عزيزتي هجوع ... الحمد لله ان ردي فادج لو شوي .. والاخوان و الخوات في المنتدى بعد ما قصروا وياج في ردودهم .. ان شاء الله تستفيدين من النصايح اللي تشوفينها مناسبة ... و تكمل فرحتج على خير (آمين يارب)
ما ادري بالضبط شو اللي تبيني اشرحلج اياه بتفصيل اكثر ... والله انا مستعدة و اتمنى اني اقدر افيدج بس ياريت تحددين لي اذا في نقطة معينه
اسمحيلي هالمرة اقولج بعض النصايح من تجربتي الخاصة و من حالات الزواج اللي شفتها بحياتي .. لاني اعتقد ان النصيحة يوم تكون ناتجة من تجربة هي اصدق و افيد من النصايح العامة
1. اختي الغالية ... كل انسان في هالدنيا الله خصه بصفات و اسلوب و طريقة تفكير تختلف عن غيره من البشر ... و مهما حسيتي ان تفكيرج متوافق مع شخص معين اتذكري انه لازم يكون فيه بعض الاختلاف و هالاختلاف طبيعي و مستحيل تلغينه مهما حاولتي و مهما طالت العشرة ... انا ما ابغي اخوفج بس اللي اقصده انج لا تكررين نفس الغلطة اللي تطيح فيها كثير من الحريم بانهم يزعلون اذا حصلوا اختلاف في التفكير او الاسلوب بينهم و بين ازواجهم فتصير مشاكل وايدة بينهم بسبب محاولة الزوجة تغيير زوجها ... يعني حاولي تتقبلين ريلج و تحبينه مثل ما هو ... لو حصلتي فيه بعض الطباع اللي ممكن تزعجج اتكلمي وياه و اتناقشوا في الموضوع و هو لو قدر يغير طبعه اكيد بيغيره عشان يريحج .. بس لو ما قدر لازم تتفهمين الوضع و تحبينه مثل ما هو.
2. ما في علاقة بهالدنيا ممكن تكون مشابهة لعلاقة ثانية 100 % .. يعني .. اللي يمشي بين امج و ابوج .. او بين اختج و ريلها .. او بين ربيعتج و ريلها .. او حتى بين ريلج و زوجته الثانية ..مو شرط يمشي بينج و بين ريلج ... فابتعدي عن المقارنه سواء مقارنة الاشخاص او العلاقات لانج دوم بتتعبين ...ومثل ما قلتلج الاختلاف بين الناس و طبايعهم امر وارد و طبيعي ... مو غلط انج تطلبين النصيحة او تاخذين فيها .. بس دايما اتصرفي بالشكل اللي يناسبج و يناسب ريلج و يناسب زواجكم ..مو اللي ناسب اي حد ثاني.
