السلام عليكم و رحمة الله و بركاته

أبغى أخذ رأيكم في شيئين بخصوص ولدي اللي عمره 4 سنوات :


++++++++++++++++++++++++++++++

* 1 *

بأسافر الشهر الجاي إن شاء الله لبريطانيا ، فهل أخذه معاي و لا لأ ..؟؟؟
و بأجلس بس أسبوع واحد ، عشان أخلص أشغالي هناك مع الملحقية و البنوك و غيره
زي ختم الوثيقة و إغلاق حسابي في البنك و تسديد فاتورة الحضانة حقة ولدي و زي كذا ..
و غير حفل التخرج اللي راح أحضره إن شاء الله .. و بننتقل بين الفنادق طبعا ..

و في الأخير بأتسوق ليوم واحد فقط ، أشتري الضروريات ..
و أشحن أغراضنا اللي أحتاجها - زي الكتب و الملابس - و اللي تركتها هناك و الباقي نتصدق فيه ..
و طبعا وقتها بأكون حامل في الشهر السادس إن شاء الله ..

أمي تقول ، خذي ولدك معاك لإنه مرة متعلق فيك .. أو اتركيه عند أخوك و حرمته ..
و أختي الكبيرة كل يوم تزن علي إني أخلي ولدي مع أولادها .. بس أختي أعرفها مو مرة
حريصة عالأطفال و ممكن يغيبوا عن عينها و كل يوم يخرجوا ماشاء الله ..
و أختي الثانية ما أقدر أخليه عندها ..

و زوجي يقول يا تتركيه عند أمك أو تخليه عند أختك أو تاخديه معاك ..
و رافض أخليه عند أخوي ، لإن زوجي ينحرج منه مرة ..

و أمي مريضة ما تقدر تهتم فيه و ولدي بيزعجها في الليل لإنه نومه قليل و ما يخليها تنام ..

و شغالة أمي ( شريرة ) ..
و صدتها مرة تشتم ولدي عيني عينك و قدامي ، و الصراحة ينخاف منها و ماهي ثقة ..

و مرة وحدة رحت لزواج أرحامنا و تركته عند أمي 4 ساعات و مع أختي و أخوي الكبير ..
و يقولولي جلس يبكي و يقول ( أنا ما أحب ماما ،، و ماما تركتني لوحدي ) و ما قدروا يسكتوه ..
كل شوي يروح عند الباب يستناني متى أرجع ؟؟؟ مع إنه متعود على بيت أهلي ..

و زميلتي تقول ، دام إنه أسبوع واحد .. فما راح يأثر و إذا أخدتيه معاك بتتعبي و هو يتعب معاك ..
و بتشيلي همه ، نومه و أكله و شربه و لبسه ... و تقول لي تذكرته 4000 ريال و خسارة و مادري
إيش ..

و قالت لي : استغليها فرصة إنت و زوجك تكونوا مع بعض .. و الولد ما حيفهم إيش سفر و ما سفر ؟؟؟
لإنه زميلتي هذه ، أكبر مني بسنوااااااااااات و عندها أطفال و تقول إنها ( مجربة ) ..
و قالت لو رايحة لمدة ( شهر ) كنت نصحتك تاخديه ، بس أسبوع واحد .. ولدك ما يفهم و تتعبيه معاك

و أنا عن نفسي ، أفكر أخذه معاي و يغير جو و غير إنه هناك جيران نعرفهم ، بينبسط يوم يشوفهم
و يسلم عليهم و يودعهم .. فهل تفكيري صحيح ..؟؟؟
و لا صحيح ما حتفرق معاه ..؟؟؟


إيش رايكم ..؟؟؟


أخذه معاي و لا لأ ..؟؟؟ ( ما تهمني قيمة التكاليف ، لو مافيها تعب لولدي )
لإني الأسبوع هذا خلاص لازم أأكد الحجز إن شاء الله ..


++++++++++++++++++++++++++++++

* 2 *

ولدي أبغى أسجله في ( نادي صيفي ) .. و أمامي خيارين و لازم أحدد قبل يوم السبت :

*. نادي بمدرسة (نموذجية) و سمعته على مستوى المنطقة من ناحية (المباني و النظافة و الديكور )..
و بسعر 1000 ريال في الشهر ، و من الساعة 4 و نص لحد 9 ..

*. نادي صيفي كنت مسجلته الشهر اللي فات لإنه ما كان أمامي غيره ..
و بسعر 500 ريال في الشهر ،، من الساعة 4 و نص لحد 7 و نص ..


سؤالي ؟
- هل التعامل بيكون أفضل في المدارس النموذجية ،.
و لا مجرد ( مظهر و ديكور ) لكن المضمون واحد في كل الأماكن ؟؟؟

- هل في عمر ولدي ، بيكون الفرق واضح إذا سجلته في مدرسة نموذجية أو مدرسة عادية ..؟؟؟

- تنصحوني فين أسجله ..؟؟؟
مع العلم إنه مو مهم السعر ، إذا كان ولدي بالفعل بيستفيد من النادي الصيفي ..

و مع العلم إنه ماعندي أي خبرة ، و الصراحة ما عندنا أحد في العيلة يهتم بتسجيل الأطفال في
النوادي الصيفية .. بس أطمح إني أعلم ولدي من صغره في إنه يستغل أيام الإجازة و أوقات الفراغ ..

و مع العلم كمان <- طفشتكم ..
أخواني الكبار كلهم دخلوا ( روضة ) و هم صغار .. لكن أنا و اللي أصغر مني ما عمرنا درسنا في
( روضة ) و مع كذا .. مستواي الدراسي أنا و اللي أصغر مني كان ( أفضل ) من الكبار ..
و كنت من المتفوقات و المثالية .. يعني الروضة ما شفتها ( أثرت ) في أخواني ..؟؟؟

فهل إذا سجلت ولدي في مدرسة نموذجية و بمستوى أعلى ..
ممكن بالفعل ألاحظ الفرق ؟ أم مجرد اختلاف بالأسعار لسمعة المكان و اهتمامهم بنظافة المباني

.
.

و سامحوني طولت عليكم ..