السلام عليكم و رحمة الله


مساء الخير جميعاً


الله يجزيكم خير على النصح و محبتكم لأخوانكم و خواتكم،،،


نبذة بسيطه عني و عن زوجتي قبل ما أبدا بمشكلتنا:


-عمري ٢٩ سنة و زوجتي ٢٣ سنة و متزوجين من ٤ سنوات و عندنا طفل و لله الحمد.


-كلنا من أسر بسيطة جداً مالياً.

-انا ناجح جداً عملياً و بفضل الله وصلت الى منصب حلو في شركة راقية و مادياً حالتنا كويسه.

-انا إنسان طموح و بالي طويل مستعد افشل ١٠ مرات و أكرر المحاولات الى ان انجح.


انا و زوجتي عندنا عيوب مثل البشر،،،


انا متقبِّل و راضي بالكثير من عيوبها الا هذه الأشياء ما قدرت أتقبلها و كل يوم تضايقني اكثر الى درجة بديت أفكر بالانفصال عنها:


١- تقلب المزاج

٢- تتحسس و تزعل بدون سبب

٣- تحب الحزن و اجواء الكأبة بصفة عامة

٤- اقدر اقول عندها ضعف شخصية أو قلة ثقة بالنفس.


ما قدرت أتأقلم مع هذه الصفات لانه انا عكسها ١٠٠٪؜ اكره اجواء الحزن و الكأبة و شبه نادر اني أتحسس من اَي شي أو أفسر الكلام بغير محله و اعتقد انه ثقتي بنفس عالية و ما فيه شي يأثر فيني أو يهز ثقتي بنفسي بسهولة.


الحالات اللي اشتكي منها :!


-أكون راجع من العمل احصلها ماده البوز و متضايقة مرتين أسبوعياً تقريباً. طبعاً و اكيد كذا بدون سبب لانه خلال الربع سنوات اسألها اذا فيه شي تقول لا ما فيه شي !!! بالفترة الاخيرة صرت اتنرفز و اطلع من البيت.


-أكون جالس أتكلم أو امزح معها فجأة احصلها تضايقة من كلمه قلتها و فسرتها و انت تقصد كذا و كذا و يخرب المود لساعة أو ساعتين،،، الشي هذا يصير بين فترة و فترة. مثلاً أمس جاني زملاء يتعشون عندي و لانه كان متاخرين كان العشاء عادي جداً اعتذرت لهم من باب المجاملة قلت أسف والله عشانا مو حلو وقليل اليوم لانه ما حسبنا حساب انكم جايين,,, هي سمعت كلامي هذا "ممكن تكون كانت قريب من عند الباب و سمعت كلامي صدفة" المهم بعد ما راح الزملا سوت لي مناحة بالبيت انت ما تقدر تعبي كيف تقول هذا الكلام ان العشاء مو حلو و كان قليل وووو قلت لها انه هذا نوع مجاملة للضيوف و الكلام ما كان موجه لك !؟؟ راحت تبكي و نامت و هي تبكي !!!


-تدخل جوء الحزن فجأة تفكر كذا "حياتنا مو حلوه ما حققنا شي فيها و طفولتي كانت سيئة عند أهلي بسبب ظروفهم المادية (ظروف اَهلها و اهلي حالياً أفضل بكثير من السابق) و انت ما حسّيت اللي انا حسّيت فيه ووو"
و أرد عليها بالحقيقة و هي لا والله انا حاس فيك و وضع اهلي بالضبط مثل اهلي سابقاً و انا عانيت اكثر منك لانه انا كنت يتيم الأب مو مثلك و لكن خلاص هذا كله ماضي و حاضرنا ممتاز و لله الحمد و هذا الشي المفروض يزيدنا سعادة !!! و اذا رديت عليها كذا تتضايق ايه شفت انك ما تحس فيني ووووو