3. في شغله انا مؤمنه فيها (يمكن ما توافقيني الراي) بس انا فعلا مقتنعة ان الريال يوم يتزوج ثاني مرة (خاصة لو ماشي سبب شرعي مثل ان الزوجة الاولى تكون مريضة بشكل يمنعها من خدمة زوجها و تلبية طلبات او انها تكون ما تييب عيال) ... فالزواج الثاني يكون غالبا بسبب الحاجة الجنسية عند الريال ... يعني ممكن تكون زوجته الاولى باردة جنسيا .. او ممكن تكون علاقتهم ممتازة بس هو رغبته اكثر و زوجته الاولى ما تقدر تجاريه .. او حتى لمجرد الرغبة في التغيير .. و انا بصراحة ما اشوف ان هالشي غلط ..لان الجنس هو من اهم الاسباب اللي الله شرع الزواج عشانها سواء اول مرة او عند التعدد ... انا ما اقول ان الريال يتزوج عشان الجنس و بس .. لكن الجنس سبب رئيسي و مهم ... فنصيحتي لج .. حاولي من الباية انج تتمتعين الجماع .. لا تعتبرينه مجرد واجب عليج او مجرد حق لزوجج ... لا ... اهتمي بنفسج انتي بعد و اتمتعي فيه عشان تقدرين تلبين رغبة ريلج .. و صدقيني الريال يحس بالحرمة ... يعني الحرمة اللي تخلي زوجها يجامعها لمجرد انه طلب وما تبغي تزعله بدون ما تتمتع بهالشي الريال ما يحس بمتعة كاملة وياها .. و هذا هو اللي يؤدي للملل و البرود الجنسي بعد فترة من الزواج ... فعودي نفسج من البداية انج تتمتعين عشان تقدرين تمتعينه ... بعد فترة من الزواج و يوم تحسين انج خلاص اتعودتي على ريلج حاولي انج وقت الجماع تخبرينه بالاوضاع اللي تحبينها و تريحج .. قوليله شو اللي تبينه يسويه ما فيها شي .. بالعكس والله يوم بيحس انج مشتهية و متمتعه بيرتاح واااااايد و يتم دوم مشتاقلج .. حاولي بعد انج انتي اللي تبدين من وقت للثاني .. خلج مرات صريحة (يعني بالمداعبات) و مرات ابدي بس بطريقة غير مباشرة (بكلمة و حركة دلع او حتى بقميص نوم جديد كل شي ينفع و الرياييل بسرعه يفهمون هالسوالف
)
4. لا تخلين اي حد يتدخل بينج و بين ريلج سواء بالخير او بالشر .. لا تتشكين جدام اهلج من ريلج و طباعه و تصرفاته ..حتى لو زعلج بشي حلي الموضوع بينج و بينه .. صدقيني لو حد اتدخل بتزيد المشكلة .. بعدين المفروض انج ما ترضين على ريلج ان اي حد يعرف عنه شي مو زين او انج تتشكين منه خاصة انه ريال عود مو مراهق يتريا حد يعاتبه و يفهمه ...و احلفلج ما شي يكبر الحرمة في عين ريلها مثل احترامها له ..كل مل احترمتيه اكثر و حسستيه بتصرفاتج انج تحترمينه و ما ترضين تنزلين قدره جدام اي حد حتى لو بكلمة عتب بتحصلينه مات عليج و بتصيرين انتي الصدر الحنون اللي يرمي عليه كل مشاكله و همومه و اسراره بدون ما يخاف من انج تطلعين سره في يوم او تعايرينه فيه
5. هذي نقطة وايد مهمة مع انها ممكن تكون صعبة شوي ... حاولي تبنين علاقة زينة مع زوجته الثانية ... صح ان الغيرة موجودة (من الطرفين) بس ما شي يمنع انكم تكونون صديقات ... بالعكس صديقتج مكن في يوم تخونج او تطلع سرج اذا تعارضت مصالحكم .. لمن شريكتج مصلحتها من مصلحتج و لو انتي كنتي زينه وياها اكيد هي بعد بتعاملج بالطيب ... لا تصدقين الكلام اللي في الافلام و المسلسلات عن الشريكة و زوجة الاب و الزوجة الاولى و اثانيه .. هذي دراما المسلسلات ... ما اقولج ان الوضع بيكون مريح ميه في الميه بس والله يعتمد عليج .. لو انتي بديتي بالاحسان هي بتعاملج باحسان ... و كفاية انج بتكبرين في عين ريلج يوم يشوف انج مهتمه في بيته الثاني و عياله و ما تذكرين مرته الا بالخير ... بس في نفس الوقت حاولي ما تتكلمين عنها وايد جدام ريلج خاصة في وقت الهدوء و الصفا .. خلج في نفسج احسن
اممم بس .. هذا كل اللي عندي ان شاء الله ما اكون طولت عليج وايد و يكون بعض اللي كتبته مفيد لج ...و اتمنى لج كل خير
تحياتي
29-05-2006, 12:06 AM
ضوابط المشاركة
العرض العادي
