انا اسمع باليوتيوب
ماادري عن كتبه ماقد قريت له
وعنده مدونه فيها فيدوهاته المتميزه
لاتفوتك الله ينفعك فيهن

يابنت الحلال
زوجك قال لك هو (مقفل) =نفسيته تعبانة = مايقدر يكون طبيعي حاليا معاك
وإنت جالسة تلاحقينه وتطالبينه يرجع زي أول!!!!!!!

إذا استمريتي بنفس أسلوبك راح تخربي بيتك بإيدك وراح تضيعين زوجك من بين يدينك،،

زوجك ماراح يرجع معاك زي أول إلا إذا لمس فيك التغيير للأفضل،،
والتغير يكون نابع من ذاتك، نابع من احساسك بالخلل في أسلوبك، هذا الشي مايبيله عصا سحرية وتتغيرين،
لازم تشتغلين على نفسك،،
أعيدي قراءة نصايح اﻷخوات والله كلامهم درر وجواهر،،طبقي نصايحهم،،تقربي لزوجك،
أعط الكلمة الحلوة واللمسة الرقيقة الحانية والإهتمام قبل لا تطالبين زوجك يرجع مثل قبل..

الله يعينك
اللي يده في النار مو مثل اللي يده في الماء
ملل لا عمل و لا وظيفة و تأجيل أمومة و نريدك ان تنشغلي بأمر آخر
ماذا يعني تنظر للطوفة!!

حتى عمل البيت عندك شغالة؟؟
مارأيك تستغني عنها و تلتهي بعمل البيت
او احضري أدوات رسم و لوح و ستاند و العدة كلها و التهي بالرسم
او بدراسة احدى الكورسات عن طريق النت. فوتوشوب مثلا و تصميم شعارات
او اي هواية لديك شغووفة بها

__________________

والله من جد
الكل يلومها وحاط حيله عليها ..


انا يوم كنت بوضعها لا عمل ولا وظيفه ولااولاد ولا زيارات وانا حاطه دوبي دوب زوجي ..

شئ طبيعي انه يكون المحور الوحيد بحياتها هو زوجها ..
الواحد اذا يبي يتغير ..تغير نفسه من الداخل يحتاج عوامل خارجيه تساعده على التغيير
مايكفي العامل الداخلي فقط ..

مثال( الله سبحانه وتعالى عندما امر الرجال بالعفه وغض البصر(عامل داخلي) ماجعل الامر سبهللا بل جاء الامر بالحجاب للنساء (عامل خارجي)
التغير من الداخل الحاله صعب ومتعب وراح يحصل منه الزله والخطا


زوجها يبغاها تتغير من غير مايمد يد العون لها ..
الله يهدي زوجك ...

ادعي ان الله يهدي زوجك ويغير سياسته معاك ..

مالك الا الدعاء يازين ..شدي حيلك بالدعاء

بقولك تجربتي مع رفض زوجي لاشياء احسها مهمه مراوهو مااقتنع ويرفض بشده
مثل النت والاستقرام وتويتر والشغاله واشياء احس صارت من ضرورات العصر
وش سويت
احااول معه كل فتره اذا شفته رايق واسكت اذا عصب وارجع احاول بعد فتره واسكت اذا عصب وهكذا
يعني ماسكت واستسلمت وماسويت مشاكل
وبعد صرت اجيب فوائد هالاشياء وامثله على ناس تغيرت حالهم للافضل وغيرها
والاهم الي احسه غيره الدعااااااء بالحاح بكل سجود ان ربي يلين قلبه ويوافق بطيبة نفس على الشيء الفلاني
والحمدلله تغير وصار يوافق بسهوله احمد ربي واثني عليه الخير كله

زين ....

اذا زوجك يسمح لك تطلعي بالسياره لانحرمي نفسك روحي في اليوم الي مو عندك رفهي عن نفسك شوي

بالنسبه لبروده حتى أنتي خليك بارده معاه لانك بتقولي في اشياء يسويها يقهرك فيها طيب فرصه يكون لك ردة فعل والبرود أجمل حل معاه

سمعت له 3 مقاطع .. حلو كلامه .. دونت بعض الأمور اللي احتاج ارجع لها
جزاج الله خير ..

احسه مكبر الموضوع وايد يا بنات
احس نفسي مضغوطة ربما اكثر منه ..
ليش كل مشكلة تستمر معانا هالكثر! ويوصلها للطلاق!
والله مو مستاهله ..
اي لزقة .. لزقة
الوحدة تنتظر عاطفة في بيت اهلها وحضن ووو
ويقولون لها لما تتزوجين بسبب خجل الأهل ان يظهرون عاطفتهم
ولما تتزوج .. الرجال يقول لها خففي حبج لي خففي التصاقج..

اوكي غلطت معاه ... وبعدين ؟
صح ان ما فيني صبر انه وياكم بهالكلام..
بس قاعدة احاول والله احاول ..