-تتشكى و تعاتبني شبه يومياً على أشياء غير صحيحة أو هي مو شيفتها أو ما تقدرها،،،، مثلاً ما عمرك جبت لي هدية أو اشتريت لي شي او ما تسمعني كلام حلو!!!!! هنا تجن جنوني لانها من وجهة نظري جالسة تكفر بعشرتي معاها،،، انا جالس اعطيها مصروف شخصي لها هي فقط غير مصروف الولد و لا أكلمها و لا اسألها عن المصروف حقها هي حرة فيه... و اقل شي أطلعها مرتين أو ثلاث كل أسبوع سواء مول أو حديقة أو كوفي... وأعطيها مصروف خاص بالأعياد غير مصروفها الشهري... وكل فترة ثلاثة او اربع أشهر اجيب لها شي حلا او وردة... و أغير لها جوالها كل سنتين و بعد من غير مصروفها،،، و كلامي معاها دايم حلو حلو و ما اطلب منها شي الا بتودد (الله يخليك الله يرضى عليك لو سمحتي يا قلبي)


الشي هذا ينرفزني و يطلعني من طوري و يُبين علي انه فعلاً زعلت و اذا لاحظت اني زعلان على طول تقلب الموجة (انا ما قصدي و انت احسن رجال وووو كنت امزح معاك او انت فهمتني غلط... جالسة اتدلع عليك)



المشكلة انه انا شخص إيجابي مبتسم متفائل و الناس غير زوجتي تحب تجلس و تمزح معاي و يأخذون برأيي


و زوجتي نكدية حزينة سلبية كائيبه،،، تحس انها مظلومة بهذه الحياة و حظها سيئ،،،،


موجب و سالب ما يجتمعون و المشكلة اني بديت احس انها بدت تأثر علي طول الوقت خايف لا اقول كلمة عادية و تفهم خطا و اذا طلعت من العمل يدي على قلبي لا ارجع للبيت و انا تعبان و احصلها مادة البوز،،،


كلمتها اكثر من مرة تتحسن أسبوعين ثلاثة و بعدين ترجع مثل ما هي،،،


هددتها مرة ان الحياة هذه مو عاجبتني طار عقلها و تتأسف لي و سامحني و انت احسن واحد بالعالم و حياتي بدونك ما تسوى ووووو قلت لها ما دام عارفه كل هذا ليش ما تغيرين معاملتك ؟ تقول أبشر جالسة احاول و أخذت فترة متحسنة كم شهر و بعدين رجعت مثل ما هي،،،،


الان وصلت لقناعة انه خلاص هذا طبعها تحب الحزن و النكد و مستحيل تتعدل و بديت اتذكر تلميحات من أمها في بداية زوجنا انه هذا طبعها (الحزن، الكأبه)


أفكر جديا بالانفصال لكن ولدي كسر ظهري متعلق فيه جداً جداً و لا ابغاه يعاني!!!


الحل يا جماعة الخير


و جزاكم الله كل خير ،،،

المشاركة الأصلية كتبت بواسطة سديم الذكريات14 الله يفرج همك ويصلح زوجتك سوي لها تحليل فيتامين د نقصه يسبب اكتئاب وكمان الغدة الدرقية الله يسخرها لك

المشاركة الأصلية كتبت بواسطة Neat Man زوجتك تعرف قد إيش أنت رائع بالنسبة لها. فعلاً أشياء ترفع الضغط لما تعمل وتجتهد وتهتم، ثم تقولك أنت ماتعطيني ماتهديني ماتقولي كلام حلو ماتجيبيلي ماتطلعني إلخ..، وبالأخير تقولك أمزح عموما هي ضامنتك، وتدلع، وابن آدم أحمق دائماً إذا ضمن الشيء وتأكد أنه ماراح يخذله لم يقدر مايقوم به الطرف الأخر حق قدره، وربما تعلقك بطفلك أيضاً جعلها تأمن جانبك. يبيلها صدمة، عشان تفيق، وشي الصدمة ما أدري، والزوجات يصدمهم ويفيقهم إما الطلاق أو الزواج من ثانية، يخليها تعرف كيف أنها ماقامت بحقك كما ينبغي، وإن كنت لا أنصح لا بالطلاق ولا بالزواج، شف لك أسلوب آخر أو قرار يجعلها تراجع حساباتها وتعدل سلوكها.

