السلام عليكم يا احلى اعضاء..

مبارك عليكم الشهر وكل عام وانتم بخير

اليوم جايتكم بموضوع تعب نفسيتي شوي

قبل كم يوم دار بيني وبين زوجي موضوع عن زكاة ذهبي

قلتله لازم وقته الحين ادفع زكاة ذهبي وهو قال الذهب اللي ينلبس مابتزكى

طبعاً انا والله كلمته بكل رقه وذوق وبدون إنفعال قلتله أنا زكاة ذهبي بنزلها بنزلها إن شاءالله.. لأن هذا وفي فتاوى كثيره تأمر بوجوب اخراج زكاة الذهب ملبوس او لا

وانا مابي شي يكون بذمتي الدنيا فيها حياة وموت.. وعلماً إن امي وخواتي يخرجون زكاتهم

وتعودنا هذا الشي كل سنه الحمدلله

بس انا متزوجه من 9 شهور تقريباً وذهبي شريته قبل زواجي بـ كذا شهر يعني حال عليه الحول وبراحه

اخوي عنده خلفيه بهذه الامور بحكم انه ملتزم.. كلمته بخصوص هالموضوع

قال لي إذا الزوج مو شايف ان اخراج زكاة الذهب الملبوس واجبه بكذا عليك تبيعين من ذهبك وانتي تدفعين الزكاه قلتله اوك مو مشكله اهم شي ماحس إن علي حمل

هذا وإن الزكاه تطهر المال يعني مافي احسن من كذا

المهم....

اليوم كلمني اخوي وقال لي انا بالصدفة تكلمتت انا وابوي في موضوع زكاتك
وقال هو بيخرجها عنك وإن حنا وزوجك واحد مابيننا فرق

انا قلت لأخوي فديتك وتسلم بس انا اعرف فلان (( زوجي )) بيزعل اذا اخرجها ابوي

لانه يتحسس من ان حد يدفع عنه شي... قلتله لا تخرجون شي ربي يخليكم لي
وزوجي بيقتنع اننا نخرج الزكاه واذا ماقتنع ببيع وبخرجها انا قال لي اخوي اوك براحتك

انا بتصرف متهور مني ورغم اني اعرف ان زوجي يتحسس من هالمواضيع رحت وقلتله اللي صار بيني وبين اخوي وابوي شنو قال

قلتله في الواتساب كل اللي صار وبحسن نيه بس وربي ماتوقعته بيتحسس هالكثر
قلتله في الواتساب لانه مسافر مو عندي

المهم ماتوقعته بيتحسس وبيتصايق لهادرجة خلاني لين اخلص كلامي
قال لي (( اها انزين ))

وشوي هووووب القاه حضرني من الواتساب

بصراحه احس ماله حق وتصرفه متسرع وماله داعي

استغربت بالأول شنو السبب واستبعدت اول شي انه حضرني اصلاً قلت يمكن الشبكه فصلت
او اي شي. احتمال الحضر بعيييببد ماجاء على بالي

بس بعد مرور ثلاث ساعات او اكثر عرفت انه حضرني وخذيت بخاطري والله

كان المفروض نتكلم بطريقه عقلانيه اكثر ويقول هذا الامر ضايقني وانا بكذا ماراح اعيده

بس مو كذا مثل الاطفال يحضرني

دقبت عليه كذا مره ولا يرد .. قلت اخليه براحته وارسلت له كان مفروض نتفاهم اكثر و كذا

وخلاص تركته

اللي ابيه منكم تقولون لي كيف اتصرف وشنو اسوي ساعدوني تكفون

احضره انا بعد ولا اطول بالي ولا شسوي بالضبط.. حتى النوم ماقدرت انام

حاسه إني مضلومه

تكفووووون والله مالي حد غيركم بعد الله

صغريها وتصغر..

كبريها وتكبر

المفروض ماتكلمتي باخراج الزكاة وموضوعها مع زوجك عند اخوك وابوك..

بس سالتي اخوك عن الحكم مع انك تقدرين تتجنبين تفتحين الموضوع معاه لان مصادر الفتاوى كثيرة..

لانها ممكن تنفهم تلميحة انهم يخرجونها عنك او انه مرسلك لهم

او انها تنفهم انه بخيل او مايبي يدفع..

من مشاكلك كلها واضح ان في مشكلة بالحوار او مافي حوار من اصله بينك وبين زوجك.. اشتغلي على هالشي

وكتمي عن اهلك وغير اهلك حتى على النقاشات العادية اللي بينك وبين زوجك

عموما الحظر احيانا حل واختيار للسكوت لا تاخذونه دايما بحساسية.. لانه ممكن لو تكلم وهو منفعل وقتها يجرحك

__________________

اختلافي عنك لا يعني اختلافي معك

و عليكم السلام و مبارك علبك الشهر

انتي بعد لا تحضريه خليه لين برضى من نفسه

الله يهديه

أصعب شيء في الحياة الزوجية إنك تنقلي مشاكلك مع زوجك لاهلك .. أو العكس..

بالنسبة للفتوى أخوك مو كتاب منزل مع احترامي الشديد كان سألت مفتيين أو هيئة كبار العلماء..

