ملاحظة سريعة :

زوجة اخوي التانية .. اقصد اخوي التاني

.
.

فاكهة ..

فعلا أقدس العلاقات الاسرية ..
و احس و انا بأكتب غصب عني ..
فيه شي بداخلي مثل الموية الباردة .. تنكب على قلبي و على الجروح الي صابتني و تعالجها بشكل سحري !

تدري قبل امي تموت الله يرحمها و وصلت للمراحل الاخيرة
قالت لي :
اختك هذه انا غضبانة عليها ليوم القيامة .. قلبي غضبان عليها ..
لانها تعامل امي بقسوة ..

مع اني جلست مع اختي مرة و كلمتها و قلت لها :
ماما ما راح تعيش كثير ،، اقولها لك على بلاطة و بصريح العبارة ..
تحملي و اصبري الي يجيك منها .. كلنا نصبر و نتحمّل

قلت لها ..
ترى عصبيتها و قسوتها بسبب الكيماوي ..
نحن مع الزكمة و الصداع شوفي نفسيتنا كيف تصير !

سكتتتتتتت اختي و ردت بالاخير ..
( الناس قدرات و طاقات .. و انا هذه هي طاقتي )

.
.

المهم .. لما قاطعتني و رفضت انها تسلم علي و اخوي قالي مالي دخل فيها و لا ادخل غرفتها
ولا أكلمها و لا اسلم عليها ..

و لما سمعت امي قالت انها غضبانة عليها و انا عارفة انه امي ما راح تعيش كثير ..
كلمت امي و قلت لها ادعي لها .. و انت تقسي عليها كثير .. و هي مالها احد ووووو الخ ..
المهم جلست اهدي امي

( الكلام هذا .. ماحد يعرف عنه منهم ابدا و لا عمري قلت لهم .. لانه ماله داعي )

انا عارفة انه امي ما راح تعيش كثير خلاص و حالتها كانت تزيد سوء يوم عن يوم ..
( ملاحظة : الفترة هذه كنت حامل بولدي الوسطاني .. و قالت الدكتورة عشان كذا هو عصبي و عنيد حاليا و متعبني.. لاني انضغطت نفسيا و كتمممممممت بنفسي )

رحت كلمت اختي الكبيرة و قلت لها ..
ترى ماما قالت كذا .. و انا خايفة يصير شي في امي و تروح و هي غضبانة عليها و تخسر دنيتها و آخرتها
انصحي فلانة باي طريقة .. انها تكسب رضا امي و هي ما راح تعيش كثير ..
و امي قالت نفس الكلام لأختي الكبيرة انها غضبانة على أختنا هذه الي اصغر مني ..
يعني ما جبت كلام من راسي ..
.
.

الحمدلله .. اخر أسبوعين او اخر شهر .. و قبل لا امي تتوفى الله يرحمها
خدمتها اختي هذه ( من كل قلبها الصراحة و الكل يشهد بكذا ) ..

وقتها امي قالت لأختي الكبيرة ..
انا راضية عنها خلاص .. <--- قلب الام فعلا"

.
.

ابغى أوضح الفرق بين تصرفي و تصرفهم ..

امي كانت تقول لي اني مستودع اسرارها ..
و قبل لا تتوفى بكم يوم .. سألتها ( ماما راضية علي ) ؟ و عيوني مليانة دموع و انا مغطية وجهي خارجة رايحة بيتي
عشان كنت بفترة نفاس و ولدي يبكي ما يخليها تنام ..
اشرت لي برأسها .. ايوة ..


بعد ما امي توفت الله يرحمها
جات هذيك شرشبيل .. و اختي هذه

قالوا اصلا امي ماتت غضبانة عليك
و كويس ربي كشفك قدامها قبل لا تموت .. و عرفتك على حقيقتك قبل لا تموت
و انت عملتي كذا و عملتي كذا و عملتي كذا

صارت تحاسبني على افعال صدرت بشكل عفوي ..
مثلا لما كنت اجي اشوف امي و اروح اجلس في غرفة تانية

طيب ولدي عمره لسى اقل من 40 يوم و يبكي و يرضع رضاعة طبيعية
كنت اخده غرفة تانية اسكته لأنهم يقولوا ما يبغوا ازعاج

زي كذا كانت تمسك علي اي شي
و من راسها تقول امي غضبانة علي و تتشمت و مبسوطة
على بالها امي ماتت غضبانة علي

استغربت منها
قلتلها : مو انتوا الي كنتوا تقولوا زمان
ماما تحبك انت و بس !!!!!!؟
فجاة قلبتوا دحين !

ردت علي قدام الكل :
ربي كشفك اخيرا على حقيقتك قدام امي و عرفت حقيقتنا كلنا
و ماتت و هي غضبانة عليك ..

الحمدلله انه ربي ألهمني اسال امي قبل لا تموت الله يرحمها
ماما انت راضية عني ؟
و اشرت لي برأسها ( ايوة ) و بست يدها و خرجت

.
.

طيب لو اختي تحبّني فعلا ..
كانت نصحتني قبل لا امي تموت .. لو فعلا مثل ماهي جالسة تتبلى علي
كانت نصحتني اكسب رضا امي لو صحيح تحبّني و تبغى لي الخير

انا سعيت انه اختي تكسب رضا امي
مع انه امي صرحت لي و للكبيرة انها غضبانة على اختي هذه الي قاطعتني فترة و ما رضيت تسلم علي

.
.

الحمد لله الامور سليمة الان و العلاقات بيننا ممتازة

لكن متاكدة لو اني طحت بيوم من الأيام لا سمح الله
مافي اي وحدة منهم تنفعني غير اكبر وحدة فقط .. و اصغر وحدة

.
.

هذه يمكن تصحى من غفلتها بعد فترة ..
لما تجرب أهل الزوج و تعرف قيمة و معنى الاخت !
و تجيب اطفال و تشعر بأحاسيس الام و معاناتها