بسم الله الرحمن الرحيم
أخواني و اخواتي الأعضاء :
سجلت في المنتدى لأشارك بمشكلتي , واتمنى أن اجد لديكم النصيحة و اسمع ارائكم التي قد تعينني على وضعي مع زوجي ...
بحاول اقولكم قصتي و ان شاء الله ما يزعجكم شرحي , لأني ابيكم تعرفون التفاصيل ,لعلها تساعدكم على الحكم بشكل أفضل ....
حالياً عمري 25 سنة , تزوجت من 5 سنوات لمدة سنة قضيتها بمشاكل مع اهلي و اهل زوجي , رغم اني كنت سعيدة و مرتاحة مع زوجي , لكن الناس اللي حولنا ما تركونا بحالنا لحد ما تطلقنا , والحمدلله على كل حال ...
جلست 4 سنوات , تقدمولي خلالها ناس كثيرين , جاني الاعزب والمتزوج و الارمل و المطلق , الكبير و الصغير , الغني و الفقير ,المتعلم و الجاهل , المتحرر و المعقد , وسبحان الله ما وافقت عليهم , لأن ربي ما كتب لي نصيب فيهم ...
لحد ما تقدملي في شهر شعبان الماضي , انسان وجدت فيه الطيبة و الحنان و الاخلاق و الدين و الكرم و الاحترام و الكثير من الصفات الجميلة ...
رغم انه يلف و يدور و عنده كذب حتى بأمور تافهة , بس كنت اتحمل هالشي منه , و يعصب عليي بسبب غيري , واتحمله و اصبر , مع اني والله ما اصبر , سبحان الله ربي كيف يصبرني عليه , حتى اهلي مستغربين كيف اتحمله و اصبر عليه و اخذ الامور معاه بهدوء و اتفهمه ...
و خلال ايام قليلة من الخطوبة ,تملكنا , بطلب منه ,بالنسبة لي كنت ابي اعرفه اكثر بعدين اقرر هل اتزوجه أو لأ , بس كان يبي كل شي بينا بالحلال , حتى الاتصال , و بدينا نجهز لزواجنا اللي كان مفترض يكون -بعد مشيئة الله -بعد عيد الفطر بأسبوع , و هو قبل ما يتزوجني مطلق زوجته من سنتين و عنده منها عيال و مستقرين مع امهم في بلدها خارج السعودية , اهلي اشترطوا عليه يطلقها رسمياً و يجيب ورقة طلاقها عشان يتزوجني,وهو وافق وقالهم قبل الملكة بجيب ورقة طلاقها , لكني رفضت وقلت له ما ابي اشيل ذنب عيالك و احس اني صرت سبب طلاق امهم , لو ربي في يوم كتب لك تردها عشان عيالك , ما عندي اعتراض بشرط انها ما تسوي مشاكل و تجلس في بيتها و تربي عيالها , ما ابي تحرم عيالك منك ...
و بالنسبة لزوجته ام عياله , طبعاً زوجي ما كان عنده نية يرجعها ابداً , لأنها جت للسعودية مرتين قبل و يجدد لها الاقامة وترجع , لكن يوم درت انه تزوجني , جابت العيال و تبي ترجع و رجعت , في اول يومين ما قابلها زوجي رغم انها في البيت نفسه معها العيال و خالها كمحرم لها , في ثالث يوم كان زوجي معاي عادي جدا وبيمرني ببيت اهلي عشان نطلع , لكن هي سوت له غدا و اضطر يجلس عشان خالها , بعد ما تغدا الرجال تعب و راح المشفى و الامور بدأت تنقلب , شوي شوي وخلال يوم واحد صارت امور كثييييرة , رجعها بدون ما ادري , ما يرد على اتصالاتي , ولا مسجاتي , تعبان و ياخذ علاجاته ومغذيات وانا ما ادري , المهم بعدها طلبت نتقابل عشان افهم وش اللي صار بهاليومين وش اللي غيره عليي , تفاجأت فيه يلف و يدور و يحاول يقولي عن الطلاق مو قادر , صارحته وقلت له تبي تطلقني , قال مو بأيدي غصب عني , و كان يبكي , رغم انه قوي الشخصية , و يقولي عشان عيالي مستعد اتحمل كل شي , المهم اني ما اخسر عيالي , انا كنت مصدومة , قلت له اوكي هم شي تكون انت مرتاح , تعاملت معاه بكل هدوء و احتويته و عاملته بحب , وكان يبكي بزيادة ويقولي ليش الدنيا ظالمة , لما لقيت الانسانة اللي احلم فيها , رح اخسرها ؟؟!!...