والله قلت له مشاكلنا سببها اني فاضضضضية
قلت له عن المدرسة الدينية ... قال يبيلها شغل وبتاخذ وقتج ( يعني لا )

قلت له النادي .. قال من صجج ؟؟ ما تسمعين سوالف الكاميرات اللي يخلونها العمال ؟؟ ( يعني لا )

قلت له بتمشى جنب البيت .. قال انتي بنقابج وحالتج وفي سيارتج ومرتين أو ثلاث يغازلونج هالمرة تتمشين ؟؟ ( يعني لا )

قلت له بروح بيت اهلي كل يوم اوردي عندي سيارة .. قال بيت ابوج بعيد كل يوم تطقين درب لهناك ما تسمعين عن الحوادث ؟؟ على فكرة صح بيت ابوي في مدينة ثانية بس ثلث ساعة بالكثير واوصل هناك ( يعني لا )

قلت له .. اقترح علي .. قال شوفيلج هدف اسعي وراه!!!!!!!! هذي المكتبة عندج شكبرها تحت كلها كتب وموسوعات زيدي رصيدج الثقافي ... كرهت القراءة من كثر ما قرأت.. ابي اطلع للعالم ابي انشغل بشيء

قلت له بدخل الدورات الفلانية في تطوير الذات والحياة الزوجية .... قال شنهي الحياة الزوجية ؟؟ طيعي زوجج في اللي يبيه و بس

قلت له خلنا نجيب عيال ... قال في وضعنا الغير مستقر ؟؟ تبين نشتت اليهال ؟؟ تبين يعيشون مثل ما قاعدين يعيشون اخوانهم ؟؟ ( يعني لا )

اقول له طلعني معاك .. قال اااحاول بس تعرفيني مشغول وانشغالاتي لفوق راسي اطلعج بمقدار محدود

تعرفون شنو يومياتي ؟؟؟
يوم اللي معاي اقعد من النوم اطبخ
يوصل بعد صلاة الظهر اقعد معاه
نتغدى .. ينام .. يطلع .. يرجع المغرب يجيب العشى .. يطلع .. يرجع الساعة 11 نقعد مع بعض نسهر وبعدين ننام

واليوم اللي بعده مو يومي .. اقعد من النوم .. انام .. اقعد من النوم .. انام .. اشوف التيلفزيون .. انترنت .. اقرأ .. انام .. تجي المغرب البس ملابس الطلعة اقعد فيها في البيت من تجي الساعة 11 اقوم ابدل انتظره يجي يسهر معاي انام... احيانا اروح الحوش امشي امشي امشي مثل اللي مضيعة عيالها

بعدين يبي يرجع البيت يشوفني وحدة طبيعية!
ما تفكر
ما تهوجس
ما تعتبره محور حياتها

يتهمني ان انه اللي ما عندي هدف!

الشغالة يا مسز داني قلت له بستغني عنها .. خلها بس حق ام العيال
قال لا بعدين بتحتاجينها مو كل يوم نقعد نرسم نظام في البيت
مع ذلك انه اطبخ واكوي واغسل الملابس وانظف غرفة نومنا .. تركت لها اشياء بسيطة


والله تعبت .. ذبلت يا ناس
والله كنت راضية ومخليه الوضع يمشي .. وقاعده اتحمل عشان الامور الحلوة اللي فيه عشانه يحبني وواثقة من هالشيء
يا ريته يتذكر قبل الزواج لما كنت اشوفه طالع من المسجد
ما اعرفه ولا يعرفني سنتين اشوفه صدفة وادعي ربي يكون من نصيبي
و رفضت رجال وايد عشانه .. مع ان ما اعرفه ولا عمري كلمته
بس اعرف اخلاقه والناس شلون تحبه وتتكلم عنه
سنتين ادعي ..
ولما كنت انه ادعي ما كنت اعرف انه هم كان يشوفني وسنتين يدعي ان اكون من نصيبه
يروح مكه يتصدق عني هناك وهو ما يعرفني
وبعد سنتين خبرني ابوي ان فيه رجال متقدم لي..
دخلت النظرة الشرعية تفاجئت انه فلان اللي كنت ادعي سنتين ان الله يجمعني به

كانت ايام حلوة .. ما تخيلت ان بواجه كل هذا معاه

ادعوا لي .. بعد شوي بيرجع البيت
الله يصبرني على قالب الثلج

حبيبتي .. اطلع بالسيارة ويسمح لي
بس ما يسمح اروح بيت اهلي على طول
صديقاتي اللي بيوتهم قريبة عندهم عيال مو على طول فاضيين
ومو معقولة بطلع بروحي
ولو ان سويتها بس ما فيه مكان اروح له بروحي

ان شاء الله الله يقدرني

دعواتكم

لو اسوي له هالحركة يعني بتصير لي سالفة شكبرها
وان انه الح عليه واعانده..

زوجي ما تجيبه هالطريقة

الدعاء مداومه عليه ان شاء الله