السلام عليكم00

بعد ماتملكت00 وكل ماجلست مع قريبة مع صديقة مع ناس يحبوني ويهتمون بمصلحتي
نصحوني بنصائح كانت تعجبني جدا واتخيل اليوم اللي يجي واطبقها

شوفو وش قالو لي:

- اعطيه فكرة انك ماتشترين الا الغالي والفخم عشان يتعود عليك وكل مارفض لك شي تشرينه ازعلي وابكي

- دايم ازعلي عشان يراضيك00 و لاتتأسفي منه مباشرة ترى بيتعود

- مرة استأذني عند الخروج ومرة لا عشان يتعود ان لك راي وحرية شخصية

- اظهري لك حبه وانك ميتة عليه وان ماعندك بهالدنيا سواه قولي له انت اهلي وابوي وامي كل الرجال يحسون بالسعادة لما يشوفون زوجاتهم
يحبونهم وانهم بدونهم ولاشي

- روحي لصديقاتك واذا رفض ازعلي منه حتى يراضيك ويطلعك

- مرة سوي غداء ومرتين لا تدلعي وقولي تعبانة عشان يتعود على المطاعم

- اذا رفع صوته عليك لاتنامين معاه بالغرفة خلي يحس بقوتك وشخصيتك لين يجي يراضيك

- كل شوي اطلبي منه انك تروحين معاه لأي مكان المهم روحي معه

- كل ماطلع دقي كل شوي وينك فيه؟ جالس مع من؟ ومتى تجي؟ وش تسوي؟
بيني له انك تحبينه وتهتمين فيه

- كل ماشاف وحدة حلوة بالتلفزيون او شاف وحدة بالشارع ازعلي وابكي

- استغلي كل طلعة معاه واشتري اي شي تبغينه المهم عوديه على الصرف

- كل مازعلك قولي ابي بيت اهلي عشان يخاف ومايتعودها

- دلعيه و24 ساعة مدحيه خليه الرجل الوسيم الجميل اللي مامثله احد ولاتمدحين نفسك كثير عشان مايقول هذي مغرورة وشايفة حالها!!

- خلك قوية عشان يكون لك هيبة عنده وعند اهله




تزوجت 00 بداية زواجي كنت صامتة خايفة كل ماسألني سؤال او رأي او اي شي
كان ردي واحد : على راحتك - بكيفك- عادي

في هالفترة درست زوجي ودرست افكاره ومتطلباته بالإضافة اني استفدت من النت كثير وتركت النصائح اعلاه تماما وطبقت نصائح من افكاري انا ههههههههه افكار شوبارد
ع فكرة الرجال يختفلون في طباعهم لكن بشكل عام النصائح هذي مفيدة لأني نصحت فيها غيري وطبقها وطلعت النتائج ايجابية:

1- كوني مطيعة خلي على لسانك : سم- ابشر - من عيوني - ان شاءالله

2- اي موضوع تتنا قشون فيه لاتكونين دائما تابعة له خلي عندك رأي وشخصية ماهو غلط ولاحرام لكن اذا شفتيه مقتنع بوجهة نظره ولايمكن يغيرها قولي وجهة نظر مقبولة معك حق وبس!
ع فكرة انا عن نفسي ماحب المرأة تكون تابعة ومنقادة لزوجها بشكل كبير يمكن الرجل يستغلها شوي

الوسط حلو في كل شي!

3- دلعيه وقولي له كلام حلو وامدحيه00 في المقابل امدحي نفسك وقولي له عن كلام الناس ومدحهم لك00 الرجل يحب المرأة الواثقة من نفسها ويفرح كثير لما تقولين له اليوم قالو عني حلوة او شعري حلو
حتى لو مواثقة بحالك كثير اكذبي كذبة وصدقيها الرجال مثل الأطفال!

4- اظهري له حبك لكن لاتبينين انه هو الوحيد بهالدنيا بيني له انه فيه كثير احباب لكن هو اغلاهم
( بعض الرجال يستغل فرص ويحاول يضعف زوجته)

5- فعلا عوديه على الصرفية في البيت لكن بالتدريج وبدون زن ولامضايقات وحاولي تساعدينه في امور بسيطة جدا اذا كنتي موظفة


6- لاتطلعين من البيت الا وانت مستأذنة حسسيه برجولته وانه وليك وماتطلعين الا بشوره

7- لاتجيبين كلمة ودني لأهلي ولاتتعودينها حسسي نفسك وزوجك انه بيتك وحياتك ومملكتك هي بيتك وبس بتعلقينه فيك كثير

8- اذا هو غلط عليك لاتراضينه ابد واذا ماراضاك هو ابدي بالتلميح
واذا انت زعلتيه على طول راضيه
حاولي ان زعلكم مايطول ابدا عشان ماتتعودون على الزعل

9- سوي له اكله ولاتتكاسلين الرجل يحس بسعادة لما ياكل من زوجته ولما يشوفها تعبت عشانه اللهم اذا كنتي تعبانة لاتسوين او اذا فيه اتفاق بينكم قبل

10- لاتزعجينه لما يطلع من البيت باتصالاتك كل شوي واسئلتك حسسيه انك واثقة فيه حتى لو مواثقة المهم اعطيه الحرية وحلو لما ا لزوجين يبعدون عن بعض شوي عشان مايملون

11- خلك نعومة وانثى بكل ماتحمله هالكلمة الرجل يعشق النعومة وتتتغير افكاره معها
اذا بتطلبين طلب وحاسة انه بيرفض قربي له بريحة حلوة ولبس نعوم وبوسة وضمة وحركات بسيطة وحسسيه برجولته قولي حبيبي بطلب منط طلب بس لاتردني
بيسوي فيها عنتر بيقوول وشو ههههههههه قولي كذا كذا
بيقول لا قلت لك ماحب هالامور قولي عشاني ياحياتي طلبتك وعلى طول بإذن الله تعالى
امرك مستجاب


12- اذا انت ودك بأي شي طلعة لصديقات او مطعم اوغيره اطلبي منه لكن اختاري الاوقات الحلوة والمناسبة

13- خلك معاه مثل مايحب ودايم اسأليه وش تحب وش تبغى مني
نصيحة لوجه الله
كل ليلة قبل النوم قربي عنده قولي حبيبي راضي علي؟
وشوفي هالكلمة شلون تأثيرها عليه
والله بيصير لك مثل ماتبغين



واذا تذكرت شي راجعة لكم
اتمنى استفدتو من خبرتي المتواضعة
لاتنسوني من دعواتكم ان الله يرزقني الذرية الصالحة

__________________
اللهم لك الحمد والشكر
"ولئن شكرتم لأزيدنكم"