أرجوكم ساعدوني.....
السلام عليكم ورحمة الله وبركاته ...
اخواني واخواتي ...
ممكن ادخل بالموضوع بدون مقدمات ... لاني محطمة نفسيا ومتدايقة كتتير ونفسي اشكي لحدة همي وما يسير ينظّر علي او يصرخ علي ...
ممكن تستحملوني .. وتساعدوني ... وتنصحوني ... انا فعلا تعبانة .... وحاسة راسة رح ينفجر من التفكير ...
وبعتذر عن طول الموضوع ... قبل ما ابدا ...
ورح اكون صريحة واحكي كل اللي بقلبي ... وكأني بحكي مع حالي ... فارجوكم ... لا تطلقو علي الاحكام وتتهموني بالغرور او اي صفات اخرى ... انا بس بدي افضضفض ... والاقي حل يريحني ... استحملوني
انابنت اتخرجت من الجامعة السنة ، دارسة هندسة ، والحمدلله تخصصي مطلوب كتير ، واول ما تخرجت توظفت ، وبراتب منيح كتير ...
المهم انا الحمدلله على قدر عالي من الجمال والدين والاخلاق ، ومن عائلة مستواها الاجتماعي عالي ، ووضعها المادي جيد جدا ... ( ارجوكم لا تحكو مغرورة ... انا والله عمري ما كنت مغرورة غير باخلاقي وديني ...)
المهم ...
قبل ما انهي دراستي تقدم لخطبتي عدد كبيير جدا من الشباب كل واحد احسن من التاني ، جميعهم على مستوى من الاخلاق والدين والعلم ومن عائلة محترمة ... بس انا كانت دراستي صعبة كتتير فما كنت قابلة ارتبط قبل ما اتخرج ...
المهم ... بعد ما تخرجت باسبوع تقدم لخطبتي شاب ... طبيب ، ومن عائله متواضعه جدا ، ووضعه الاجتماعي والمادي اقل مني ومن كل اللي تقدمولي قبله بكثير ...
طبعا انا بالبداية كنت رافضة فكرة اني ارتبطت بطبيب نهائيا ... بسبب طبيعة عملهم المتعبة نومهم خارج البيت ... المهم اهلي اقنعوني واصرو انه انا اشوف الشب وبعدين ارفض او اقبل ... وفعلا شفت الشب ، وما بعرف كيف مشي الموضوع بسرعة ووافقنا وقرأنا الفاتحة ... وكان موعد كتب الكتاب بعد اسبوعين ... وطبعا بهاي الفترة كنا نحكي مع بعض بالتلفون ...
والمشكلة بتبلش من هون ... انا كنت اكون مبسوطة وانا عم بحكي معاه .. بس قبل كتب الكتاب بكم يوم صرت احس انه مش الانسان اللي بيناسبني .. وانه حتى اقل من المستوى الديني اللي كنت افكره فيه ، بمعنى انه انا تنازلت عن كل الامور المادية والاجتماعية عشان اخلاقه ودينه اللي طلعه اقل مما كنت فاهمه بكتيير ، يعني دينه لا يتعدى الالتزام بالفروض الرئيسية ، علما انه انا ملتزمة كتتير ...
وبعدين بلشت تصيير مشاكل مادية ... .وبلشت احس كم انا رح اتغلب ماديا بالعيشة معاه ...
ويوم كتب الكتاب ... صرت ابكي واحكي لاهلي انه انا خلص ما بدي اياه ... وطبعا اهلي صارو يصرخو علي وفكروني بتدلل ... واجى المأذون ... وكتب الكتاب وطلع ...
قلبي ارتاح شوي ... بس بعد كم يوم رجعت اعاني من نفس المشكلة ...
يعني الملخص انه انا خايفة اعيش طول عمري بحسرة وندم انه انا كان ممكن اعيش حياة احسن من هيك بكتير ... مش بس على الصعيد المادي بل والديني والاجتماعي ...
ع فكرة انا ما بكره خطيبي ، بس كمان ما بستلطفه ... ولا بحب اشوف او بالاحرى ما بتفرق معي اذا شفته او حكيت معه او لا ...
وهلا شو اعمل ... هل اتركه لاني ممكن اكون بظلمه وبظلم حالي ...
صحيح ... 
انا اكتر شي معقدني انه بيحسسني من كلامه انه انا المحظوظة اللي هو قبل فيه ...
وبصراحه كلامه بيدل على انه انا ما كنت الاولى بحياته ، وانا كان كل طلبي من ربنا انه ارتبط بانسان انا الاولى بحياته مثل ما هو الاول بحياتي ...
وكمان اتضح انه كتير مهتم بموضوع وظيفتي ، عشان يعني اساعده بمصروف البيت ، علما انه انا كنت مفكرة استخدم راتبي حتى اكمل دراسات عليا ... يعني طموحي كله راح
ساعدوني الله يخليكم ، بشو بتنصحوني .. انا خايفة اضل عايشة بعقدت الندم طول حياتي ... ولا تنسو المجتمع ونظرته للبنت اللي كانت خاطبة وتركت ...
بستنا نصائحكم على احر من الجمر
والله يجزيكم الخير
التعديل الأخير تم بواسطة حرم فلان فلاني ; 21-08-2007 الساعة 08:30 PM
21-08-2007, 04:02 PM
ضوابط المشاركة
العرض الشجري