الأخ الكريم صاحب المشكله
السلام عليكم ورحمة الله وبركاته
وبعد يا أخي أنا قرأت موضوعك كله وقرأت ردودك كامله والإخوان والأخوات ماقصروا معاك في طرق جميع الحلول وأنا أتضح لي بأن زوجتك مسيره وليست مخيره في تصرفاتها وواضح جدا إستحواذ أمها على عقلها وتعبي راسها بمفاهيم خاطئه جدا تحت شعار أنا أحب مصلحتك يابنتي سوي كذا وأعملي كذا جننيه شحططيه حتى يحس بقيمتك وقدرك ويحط لك إعتبار
وفي الحقيقه إن أم زوجتك أهدافها أكبر من كذا وشئ واضح إن قصدها إستغلالك وإذلالك في نفس الوقت وزوجتك عيونها مغمضه الحين ولاهي حاسه بشئ حولها وفي بالها إن كل مايخطط من تدابير و من أفكار أمها إنها في صالحها وزوجتك للأسف لحد الآن مصممه ومصره على طلبها لطلاقهاولاهي حاسة بفداحة ماتفكر فيه
لأن أهلها وبالذات أمها تلاقيهم يقولون لها ماعليك منه خليه ينطبخ حتى يستوي وفي النهاية بيخضع لك ويحقق كل إللي أنتي تبغينه الحين زوجتك عندها ثقه كبيره إنك ماراح تفرط فيها وحاسه بحبك لها وغلاوتها عندك وحاطه في بالها إنك ماراح تفرط فيها بسهوله وأنت برسالتك لأبوها ومكالمتك لها عززت هاذي الثقه في نفسها وخلتها مصدقه كلام أمها وأبوها ولو إني أحس إن أبوها ماله شغل بالسالفه وتصرفاته تدل على إنه يبغى يفتك من عوار الراس بسرعه وماعنده أنصاف الحلول ولايحب ياخذ ويعطي بالمشاكل ولايحب يلتمس الحلول
وشكل زوجته قالبه عيشته بالبيت رو ح سوى كذا وإفعل كذا ليش ماتتحرك وجالسه تزن على راسه وهو مايحب الزن وزوجتك الله يصلحها ويهديها مع الخيل ياشقراء كل ما أمها قالت سالفه إتبعتها لأنها في نظرها الأم المحبه الحنونه والصادقه
والتي تحب مصلحة بنتها ومستحيل إن تجد بنت قد تظن ولو لوهله إن أمها بتدخلاتها في حياتها تريد خراب بيتها الأم هي القدوه لبنتها قد تجد أم زوجتك تظهر لبنتها حزنها ومشاكلها مع أبوها وتحطها تحت المجهر وتفهمها إن إذا هي ماسوت إللي تنصحها فيه إنها راح تصير حياتها معاك نسخة ثانيه من حياة أمها مع أبوها يعني يابنتي شوفي أبوك وش كان بيسوي فيني عقب هالعمر وشوفي حياتي معاه كلها نكد بنكدوالسبب أنا ياما تساهلت معاه وياما تنازلت له وأعطيته فرصه علشان يتغير لاكن للأسف أنتي شايفه حياتنا أنا وأبوك كلها مشاكل وأنا ما أبغى يصير فيك مثل ماصار معاي الرجل لازم تشدين عليه من بداية المشوار حتى يحس بقيمتك ويقدرك ويحترمك كزوجه
وزوجتك أكيد فاتحه إذنها لأمها ولارايحه تصحى إلا بقرصه قويه وصدمه هائله حتى تحس بغلطها وأنت ماعندك غير إنك تتصل على زوجتك وتشرح لها أول شئ مشاعرك تجاهها وتوضح لها بإنك شاريها وإن غيرتك عليها كانت بسبب حبك وخوفك عليها
مو عدم ثقه ولاشئ وإن بالبداية تصرفاتها هي إللي دفعتك لمحاصرتها بالأسئله وتفتيش جوالها وخلاك تشك بتصرفاتها وقول لها أنتي الحين طالبه الطلاق ومصممه عليه
يعني عشرتنا مع بعض وذكريتنا الحلوه وأجمل الأوقات إللي قضيناها مع بعض من بداية حياتنا ما شفعة لحبي لك ولاشفعة
لي عندك ولاشفعة لعيالنا علشان يتربوا ويعيشوا بينناحياتهم في إستقرار وأنتي عارفه بنفسك إني أنا ماعمري بخلت عليك بشئ ولانقصت عليك شئ معيشك كملكة في عرشها موفر لك كل سبل الراحة والرفاهية وأتعب وأشقى
لراحتك أنتي وعيالك
والحين هاذا جزاي تسوين فيه كذا إذا كنتي مصره على طلبك لطلاق فخلاص إبشري راح أطلقك إذا كان هاذا يريحك را يح أنفذ إللي تبغينه بس تذكري إنك أنتي طلبتي فراقي وأنتي سعيتي لخراب بيتك وتذكري إني طلقتك غصب عني طلقتك برغبتك أنتي إذا عيالنا كبروا وسألوك عن سبب طلاقنا قولي لهم الصدق
قولي لهم إنك أنتي طلبتيه بنفسك رغم إستمساكي فيك لرمق الأخير وبعدها قول لها خلاص إصبروا عليه كم يوم لإنهاء إجراءت الطلاق وأرسل لك ورقة طلاقك إلين عندك وأنهي إتصالك بها ولاعاد تتصل عليها ولاتراسلها خلها فتره عند أهلها حتى تصحصح أصلا الحرمه المتزوجه ماتاخذ راحتها إلا في بيتها خلهاصدقني بإذن الله إنهارايحه تفكر في نفسها زين وتشوف الغلط إللي هيه سوته بحقك وحق نفسها وحق عيالها لأنه حتى لوحصل وطلقتها طلقه وحده بإذن الله رايحه تصحى من غفلتها وحتى أمها بترجع تراجع نفسها والأخطاء إللي إرتكبوها بحقك
وبنفس الوقت يعرفوا قيمتك ويعرفون إنك منت سهل ولاضعيف وإنك قوي ولاتسمح لأي كائن كان بإذلالك وزوجتك تتعلم درس بحياتها ماراح تنساه
وتعرف إن لا أمها وأهلها كلهم ماراح يهتموا لأمرها ولا راح يفكروا فيهاولو تطلقت أول إساءه بتسمعها من أهلها من داخل بيتها ومن أقرب الناس لها
ورايح يحسسونها إنها إنسانه فاشله في حياتها وإن سبب طلاقها هو فشلها صدقني بإذن الله تعالى إنها لترجع لك وهيه خاضعه ذليله أنت بس قوي قلبك شوي وطنشها وطنش أهلها بعد آخر إتصال عليها وإن شاء الله ربنايهديها و يصلحها ويردها لك ردا جميلا يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم داليا ; 12-03-2011 الساعة 12:13 AM
السبب: حجم الخط