اهلا عزيزتي..
كان الله بعونك وبصراحة انا ماني مع الأخوات اللي هونوا من أثر هالكلمة بصراحة فعلا ترجح ومشكلة انها تكرر دائم!!
بصراحة موقف صعب..
لكن مو هذي القضية.. القضية ان موضوع الطلاق جدا جدا صعب ومهو خيار سهل
وانا ما ألومك تحلمين في بيت هادئ مقتنعة انه بيتك لطول العمر وو الخ لكن معليش لمصلحتك ومصلحة الاولاد خليها توقف عند الحلم!
بعدين اختي أنا ما أدري بس هل انتِ من النوع العصبي؟
يعني في توتر دائم بالبيت ومشاكل؟!
هل انت تنقدينه في شخصيته او حياتك معاه؟ مثل يالله وش هالعيشة...ملّيت...الخ..
اذا تصدر منك هالكلمات ترى لها دور حتى لو كانت من زمان! كونها سمعها منك! خذاها فرصة كل ما صارت مشكلة قالك يالله عاجبك والا اطلعي!!
لان موقفه انه اخذ الاولاد ومشاهم ورجع يدل على انه يبغى يحسسك انه مو محتاجك!
مع ان تصرفه هذا يدل على انه حريص على استمرار العلاقة!
شوفي اختي انتي اعرف بحياتك..
بس اذا انت متأكدة ان زوجك يحبك او مرتاح معاك عموما او مهتم بالأطفال ويحبهم فمعنى هذا ان كلامه هذا مجرد عصبية وتنفيس عن مشاكله هو..
وذا انت حريصة على حياتك فعلا وما ودك تخسرين زوجك كشخص بغض النظر عن عصبيته هذي فاسمعي مني! لانه صدقيني ما فيه أبدا انسان كامل وكل هالناس اللي تشوفينهم عايشين سعادة خيالية إلا ما تلقين في حياتهم مشاكل مملة وصعبة وكبيرة بس يطنشون يوم وينبسطون يوم ويتطاقون يوم!!
صدقيني أعرف كثير حياتها مثالية لأقصى درجة وواضح أن زوجها يموت فيها مرة مرة وهي بعد تموت في زوجها تحكي عن مواقف كثييييييييييييييرة!!! صارت بينهم تقول خلاص جهزت شنطتي بروح أهلي!! يعني مو مرة ثنيتن لا كثييييييييييرة!! ورغم كذا ترجع المواقف تتغير وترجع بعد كم يوم يطلعون مع بعض طلعة حلوة وينسون ذيك اللحظة!!
يا اخيت ما أحد عايش سعيد ومرتاح وكل انشان عنده ظروف صعبة.. لكن الانسان الناجح اللي قدر يتجاوزها!
معليش اختي جربي هالخطة وتحملي صعوبتها وبإذن الله راح تلقين فرق!
حاولي تهدين الوضع الآن خليه على راحته ولا حتى تتكلمين معاه او تفتحين معاه موضوع الا للأشياء الضرورية لكن اذا هو بدا حاولي شوي شوي تهدين الوضع وتدخلين في السالفة.. بعد كذا كل ما شفتيه عصّب ابعدي عن المشكلة طنشيها لا تحتدين في النقاش حتى لو طلبتي شي من حقك ورفض معليش كلميه بس بدون مشاكل! يعني بهدوء ونقاش عقلاني!! معليش اعرف ما راح يستجيب بس كلميه بعقلانية ولو سمحت وممكن اعرف المانع ووو بعد فترة راح يهدا هو ويحقق لك طلبك..
اذا لقى ان الوضع استمر بهالشكل ومافيه مشاكل ولا توتر راح يستغرب!! وهذي اللحظة اللي نبيها!
نبيه يستغرب ايش اللي صار؟!! المراة تغيرت!!
راح تلقينه يتعامل معك بحذر وشوي شوي راح يسأل ويناقش يبغى يشوف وش وراك ممكن بعد كذا تفتحين معاه الموضوع وتقولين له ان مثل هالكلمة ممكن تخليك في لحظة غضب تسوينها وفعلا تروحين بيت أهلك والضحية هم الأطفال.. وو
اعرف طولت عليك! بس م الوقت راح تلاحظين اني دائم كذا (كلامي كثير! )
بالتوفيق