و بعدها تطورت الامور بزيادة , لما هديت شوي و فكرت , عرفت اني ما ابي اتطلق لأن الطلاق مو لعبة و خصوصاً انه ثاني زواج لي , وانه دخل عليي و بدون علم اهلي , خفت من المشاكل , حاولت اوصل معاه لحل , مافيه , مايقدر عشان زوجته , و كأني انا مو زوجته برضو ؟؟!!!
من رابع يوم العيد الى اليوم وعلاقتي فيه تغيرت , احسه يحاول يعاملني بقسوة و يكلمني بشكل رسمي جداً , مع اني حاسة انه من جواه غير , لأنه كان يحلفلي بحبه وان سعيد معآي واني الانسانة اللي يتمناه , والحين لما احلفه , هل انت تحبني ؟ احسه يختنق و يسكت مو قادر يرد , يغير الموضوع و يقولي انا مستعد اخسر حياتي كلها , بس عيالي يعيشون مرتاحين , لما اكلمه نتفق على الطلاق , و بالاتصال الثاني يرجع و يقولي انا ابي فرصة يمكن القى حل , اقوله مستعدة استناك العمر كله , بس ع الاقل اعرف وش تفكر تسوي , زوجتك من المستحيل انها توافق على زواجنا , يقولي طيب لو تزوجتك غصب عنها , انا عارف انها مستحيل تخلينا مرتاحين , بنعيش انا و انتي و هي وعيالي بتعب و هم ومشاكل , يرجع يقول انتي توك صغيرة و صدقيني الطلاق لصالحك , مو مضطرة تعيشين حياتك بتعب ....
و يوم السبت الماضي عشان اسأل الشيخ عن كيفية الطلاق , قبل الدخول أو بعده (لأن بيني وبينه صار في علاقة زوجية بدون علم أي احد) رحت للمحكمة وكان زوجي بيروح معي , بس جاه اجتماع مفاجئ و كلمني و حوله ناس قالي بخلص منهم واطلع ,لكنه تأخر وما قدر يجي , الشيخ سمع القصة كلها و نصحني اني ما اكمل لأنه رجل متقلب , وممكن يتغير بأي لحظة ,وقالي بالنسبة لموضوع الدخول تقولون للقاضي طلاق بخلوة و بس ما توضحون معنى الخلوة و لو اهلك سألوك تقولون ان الشيخ اللي هو انا قلت لكم ان مجرد خروجكم مع بعض يعتبر خلوة شرعية حتى لو بدون جماع , و صار ينصحني اني اتركه و ان شاء الله بيرزقني ربي بغيره , تخيل حتى قدام اخوي يقولي انت بنت شابة توك عمرك 25 بيجيك انسان احسن منه وخصوصاً انه يلف و يدور وانتي صريحة جداً صدقيني بتعيشين معاه بدوامة ومتاهة وبتتحملين عشان عيالك ,ماله داعي تتعبين نفسك ,والله ما افكر بغيره , مع اني حاليا و لسا ما تطلقت فيه اكثر من شخص يفكرون يتقدمون لي بعد ما اتطلق , و هم افضل منه بجميع النواحي ....
و كلمت زوجي وقلتله الكلام اللي يهمه , ان الشيخ قال نتطلق بدخول , وطبعاً هو ماكان معترض ابداً , بس قالي شوفي طريقة نوصل فيها الكلام لأهلك بدون مشاكل, و الشيخ اتصل عليه و قاله تعال بكرا انت و زوجتك لعندي بكلمكم , هو يقوله احنا متفقين على الطلاق , بس الشيخ اصر يقابلنا , ان شاء الله بنروح و نشوفه , انا للحين احس اني ما ابي اخسر زوجي , لأني متأكدة و كل اللي حولي متأكدين انه يحبني , بس يبي يطلقني عشان ما يخسر عياله , لأن أمهم قوية جداً و من النوع اللي ما يتسحي بكلامه ابداً , تخيلوا انها تقولي انا جيت و هو رافني وما يبيني , بس رجعتله غصب عنه , اللي مجنني انه قدامها ما يقول اي شي لصالحي , لكن قال لها انه رجعها عشان العيال , لكنه ما يبيها لشخصها , و مستعد يتحمل اسوأ الامور , اهم شي اولاد يتربون زين ...