بالنسبة للحظر لاتحظريه ولاشيء خليك أكبر وأعقل منه .. خلاص وضحتي وجهة نظر واذا تأكدتي من الفتوى خلاص بذمة زوجك وممكن تقولي له في ذمتك أنا مااتحملها وربك مايحمل نفسا إلا وسعها (واتقوا الله مااستطعتم)

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

حبيبي زكاة ذهبك لا هي على زوجك ولا هي على أبوك عليك إنتي صاحبة الذهب وزوجك مو مجبور يخرج زكاتها من جيبه إن كان دفعها من طيب نية فجزاه الله خير ويعتبر هالشيء مثل التبرع منه وإلا ف إنتي المسؤولة عن إخراجها ..

وخذيها نصيحة مني للأيام ..
مو كل شيء ينقال للزوج ..

__________________
فقدتك يا بعد عمري وحبي وأطهر أشواقي، فقدت أيام ما ترجع فقدت البيت واللمة، رحلتي بالفرح كله وبعدك مابقى باقي، وتركتي وحشة الذكرى تجر الروح يا يمه، يا أغلى قلب ودعني ومثله صعب أنا ألاقي، يا أروع من عن الدنيا رحل وأطهر ثرى ضمه ..💔

مرحباً أختي

القول بوجوب زكاة الحلي قول قوي من ناحية الأدلة وفيه خروج من الخلاف وأجر إن شاء الله

وبالنسبة للإخراج فهي على المالك ... وهو أنتِ ... ولست ملزمة ببيع بعضه لإخراج زكاة الآخر... بل يمكنك الإخراج من مالك إذا وجد بمقدار الزكاة ... أو يمكنك الإقتراض بمقدار الزكاة ثم السداد للمقرض لاحقاً وقت توفر المال لديك

وأما إذا أراد زوجك أو أحد آخر بالتبرع نيابه عنك فيجزء ذلك وهو من باب التعاون على البر


وربما زوجك يعتقد أن الزكاة لابد أن يخرجها هو بإعتبار أنه راعي عليك وتحت ذمته... وربما من هنا بدء الخطأ والتحسس عندما عرف أن هناك من سيقوم مكانه ويظهره بمظهر المقصر. والله أعلم


وحالياً ... إتصلي على زوجك وأرسلي له رسائل مدفوعه من باب السؤال عنه فقط... ولا تفتحي موضوع الزكاة إلا إذا فتحه هو... عندها فهميه الأمر



أعانك الله

انا مقدر لوضع زوجك

لأن صورة زوجك قدام ابوك واخوك صارت باااااااااااااااايخه وانتي تقولي مايبغى يزكي وش يقولوا عنه ؟

زوج بنتي او زوج اختي مايبغى يزكي يعني تارك لركن من اركان الاسلام والعياذ بالله ؟

مفروض سألتيه ممكن تتأكد لي من الموضوع اسأل وابحث لي عن رأي اهل العلم في هالموضوع ؟

مو تكلمين اخوك ثم ابوك يقول بزكي عنك ثم انتي عارفه انه يتحسس من هالامور وعارفة انه بيزعل مع هذا راسلتيه وعلمتيه علشان يتحسس ويزعل ثم تقولين زعلني انه زعل غريب ؟؟؟

وتبغينه مايزعل ؟ هذا اذا ابوك واخوك ما نقدوا عليه وانتهى الموضوع وهو حاس انه صغر بعينهم حتى لو ما تكلموا عندك او عنده

خليه يهدأ ويصير خير

.حكم إخراج الزكاة عن الغير:

السنة أن يخرج الإنسان زكاة ماله بنفسه، فلا يجوز لأحد أن يخرج زكاة غيره عنه إلا بتوكيل منه؛ لأن الزكاة من العبادات الكبيرة، وكل عبادة لا يجوز فعلها إلا بنية، وهي لم تحصل من صاحبها، فلا يجزئ إخراجها عنه.
عَنْ عُمَرَ بْنَ الخَطَّابِ رَضِيَ اللهُ عَنهُ قَالَ: سَمِعْتُ رَسُولَ الله صلى الله عليه وسلم يَقُولُ: «إنَّمَا الأعْمَالُ بِالنِّيَّاتِ، وَإنَّمَا لِكُلِّ امْرِئٍ مَا نَوَى، فَمَنْ كَانَتْ هِجْرَتُهُ إلَى دُنْيَا يُصِيبُهَا أوْ إلَى امْرَأةٍ يَنْكِحُهَا، فَهِجْرَتُهُ إلَى مَا هَاجَرَ إلَيْهِ». متفق عليه.

من تصرفه شكله صغير بالعمر والحياة ماصقلته للحين..طنشي موضوع حظره لك تماماً وبيني انك مادريتي ولا اهتميتي صدقيني بعدها بيجيك طاااير لانه بيحس انه مو مهم

هونيها وتهون ..
والمسألة بسيطه ولا تكبرين الموضوع ..الحمدلله ان حضرك ولا رفع صوته عليك ..
انا صراحه ما الومه ..شي بيني وبين زوجتي ما يطلع برا البيت الا اذا عند الحاجة القصوى..