المشاركة الأصلية كتبت بواسطة مبتعثة متفائلة مع نيت مان اصدمها يمكن تعاملك زي الاب الي عياله يتدلعوا عليه وتشوفك مستعد تتقبل طفولتها المتاخره لكن وقف وقفه حازمه لان الخوف انك تسكت تسكت وعقبها تتفجر وبينكم طفل فلازم توعيها

المشاركة الأصلية كتبت بواسطة I'm Happy فعلاً هي لما أوجهها و أصير أهاجمها أنه أسلوبها هذا يطفش تبداء بالاعتراف انه انا مو مقصر معها و اني الزوج المثالي ولكن تقول انها تطمح أني أكون أفضل وووو مرات خلاص انا يكون مالي خلق الزعل و رفعت الضغط خلاص ما دام عارفه هذا الشي لا عاد تكررين هذا الاسلوب معاي ما احبه مع الاسف ما فيه نتائج... و مرات تبداء بالتمسكن و انه انا جالس اتمنن عليها بكرمي او تعاملي معاها "بعد ما تشتكي من تقصيري" و انا هنا اقول أي نعم أنا منان و أسوء زوج بالعالم لا عاد تكلميني و اطنشها كم ساعة و ترجع هي تعتذر و بعد الاعتذار كالعادة بكى و تمسكن و انا ضعيفة و ما قصدي سامحني و انت العاقل و انا جاهله وووو مع الاسف أنه أسلوبها هذا يمشي معاي أنا شخص متسامح و اطلب منها تتركني لحالي شوي ترتاح اعصابي و يصير خير و بالعادة ترجع الامور طبيعية "صح أني مو غبي أعرف أن هذه كلها تمثيلية لكن مالي و مال وجع الراس عندي اشغال و مهام و مسؤوليات كثيرة تحتاج انه أكون مركز فيها... اللي تغير الان أنه خلاص أنا صرت ما أتحمل هذا الاستفزاز العاطفي حتى لو كان مرتين بالاسبوع يعني كل اسبوع يرتفع ضغطي بسبب زوجتي اللي مو مقصر معاها مو منطق صح ؟!! لانه ببداية الزوج كنت أقول صغيرة تكبر و تعقل صح فيه تحسن بسيط بالمقارنة في أول سنة زوج لكن بعد تحملي لهذه الاشياء صار أقل بكثير... أفكر أكتب لها رسالة أشرح لها اللي عندي و أحط لها ثلاث خيارات: 1- اشتكيها لأمها و تتعهد قدامها أنها ما تكررها و اذا تكرر معنتها اروح للخيار الثاني او الثالث. 2-الزواج بثانية و تجلس معززه مكرمه ببيتها. 3- الانفصال. و فعلياً أي خير تختاره راح أنفذه... عطني نصيحتك الله يرضى عليك و ابغى اعرف تحليلك للأمور من خلال كلامي فعلاً أسلوبها معاي كأني أبوه المجبر على رعيتها و تحمل مشاكلها خصوصاً أنها مهمله في بعض الامور الاخرى اللي لحد الان متحملها... مشكلتي أكره انه أكون شديد لانه نفسياً احس انها راح تسوي كل الاشياء اللي ابغى من دافع الخوف مني و أنا ابغى كل شي يطلع من القلب و برضاها يعني ابغى أحس انها تسوي الاشياء اللي انا ابغى لانها تحبني و تبغى رضاي و ليس خوفاً مني !!! هذه هي المشكلة ؟؟