والله كبر بعيني اكثر بتصرفه , حسيت انه اب حقيقي , عنده استعداد يتخلى عن قلبه و حبه و يعيش مع انسانة ما يحبها و عارف انه بيعيش بمشاكل معها , و يقول بتحمل في سبيل عيالي ...
قبل ساعتين اتصلت فيه امي و قالها ان الشيخ كلمه و يبينا نشوفه , حاولت امي تنصحه , لكنه قالها انا ابيها تعيش مرتاحة و عارف انها بتتعب معاي , ان شاء الله ربي بيعوضها بانسان يسعدها و يهنيها و صدقوني لو شفتها مرتاحة بكون مرتاح و سعيد ...
هنا انا اختنقت معقول لهالدرجة زوجي سهل عنده اكون مع غيره , يتمنى اني اتزوج عشان يفرح ؟؟؟!!!!
بسألكم وش الحل , انا ما ابي اتطلق , راضية بمرضه و راضية استمر حتى لو في زوجة ثانية , المهم ما اخسر زوجي , هو عارف اني ابيه و احبه , وما رضيت بالطلاق , الا لأنه اختار يطلقني عشان يرتاح ...
وانا طلبت منه اقابله قبل ما نروح المحكمة , وناوية اخليه يحلف على القرآن هل هو حبني او كان يتسلى , مع اني شبه متأكدة 100% من حبه , بس ابي اقطع الشك , يمكن تقولون ان هالبنت مجنونة , بس وربي ما انلام , والله اهلي و اقاربي مصدومين اكثر مني , كان كل يوم يجي عندي و يجلس بالساعات ,ولما يطلع يكلمني بالجوال او بالنت , وهو اللي يقولي يلا اخلصي و تجهزي لا تضيعين الوقت , تخيلوا كان يبي نتزوج برمضان ؟؟انا قلت مستحيل يعني وش تبي الناس تقول ع الاقل اصبر للعيد ....
عارفة اني بفارقه و نفسي اودعه , و هو وافق اننا نتقابل قبل الطلاق ...
وش رايكم , اعامله بهدوء و اودعه , ولا ابينله اني احبه و ابيه حتى لو بيطلقني ؟؟
ملاحظة :
** مشكلتي الكبيرة مع زوجي انه يلف و يدور و يخبي امور كثيرة وفي منها مهمة و من حقي اعرفها ...
(( تخيل لدرجة انه خبى عني انه مريض بالقلب و مسوي 3 عمليات ,و شبه ممنوع من العلاقة الزوجية , و رغم اني عرفت هالشي من شخص يعرف اهلي قبل الملكة , بس ما قلتله , سكت واحترمت انه ما قال هالشي , و قلت اكيد بيصارحني فيه , انا كنت ابيه كزوج و سند في الدنيا و يساعدني على امور ديني , و صارحني بمرضه بعديييييييييييين لما تكلمنا بالطلاق , و قلتله اني كنت عارفة و ساكتة عشان ما احرجه و طبعاً في امور كثيرة مخبيها عني , لكن التصرفات و الكلام يكشفها و اسكت و كأني ما سمعت شي , ما احب اجرحه ولا احسسه اني كشفته ))
اسفة جداً جداً جداً ...لو رسالتي كانت ثقيلة و كلامي اصلاً مدري كيف طالع ,لأني والله مصدعة و تعبانة ....
يمكن لما نكتب لناس ما نعرفها , نسترسل و نطلع اللي جوانا بدون قيود ....
اختكم
مهرة الفارس
12-10-2009, 04:02 PM
زوجي بيطلقني يوم الغد أو بعده , ( تم الطلاق)
ـــكم بلا استثنـاء ~
ضوابط المشاركة
العرض العادي
