السلام عليكم ورحمة الله وبركاته
أتمنى أن الجميع يكون بصحة وعافية والله يعيننا ويعينكم على اغتنام هذه الأيام الفضيلة.
أطرح موضوعي وأنا راغبة بالإستفادة من خبراتكم الطيبة بارك الله فيكم.
قبل أيام من زعل زوجي كان معاي العذر الشرعي وخلال ما كنت معذورة كنت أريحه بطريقة أخرى_بالحلال أكيد_ اليوم اللي طهرت فيه كانت أختي مكلمتني بتجيب عيالها عندي بعد العصر لإنها رايحة المشفى_للمعلومية ثلاث أطفال صغار لأختي مع ثلاث أطفالي صغار يعني ما يتركون وحدهم_ يومها زوجي جاي من العمل مهدود حيله تغدينا ودخل ينام من الإرهاق دخلت الغرفة وهو يا الله يفتح عيونه فطلب العلاقة فوضحت له إنهم الحين جايين بالأطفال وأنا أساسا بلغته من قبل الغداء قالي إنت تتهربين!! قلت ما أتهرب وحاولت أبين له إني مشتاقة له بس الحين بيطبون علينا ما راح نأخذ راحتنا ولما شفته زعل طاوعته وبس بدأنا بالمقدمات دق الجرس فاضطريت أقوم وشفته لبس ونام فحسبته خلاص تفهم وقدر الوضع جلست مع الأطفال يمكن حدود ربع ساعة وبعدها قمت أغتسلت أتفاجأ بعد ما أطلع إنه زعلان يقول دقيت عليك الباب قلتله والله ما سمعتك وش قلت وضحت له مبرري إني لما شفته لبس ونام إنه نام صدق وهو أبدا مو مقتنع جيت أراضيه بعد ما طلعوا وأحضنه يدفعني بزعل ويقول شكرا ماأبغى وطبعا حتى يبين مدى زعله قطع سلك النت عن البيت 🙂 طيب ياعيني زعلان مقدرة والله بس النت وش ذنبه المسكين!! الله يصلحه بس، وبالليل شال مخدته ولحافه ونام مع عياله هههههههه مكيف العيال خربان من أسبوعين والجو حاااار بالغرفة وكم مره نطلبه يصلحه ويقول طيب الشيء اللي استفدته من نومته عندهم إنه صلح مكيفهم اليوم الثاني 😅 وللحين معتصم بنومته مع عياله له ثلاث أيام طبعا ما كلمته فيهم حتى يهدأ... وشلون أراضيه بطريقة صحيحة وجزاكم الله خير.