مشكلتي أني عفويه ولكن؟؟؟؟؟
السلام عليكم ورحمة الله وبركاته
حبيت أعرض عليكم مشكلتي مع زوجي على أمل أنكم تساعدوني بتجاربكم الطويله.
مشكلتي ياأخوان أني عفويه والي بقلبي على لساني وماأعرف أجامل وحتى لو جيت بجامل أحس أني أكذب على نفسي وعلى غيري .
وأنا عارفه أنه لابد من المجاملات أحيانا ، ولاكن ليست في المواضيع الجاده صح ولا لأ ؟
وزوجي الله يهديه حساس كثير كثير فوق ماتتصورون (حشى متزوجه مره مو رجال
)
عاد أنا لما أقعد أتناقش معاه ونتبادل الآراء لازم بقول رأيي مثل ماأشوفه أنا
وهو الله يهديه مايتقبل مني أحيانا يبيني أقول راي يوافق رايه حتى لو موعاجبني وحتى لو أجامله على قولته.
أصبح أني أكذب عليه يعني يبيني أقول كلام من ورا قلبي وماني مقتنعه فيه أهم شي عنده أني أراعي شعوره.
والقهرأنه يقول عن نفسه ديمقراطي
بضرب لكم مثال عشان توضح عندكم الصوره:
مثلا:
( زوجي عنده صديق صدوق يعني بالعربي ماعليه كلام ويعتبره نفسه أوكي؟
عاد من كثر إعجابه في صديقه قام وكلمه عن بنت أخته على قولته يحس أنها تناسبه كثير ويصلحون لبعض . وصديقه وافق على العرض وقال لما يتخرج
ان شاء الله راح يتقدم لها .أوكي؟
بعد كم شهر بنت أخت زوجي تقدم لها شخص خلوق وماعليه كلام ووافقت عليه . وزوجي العزيز زعل يوم سمع وقام يمدح بصاحبه (عنده كنه ملاك) .وقمت أنا أتناقش معاه في الموضوع وقلت له هذا قسمه ونصيب ولاتأخر البنت وكل واحد ماياخذ إلا نصيبه.
عاد هنا صارت المصيبه.
قام يصارخ علي اشلون أني تصيرين معاهم والمفروض توقفين معاي وصاحبي أشرف من الشرف وماينعاب .
أنا قلت له ماصار إلا الخير وأنا ماسبيته وكل الي قلته قسمه ونصيب .
هو معترض يقول أنتي لو تحبيني وتعرفين وش قد صاحبي عزيز علي جان قلتي صاحبك يصلح لبنت أختك والمفروض ياخذون بعض.)
عاد أنا هنا توهقت اشلون أقنعه ؟؟؟؟؟
وماأقدر أجامله لأن السالفه صراحه ماتحتاج لمجامله.
وكثير من المواقف الي صارت لي معاه وساعات أجامله بس أبي أهدي الموضوع أو سايره في الكلام.
لاكن أنا الي أبيه منكم أنكم تقرون الموضوع عدل وتحاولون تساعدوني جزاكم الله خير .
لأني ماأبي أستمر معاه على الكذب واللف والدوران أبي أغير هالصفه الي فيه.
تحياتي: زاهده.