أختي الصفح الجميل و نورا ..

الله يسعدكم يارب
صار ياكل أحسن من قبل ، بس مو مررررررة : (


هو ينام و يصحى بدري مع الشغالة قبلي علشان المدرسة .. و زوجي ينام بعد الفجر و اضطر أجلس
معاه أذاكر و أنام متأخر علشان ألحق أصلي الفجر ( العشاء يأذن الساعة 12 و نص و الفجر الساعة
2 ) من جد عذاب .. .. و يوم أصحىى يكون ولدي صحي و من قبل لا يغسل وجهه الشغالة تعطيه عصير


طبعا الأسبوع اللي فات استلمت الشغالة هههه .. قلت لها لا تعطيه عصير أول ما يصحى و خليه يفطر
طنشتني يوم و سألتها ، قالت لي نسيت و سامحتها .. تاني يوم قمت و شفته كمان شرب عصير
و انسدت نفسه و سألتها ، قالت لي فطرته ( تكذب علي ، بس ما حبيت أدقق معها ) ..
لإنها لاحظت إني مرة مهتمة في أكله و أدقق أكثر من قبل ..


المهم .. جاني ولدي وقتها و قال لي ( همممي .. و يأشر لبطنه جوعان ) و يبغى ( شوكلت )
افتكرت كلام نورة و تعليماتها و كيف أخليه ياكل

قمت طلعت له البيض المسلوق ، و مارضي ياكل .. طلعت له الموز .. التفاح .. الحليب برضو ما يبغى
ياكل و يبكيييييييي .. أخدت الشوكليت و خليته معاي و قلت له ، ما تاكل .. مافيش شوكليت ..
قام يبكي و يأشر إنه جوعان و يبغى شوكلت .. قسيت قلبي و تجاهلته و جلست عاللاب توب أكمل
البحث .. قام .. أخد المخدات تبع الكنبات .. كلها شالها و رماها .. يبغى يقهرني ( مادري من فين
متعلم الحركة هذه ؟ ) و لا طالعت فيه .. قام أخد السماعات تبعي يبغى يقهرني .. وو لا طالعت
فيه .. بكي بكي و طنشته ..

شوي يوم شاف إنه مافيش فايدة ، إلا ياخد الكرسي الصغير تبعه من حاله .. و يروح المطبخ و يجيب
الصحن اللي فيه البيض و يجي يقول لي : ( ماما .. همي ) .. يعني ماما أكليني بيض ..

ماشاء الله فطر وقتها و أكلته فواكه بعد ما فطر .. و بعدها قمت أخدت الشوكليت و قلت له يا الله خد ..
علشانك أكلت البيض و الموز و التفاح و الحليب ..

---------------------------------------------------------------------------------

اليوم اللي بعده .. كنت مواصلة علشان تسليم شغل للدكتور و ما نمت كويس و أصحى على صوت
ولدي و الشغالة تعانده يقولها ، ( نوووووووووووو .. لأأأأأأأ ) .. و هي تقول له ( تاكل في الطريق ) ..
فهمت الحكاية إنها تبغاه يخرج من غير فطور لإنهم اتأخروا عن المدرسة و تبغى تفطره في الشارع و هو
ماشي .. و مع إني قلت لها ، ما يطلع من البيت إلا و هو فاطر .. زوجي سألها ، إيش فيه يبكي ؟
و قالت له ما يبغى يروح المدرسة .. تكذب على زوجي علشان زوجي يخاصم الولد وو يضربه

و هو كان أصلا يبكي علشان يبغى يفطر أول شئ بعدين يخرج و صرت أفهم عليها خلاص

قمت وقتها و أول مرة أنفجر عليها كذا .. لإني من كم يوم أكلمها .. قلت لها تصحي مرة تانية من بدري
قبل لا يصحى هو و تجهزي فطوره و يفطر في البيت و تخرجيه .. ( تضايقت من نفسي يومها ، إني أول
مرة كذا أعصب عليها بالشكل هذا و بجد انفجرت وقتها )

بس العجيب .. إنه من يومها و هي تهتم ماشاء الله في أكله .. ما ينام قبل لا يتعشى و أول ما يصحى
لازم تفطره من غير ما أقول لها .. و ما تعطيه عصير إذا ما أكل أكل وو تسألني .. زوجي لاحظ و قال
سبحان الله جنس عجيب ؟؟؟؟ لإنها كانت زمان تعاندني و ترد علي يوم كنت أتكلم معها بشويش ؟ بس وقتها عصبت غصب ..

----------------------------------------------------------------------

بأركز على الشغالة ، لإنها تعطيه كانت من وراي .. و إذا ما خليت عيني عليه تقوم هي من غير ما أدري
تعطيه أي شئ أو تأكله حلويات و أشوفه شبعان و نفسه مسدودة و تقولي أكل خلاص .. و يكون أكل
شوكليت و لا شرب عصير .. أشياء تسد نفسه .. فنقطة الشغالة و ارتحت الحمد لله منها ،، لإنها صارت
تهتم مو مثل قبل و تساعدني .. يوم يطلب حلاوة .. تسألني أعطيه قبل لا ياكل ؟؟؟

---------------------------------------------------------

المشكلة إنه لحد دحين رافض بقية الأكلات زي المكرونة ، رز .. لبن ..
بس صاير ياكل فواكه بدل من الحلويات و الكاكاو .. و بدأ يشرب حليب أول ما يصحى ..
مو مثل قبل كان يرفض .. لإني أخبي العصيرات في الصبح ..

اضطريت أجيب اندومي يتغدى به الأسبوع اللي فات .. و أصابع السمك ..
جنني في الأكل ، مو راضيي ياكل .. بس في الفطور ريحني و في العشاء ..

---------------------------------------------------------

نورة .. طلعت النتايج الحمد لله بس باقي مشروع التخرج تسليمه في سبتمبر إن شاء الله
و ما أروح الجامعة علشان أخلي عيني على ولدي بيفطر و لا لأ ؟ و إذا ما كنت في البيت يبدأ يتعاند مع
الشغالة و يوم أكون في البيت يسمع الكلام .. و أعرف اتفاهم معه من غير عناد .. بس هي تعانده كل
شوي

القهر أقول لأبوه لا تعانده علشان الولد لا يصير عنيد ..
و لا حتى انا أعانده .. و تجي هي تتعاند معه و تخرب أخلاقه ..