بسم الله الرحمن الرحيم


السلام عليكم ورحمه الله وبركاته


بما اني راح اتكلم عن موضوع يخصني اتمنى منكم ردود سليمه لان الموضوع متعلق اساسا بمستقبل اطفالي

انا ام وكما تعرفون مطلقه ولي حدود العشره اشهر ماشفت اولادي ولا كلمتهم الا يمكن اربع مرات

من راحوا

عندي اكثر من مشكله واتمنى ان تسعادوني في حلها لاني وللاسف من النوع الي اتاثر بااراء من حولي


وانتم اخوه جميعا لي

ويمكن بعض منكم عاش بين ام واب منفصلين وش كان موقف ورده فعله وتمنى من امه تسويله في حال منع منها


البعض يعرف تفاصيل مشكلتي ولا اتمنى ارجع اعيدها هنا لان من المشاكل الي ابغى انساها حياتي السابقه


الاشياء الي اتمنى تساعدوني فيها


اولا: للاسف قلبي من شهر ونص صار قلبي اسود وصرت حاقده حقد غير طبيعي على طليقي واهله والسبب

انهم حرموني من اولادي وحصلت اكثر من سالفه والبعض يتذكر موضعي الي كتبته في الفتره الي عدت

لمى تحطمت انهم ماراح يجون واناكنت موعوده ومتامله خير

وربي اني صرت لمى افطرر اقول ما بدعي بسؤ ولكن لا شعوريا وانا اشوف الكل ملتم ولمى االاهل يزورونا

ومعاهم اولادهم ويسالوا عن اولادي على طول ادعي بكلمه حسبي الله ونعم الوكيل فيهم

مدري ماصرت اتمنى لهم الا كل سوء وربي ماكنت كذا ابد حتى بعد طلاقي سامحته على كل شي سواه

فيني بس هالحين ماني قادره اقرى مواضيع بخصوص تطهير النفوس اخوي الكبير دائما ينصحني ويقولي سامحي وانسي بس موقادره

اعرف اجر من عفى وسامح واتمنى بس بجد تعبت احس اني تغيرت مره مني قادره ادعي حتى ان الله يحنن قلبه عليهم

وحده من فتره بسيطه قالتي الله يهديه لان اذا الله هداه بيرد لك اولادك لاشعوريا قلت الله لايهديه ولايصلحه

مع اني ما اعرفها ذيك المعرفه استغربت من ردي وانا استغربت من انفعالي


ثانيا: احنا في رمضان ورمضان بركه واملي بالله عزوجل انهم راح يعيدوا عندي بحول الله وقوته

لو جابوهم يوم واخذوهم ؟؟؟هنا وش اسوي

او ماجابوهم وبدت الدراسه هنا وش اسوي برضوه؟؟؟

بيكون عيد ومحد فاضي لاحد وبعدها دراسه وحتى هنا بالمنتدى يمكن محد يرد لو سالت في العيد

اخوي الكبير يقول بنقدر والوالد برضوه بس اخوي يقولي لاتستعجلي مصيرهم يكبروا ويجوك

لانا لو رفعنا قضيه بيكبروا اولادك ويكرهوا جدهم واخوالهم

ونفس الشي محتاره وش القضيه الي ارفعها زياره والا اخذهم على طول ؟؟؟

لو زياره مو معقوله كل ما ابغاهم اروح للمحكمه وارفع وتبدا الجلسات بتخلص الاجازات واحنا بقضايا!!!!

ولو حضانه على طول اعرفه بيسوي حركات جنان وياخذهم من المدرسه وما راح يصرف ولايسال فيهم!!!!

كل شي متوقع ل

صحيح يحبهم ومتطمنه عليهم ولكني عارفه انه راميهم على اهله ويسافر ويروح ويرجع يعني عايشين بدون ام وشبه اب


يمكن اكون عجوله واستبق الاحداث بس والله من تعبي وبعدهم عني مني قادره حتى اتكلم مع اهلي

ولاحتى انزل دمعه قدامهم وربي رحمت ابوي من تزوجت انا بالذات وقلبه علي ماكان مطمن وهالحين محروق علي


بعض الاحيان اقول اتوكل على الله وحده واتركهم وطنش الموضوع والجاء لله عزوجل ومتى يبغى يجيبهم يجيبهم

بس عارفتهم يحبوا يامروا الناس وممكن يتحكم في الزياره ويتشرط فيها

وبعض الاحيان اقول ماضاع حق وراه مطالب \


ثالثا: صار الي صار من مشاكل بيننا انا ما اتمنى اولادي يعرفوا بالماضي وخصوصا ان الاولاد يتاثروا بسمعة

ابوهم وهذي نقطه دائما افكر فيها ولكن موضوع الدكتور سطام فتح عيني عليها

وش المفروض نتخذه بعد ماطلع الكلام من ناحيتي اتمنى اني ما اجيب طاري ابوهم لهم بسوء لمى يكبروا

بس ما اوعد نفسي لاني لو حرمت منهم راح يزيد قهري منه ويمكن ادعي عليه بيوم قدامهم


شي اخير: :

لمى نسولف مع اي احد لو جبنا طاري حياتنا السابقه مثلا موقف حصل او انا واولادي مع ابوهم

مجرد سوالف فقط هل هذا الشي غلط ويخلي الناس تنتقد يعني اعتبرها حياه عدت ومافيها شي لو ذكرنا

بعض المواقف زي لمى كنا بالمدرسه نتذكر مواقف ونسولف فيها

اتمنى ردود وبعقلانيه وبدون تجريح في الموضع

لاتقولوا دخلوا رجال لانهم مايقدروا ابد

بجد ابغى اريح مخي من هالسالفه واعرف وش امشي عليه علشان اكمل صيامي وانا مرتاحه


اسفه على الاطاله واشغلتكم معاي

ولكن جزاكم الله جميعا الف خير على وقفاتكم ودعواتكم

__________________