحمون ........ لما كلمهم عمي منشان يشتري حصصهم ما رضو كل من يبي غرفته للعلم ان احوالهم ميسوره ..لكن في بناء البيت من جديد وافقوا.. انا وزوجي ساكنين لحالنا في شقه في منطقه غير منطقتنا المهم لما عمتي وعمي سألوا زوجي اذا يبي الحكومة تبني لنا شقه فوق البيت فرفض زوجي لأنه يدري انه راح يجي يوم واعمامه راح يطالبون بالورث وهم شديدين فهالشي ..المهم في ليلة من الليالي اتصلت اخت زوجي الكبيره واهي الوحيده المتزوجه وفتحت له الموضوع ليش ما يعملو له شقه في بيت الجد اللي بحسبتهم بيت ابوهم فرفض زوجي الامر وتسكر الموضوع ...فيوم من ايام الجمعه كان زوجي معزوم عند بيت والده على الغدا وكانت هناك اخته واقنعته انه يعملو له شقه ويسكن وانه لمتى يجلس بالأجار ولما يسكن خمس ست سنوات راح يجمع كم فلس راح يقدر يستفيد منها وانه لازم يفكر فالمستقبل...المشكله ان انا وزوجي ننتظر بنايه فيها شقق تكمل محجوزه لنا لحتى ننتقل فيها واهي في نفس قرية زوجي ..وعرفنا أن أجارها رخيص نوعا ما ...المهم في النهاية اقتنع زوجي من كثر الدق ( كثر الدق يفك للحام ) واجى زوجي وقال لي ان لما يعملو لنا شقه في بيت الوالد راح نسكنها ليسكتني قال لي منشوفها اذا عجبتنا منسكن واذا لا خلاص ماراح نسكنها ..لكن من طبع زوجي انه دايما يغير آراءه وما يثبت على رأي معين..يعني في احتمال كبيير حتى لو المكان متر في متر بيصر على السكن فأنا من البداية عارضته وصار بيننا شجار وخلص ...في ليله من الليالي واحنا رايحين بيت عمي ألتقينا بأخت زوجي وكانت طالعه من بيت ابوها واهي نفسيتها تعبانه على ما اظن من طريقة تحيتها لي ففتحت معاها الموضوع وسألتها ليش تطلب من زوجي هذا الطلب فقبل لا تتكلم اجى زوجي وقلت لها خلاص سكري الموضوع زوجي اجى واخاف يعصب بعدين بعدين ما شفتها إلا مهتده علي بالكلام انا قلت له عشان لا يدفع طول عمره أجار ووو.....وانا لما شفت ان مامنها أمل بالسكوت تناقشت معاها الموضوع بوجود زوجي فقلت لها انا وزوجي متفقين خلاص فتدخل زوجي بالنقاش وقال لها تدرين ان عمتي متصله لي اليوم العصر تقول ليش ما توزعون الارث لكنها ما ردت عليه وانشغل زوجي بمجيء خالته فقلت لها احنا الحين حاجزين لنا شقه قريب ان شاء الله راح نسكنها لكن لو سكنا في بيت ابوك وتوازعو الارث وين نروح بعد ما تروح علينا الشقه وياخذوها غيرنا وخصوصا هالايام ايام غلى ما نحصل لنا شقه رخيصه وين نروح ليش ما تفكرين في المستقبل لما يطلعونا من البيت تبينا مثلا نجي نسكن معاش في شقتك ما شفتها إلا تغلط علي وتقول اني كل جذي ما تتفاهمين عصبيه وما تحاسبين لغيرك وشايله عمرها وتبكي وهي رايحه شقتها انتبهو لها خالتها وزوجي وهم ما يعرفو شسالفه ولا اني اعرف مستغربه شقلت يخليها تصيح..المهم قام زوجي يصارخ علي ويقول روحي اعتذري لها قلت لها خلني افهمك شسالفه اهي ليش تصيح لكن!! ما قلت لها شي وردد علي اني اروح اعتذر لها بصراخ طبعا انا رفضت لاني ما غلطت فتصل زوجي لها ليفهم منها السالفه ورافض نهائيا يسمع لي وسألها ليش تصيحين فكانت الاجابه إني قلت لها بتخلينا نسكن معاش بشقتك لما يطلعونا اعمامها من البيت ...ما اظن هذا داعي للبكاء ..فطلبت من زوجي إني أكلمها فرفض زوجي لان خايف على مشاعرها فأقنعته اني راح اعتذر لها اذا غلطت فعلا وبالاخير وافق وكلمتها في الموبايل بوجود زوجي وقلت اللي صار من البدايه لحتى يعرف زوجي بالقصه ولما عرف بعد صار اللوم علي ...... اللي تزوجت فيها وقلت له اذا الحين ما سكنت معاكم وجذي هذا اذا سكنت شبسون فيني بتاكلون لحمي ومرت الليله بالشجار والعويل ...

الموضوع صار له تقريبا اسبوع لكن مو قادره انساه او ارجع طبيعيه مع اخته خلاص ..على الرغم من انها بعض الاحيان احسها طيبه لكن فيها صفة الاصرار على الشي إلا تريد يصير إللي في بالها وصراخ زوجي لي لأعتذر منها دايما يتردد مثل الصدا في أذني شنو الحل

تم تعديل العنوان ليتضح المضمون
الإشراف