بسم الله نبدأ الموضوع ..

أولا .. هذي مشكلة وحدة مسيكينة اتصيرلي .. لا تخافون من المحارم .. و هي نوعها ملتزمة .. تعرفت هي على احد الناس الصالحين من المنتديات .. و هو ايضا ملتزم من مواضيعه و طريقة ردوده و يبين عليه حسب كلامها .. اول شي منتدى .. بعدها ضافها بالماسنجر ، و هي ما تحب تكلم شباب و على طول تحذفهم من ماسنجرها و اتحط عليهم حظر block .. و لكن هالشاب قبلت الاضافة و تبي تشوف من باب الفضول وش يبي ؟ .. عقبها طلع انه هو معاها في نفس الكلية بالجامعة و كان يبغى يسألها عن التسجيل و ذلك لأنهم توهم داخلين الجامعة يعني صغار اولى جامعة .. و كل واحد ارتاح للثاني و قاموا يتكلمون بالماسنجر و يتناصحون فيما بينهم .. وصلت علاقهم الى انهم يتكلمون بالهاتف .. و هم ترى على كلامها انهم ملتزمين كثير يعني ما عندهم سوالف احبك وتحبني و غرام و و و .. لا بس النصح و مع السلامة .. يوقظها لصلاة الفجر و هي كذلك .. بعدها شافوا بعض بالكلية في الجامعة (ما هي بالسعودية) .. و حبوا بعض و لازم يتصلون على بعض كل يوم .. هي خافت من الفتنة و والله انا اعرف البنت زين تراها ملتزمة صحيح مو بس كلام .. و اهو كان يعتبرها اخته و هي تعتبره اخوها .. بس ايش تعمل خافت من الفتنة و غضب الله ! .. فا قالت له انه يا خوي ترى انا خايفة انه اللي نعمله حرام .. قال لها : ليييه ! احنا ما نكلم بعض مثل ما يكلم الشباب الطايش مع البنات الهابطات ! كل اللي بيننا اخوة في الله و لا يوجد سوالف طايشة و هابطة ! .. الصراحة بيني و بينكم البنت قالتلي انها تحبه و ما تقدر على فراقه ، و لكن ما تبي ان الله يغضب عليها .. و تخاف من الفتنة .. و هي نوعها تسمع محاضرات بالأشرطة و تحضر محاضرات .. فا كثير سمعت من المحاضرات بما معناته انه اللي يدخل قلبك من فنتة أو انك تحسين بالفتنة من شخص معين فا هذا معناته حرام و عليك ان تقفي من هذا .. هي الجملة ماهي كذا و لكن ما عرفت اشرح لكم .. و كل ما تسمع هالكلام تتقطع من داخل لأنها تتذكر ذلك الشاب اللي تحبه .. ودها تقوووله يا ولد تراني احبك !! .. بس طبعا تستحي .. و هي تحس ان يحبها .. فا ليتكم تساعدونها .. اول ما قالتلي السالفة الصراحة انصدمت كيف بنت ملتزمة تكلم شاب ملتزم بالتلفون ! .. و لكن لأنني اعرفها ملتزمة بشكل رائع و خلوقة .. فا رق قلبي لمشكلتها .. لييييييتكم تساعدووونها .. و جزاكم الله جنة الفردوس و بارك الله فيكم .. جعله الله في ميزان حسناتكم .. و من فرج عن مسلم كربة فرج الله عنه كربة من كرب يوم القيامة .. الله يفرج عنكم كرب يوم القيامة اللهم آمين ..

و السلام خير ختام .. السلام عليكم و رحمة الله وبركاته

(( آسف على الإطالة ))