عاجل جدا^dodi_dabdoobi^زوجي يكرهني (حُلت المشكلة)
السلام عليكم و رحمة الله و بركاته
أعتذر و بشدة على كتابة الموضوع بالعامية و لكن عقلي خلاص ما عاد يجمع
اخوتي أعضاء اسرتي الغالية
أرجوكم اسمعوني للنهاية انا على حافة الانهيار و ح اتجنن خلاص
الحقوني قبل ما قلبي يوقف ولا اطق في وصلتي
عندي مشكلة منكدة عليا عيشتي و اول مرة احس بهذا الاحساس المقرف
احس ان زوجي يكرهني 
ما عدت اهمه خلاص
يا ناس والله كم مرة حاولت اغلط نفسي و اطنش بس من جد خلاص انا متأكده المرة دي مية في المية
نحن متزوجين من 4 سنوات و ربنا ما رزقنا بالذرية و لله الحمد على كل حال
حملت هذي السنة مرتين و اجهضت في اقل من شهرين كأقصى حد
في الاجهاض الأول اكيد زعلنا و الحمد لله راضين بالقضاء و القدر
و الاجهاض الثاني كان قبل اسبوع
و طبعا الحمد لله راضين كل الرضا عن ما كتبه لنا رب العالمين و الحمد لله لكني و زي كل امرأه احتاج حنان زوجي و وقوفه جنبي في هذي المصيبة و لكن اتفاجأت بانه بيتجنب يكلمني او انه يجلس معايا
في اليوم اللي راح يجيب فيه التحليل من المستوصف و عرف من النتيجة ان الحمل توقف رجع البيت و معاه 3 علب بيتزا و تقريبا 5 أفلام ديفيدي و حلويات و مشروبات يلهيني يعرفني اذا ما لقيت من اشكيله احط حري في الاكل
انا بس شفت منظره داخل البيت بهذي الكمية من الاكل عرفت انه بيتجنبني و جاب معاه افلام عشان انشغل عنه و ما يكون في فرصة للكلام او البكاء
كنت اغلي في داخلي براكين و انصدت نفسي و قرفت منه و عرفت انه هوا كمان زعلان و متضايق و فسرت تصرفه بانه بيتجنب الكلام عشان هوا كمان تعبان
طنشت و عديتها و من يومها و انا احاول اتقرب منه مافي فايدة
اذا رجع من الدوام يتفرج تلفزيون و ينام و بعدها يخرج و انا اجاهد عشان ما تغمض عيني و هوا بعيد عني و اذا جا البيت يماطل ما يدخل غرفة النوم الا اذا خلاص ح يطيح من التعب عشان يدخل الغرفة و ينام بسرعة و ما نتكلم
اسبوع و هوا على دا الحال و انا كل يوم ابكي على مخدتي و اقول يمكن يوم الاجازة تنصلح الأمور و يتغير
رتبت اموري و خططت للاجازة و كيف ادلعه و اريحه يمكن يرتاح شوية لكن المفاجأة انه قال لأهله يجو عندنا من مكه و من غير ما يفكر خرج من البيت و راح يشتري اغراض و قاللي جهزي نفسك نطلع البحر نشوي و بعدها عندنا موعد مستشفى للوالد
هذا اول يوم اجازه قلت ماشي ما علينا والله اني اليوم اللي بدأ عندي نزيف الاجهاض و انا في قمة التعب قلت حرام يبغى يفرح اهله و لازم ارضيه و جهزت كل شي و خرجنا مع ان الجو سيئ و اغلب الاغراض ما جابها و حاجات كثيرة كانت تنكد موت لكني ما اشتكيت و انا في قمة الغليان و قلت بكرة اعوضها و ما تستاهل انكد دحين
اهله من العصر عندنا و ما خرجو غير الساعة 1 الليل و انا ميته تعب
تتخيلو قال شكرا او انه قاللي تسلم الايادي او شي
ولاااااااااااااا كلمة
لكنه قال كلمتين خلتني انفجر
بكرة لازم نطلع مكه اهلي يبغونا نطلع !!!!!!!!!!!!!!!
طيب دوبهم كانو عندنا انا ابغى ارتاح دخيلك ريحني شوية انا عندي نزيف و اهلك في الدور التالت و ما عندهم مصعد و انا مرة تعبانه
قالللي طيب نوديكي مستشفى يعني ؟؟؟
سكت و قلت لا ما يحتاج شكرا
اتخيلت انه يقول شي يخفف عني قرف الاسبوع اللي فات لكن عينه ما انشالت عن التلفزيون طول الوقت و لما قرر ينام دخل منهار على السرير
قلتله حبيبي انا تعبانه مرة
قاللي طيب خلاص بكرة اوديكي للدكتور
قلتله خلاص ما يحتاج
قال طيب اش اسويلك يعني تعبانه اش تبغي ؟؟
قلت ولا شي شكرا
بعدها اتدلعت عليه و قلتله طيب حط يدك علي ظهري و اقرا عليا
ما رد
كررت طلبي بألم حط يده اليسار (اللي قريبه مني ) عشان يسكتني و لا قري عليا ولا شي
انا عصبت عالآخر و اتذكرت يوم يمرض اعامله زي الاطفال من ادوية و تدليك و احضان و اقرا عليه طول الوقت
و انا لما تعبت بسببه يرمي يده على ظهري بكل استهبال و استفزاز
لا شعوريا مديت يدي و مسكت ايده و رميتها ناحيته و انا ابكي من القهر
قلب وجهه على الناحية التانية و خ خ خ خ خ
و انا انتفض من القهر و البكا
و من وقتها و الدموع شلالات و الله ماني قادرة اوقف بكا
تركت الغرفة بعد ما نام و اعطاني ظهره
و انا عارفة اني بكرة ح اكل هوا ولا حيغير فيه شي
احس قلبه صار حجر و قسي
و وجود اهله بيعمل منه انسان تاني و كأني اول مرة اعرفه
ياناس والله ادلعه و اقدره و احترمه و خصوصا الفترة الاخيرة ما تنزل كلمته الارض و قدام اهله او بدونهم و هوا في عيني بس احسه و باختصار صار
يكرهني
هذا مستحيل يكون زوجي
بكرة ان شاء الله اطلع مكه بس على بيت اهلي افكر في وضعي و حياتي مع زوج يتمنى وجود اطفال بأقصى سرعة
سامحوني يمكن تقلت عليكم بس من حبي لكم حبيت افضفض لكم
و ما ادري
يمكن اودع عالمكم
عالم المتزوجين ؟؟؟
الحمد لله على كل حال
__________________
رب لا تذرني فردا و انت خير الوارثين
25-11-2008, 05:29 AM
ضوابط المشاركة
العرض الشجري