هو صحيح انه الزوجة غير مجبرة على صرف هللة واحدة لزوجها .. و أنا موظفة و الحمدلله يعني لا احد يقول تتكلم من غير دراية
لكن افتكرت اخوي و زوجته، اخوي قطع دراسته للانتساب و اللي خسر فيها مبالغ من اجل زوجته، و شجعها على إكمال تعليمها
الجامعي بمدينة تانية و كان هو اللي يمسك الاطفال وقت اختباراتها و التدريب العملي او يجيبهم عند امي، و يصرف عليها بكرم
ماشاء الله و هو مستحيل ياخد قرش من حرمة.. و الحمد لله زوجته بعد سنوات تخرجت، لانها كانت ترسب بمواد مرات

المهم انها كانت جالسة معاي و تقول لو توظفت، ما راح ادفع و لا قرش عالبيت .. و اخوي صحيح مو محتاج لراتبها، بس غريب
تفكيرها ؟ و قلت لها بابتسامة بوجهي.. اصلا اخوي حتى ريال واحد ما يرضى ياخد مننا و طالع على أبوي الله يرحمه
اصلا الرقم السري لبطاقته البنكية زوجته عارفته، يعني ماعمره بخل عليها و هي تدري

عكس زميلتي، تزوجت و بعد زواجها زوجها شجعها تكمل دراستها و كان يوميا يوصلها الجامعة و يرجعها من مكة لجدة..
و كانت تترك أطفالها مع حماتها و لاتدري عنهم.. هذا كلام زميلتي و هي اقرب وحدة من صحباتي لي.. المهم انه بعد
ماتخرجت و توظفت، صرت اسمع و اشوف بنفسي ماشاء الله عليها بتاخد ابو زوجها المستشفي و دفعت له من نفسها
و عملت له عملية بعيونه و تساعد حماتها و زوجها من غير ما احد يطلب منها .. و بطيب نفس، و اهل زوجها اصلا
حالتهم المادية مو قد كذا، فتساعدهم دايما

و عن نفسي الحمد لله تخرجت و توظفت على طول و زوجي يوم تزوجني فهو يدري أني موظفة و قالي انه مايبغى ربة بيت
عشان لا ترجه كل شوي طفشانة طفشانة. يعني ماحد غاصبه علي، لو مايبغى وظيفتي
و كان شرط اخوي بالعقد انه مايتدخل بوظيفتي و هو رضي بالشرط، و في الحالة هذه فمساعدتي له تكون من نفسي
يعني اذا شفته كريم معايا باخلاقه و تعامله و بماله، فمن نفسي أنا بأشيل عنه جزء من المصاريف الخاصة بي .. بس يكون
فاهم انه هذه اصلا مو من مسؤولياتي..

و لو حسيت بلحظة انه حاط عينه على راتبي، وقتها ماراح اصرف قرش واحد ..
و لو هو تعب على دراستي مثل اخوي و زوج صحبتي، فالوضع بيكون مختلف و أكيد بيكون تصرفي مثل زميلتي وقتها

و الفلوس اصلا بالأخير بتروح لمين؟ مو لمصلحة الاطفال ؟ خلاص الفلوس عشان تخدمنا مو علشان نحن نخدمها و نضيع سعادتنا
عشانها ؟