السلام عليكم ورحمة الله وبركاته
بونجور يا ملكات 💖💞💖
ان شاءالله الكل بيكون بخير
اليوم جايبتلكن وصفة حلويات معروفة ومشهورة خاصة بشهر رمضان
والاغلبية بحبوها والمعروف عنها انها بتنعمل اكتر شي بالفستق الحلبي
فانا حبيت غير شوي واستعمل اللوز بدل الفستق الحلبي
وطبعا ما حدا بيقدر ينافس الفستق الحلبي ان كان بالشكل او بالطعمة
ولكن لا بد من التغيير وقتل الروتين 😁😁😁😁😁

اول شي هالصورة من ارشيفي الخاص فاتفضلوا خدوا كم قطعة لكون فتت عالمطبخ وبلشت بتحضير وصفتنا لليوم



المكونات متل ما شايفين بالصورة



كوب سميدة
2ملعقة طعام زبدة
2كوب لوز مطحون (او فستق حلبي مطحون)
نصف كوب سكر
نصف كوب حليب
ماء ورد - ماء زهر

وكيلو قشطة طازة وقلوبات للتزيين (كاجو -لوز - فستق حلبي )

وقطر لوقت التقديم



اول خطوة بنحط بمقلاة كوب السميدة مع ملعقتين زبدة



وهون متل ما شايفين بالصورة بنحرك السميدة مع الزبدة ليصير لونهن ذهبي




بنرجع بنضيف السكر والحليب وبنستمر بتحريك المزيج ليصير متجانس
بنطفئ النار

وبنضيف كوبان اللوز المطحون او (الفستق الحلبي)
وبنتركهن ليبردوا



ومن بعد ما يبردوا بنرجع نضفلهن ماء ورد وماء زهر وبنعجن الخليط ليصير عنا عجينة متماسكة وبنمدها باي شكل بنريده



وبنضيف القشطة على العجينة




بما انو ما في عنا قشطة للحلويات العربية
فأنا عملت القشطة بالبيت
استعملت 4ليتر حليب سائل
و3/4كوب خل او عصير حامض




قبل ما يغلي الحليب بضيف العصير الحامض او الخل
وبنحركهن شوي
فبينفصل الحليب عن الماي وبنصفيهن
وبيعطينا هيدي القشطة متل ما شايفين بالصورة
ان كانت الكمية كافية بس بستخدم القشطة لوحدها
وان كانت قليلة بضفلها علبة ماسكربوني
بس الطعمة نفس طعمة القشطة الطازة اللي بنشتريها من المحلات

ونزينها بقلوبات محمصة على وجهها
بس انا ما كان عندي متوفر بالبيت فاستعملت الفستق الحلبي



ووقت التقديم بنرش عالوجه قطر حسب ما بنحب
مقادير القطر
2كوب سكر
3/4كوب ماء
1/4كوب ماءورد وماز زهر
عصرة حامض (بنوضعها قبل مل نطفي بدقيقتين )



وهيدا الطبق عملت قطعة بالفستق الحلبي




وانتظرونا مع وصفة تانية وكتير طيبة (حلاوة الجبن)

رمضان كريم عالجميع

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه