السلام عليكم ورحمة الله وبركاته
اسمحولي ازعجكم معاي باول مشاركة لي... ...فاسمحولي افضفض لكم عل وعسى القى منكم الحل اللي يريحني

مشكلتي باختصار شديد اني تملكت على قريب لي...وهو انسان رائع بمعني الكلمه ولكن الحلو عمره مايكمل فانا تربيت معاه من يوم كنا صغار وبحكم الجيره والبيت قريب من البيت ((قريب جدا)).. من واحنا صغار مع بعض وكبرنا وصرنا نفهم الحياة واخترنا بعض عن قنااااااااعه تامه وحب والحمدالله
وبعد كنا نشوف بعض باستمرار وباي وقت وطبعا مع وجود الاهل...

ولكن مثل ماقلت بسبب اولا ((القرابه)) ومن ثم ((التواصل المستمر)) علاقتناقويه ونعرف كل شي عن بعض وباي وقت وباي ساعه يقدر يشوفني بالبيت واقدر اشوفه واقدر اروح بيتهم باي وقت واحيانا كثيره نروح اماكن مع بعض وبوجود الاهل. وكل هذا طبعا ((بحدووود الاحترام)) حتى حبنا كان مخفى بصدورنا وكل واحد مايعبر للثاني ولا بنص كلمه ...وكان التعبير هو من خلال الهدايا بالمناسبات

ومرت الايام والايام وبدت تفتر العلاقه بمعني ثاني كل منا تعوود على الثاني وكنت اقول لو صارت ملكه اكيد بنقترب اكثر واكثر...وحاولت كثير ماشوفه ولا اكلمه ولكن فشلت بسبب سهولة التواصل سواء بالبيت او التلفون...وللاسف كل مره كنت احس باحسساس الفتووور ولكن اعزي نفسي بالملكه

وفعلا تمت الملكه وبعدها باءت توقعاتي بالفشل...تكلمنا مثل ماكنا نتكلم قبل الملكه سلام وكلام عادي ...ماحس باني صرت زوجته ابدا..احس باني اخته لانه المكالمه لاتتجاوز الخمس دقايق بالكثير واحسه اذا كلمني مثل اخوي اذا كلمني سؤال عن الحال والاوضاع فقط...

فكرت ليش وشو السبب...ناقشته بالموضوع وكان رده بانه يحس كـأننا متزوجين من زماااان وهالجواب احبطني تماما وسالته ليش ..ورد بانه تعودنا على بغض ...((لايروح تفكيركم لبعيد والله طول هالعمر ماصار بينا شي غلط ولكن القصد هو انه نعرف كل شي عن بعض)).
وبعدها بفتره بعد عاتبته وسالته اذا هو فعلا يبغيني.. وقالي بانه مقتنع تماما وهذا حب من سنين وسنين فقلتله ليش اذا كلمتني مثل اي شخص يكلمني ؟ رد وقال بانه لو بداخله كلام يستحي يقووووله او يعبر عن شعوره ونصحني بعدم التفكير بهذه الطريقة.

ولأنه حس باني افكر وايد بالموضوع فكر بانه يجدد...وقال بنطلع اماكن انا وهو وبس وحدد الاماكن وشو بنسوي وووين بنروح وكل شي كان حلو وفعلا حسيت بفرحه ولكن كلم اهلي بانا بنطلع مع بعض وكان ردهم سلبي ومن بعدها مايفكر يحاول ثاني مره
وبعدها قالي ان شاءالله بتحسين بالتغيير بعد العرس لانه بنطلع وبندخل براحتنا وبتقوى العلاقه اكثر وبتحسين بالفرق اكيد وانا مابقصر معاج بشي

شو اسوي احس اني غير متزوجه مااحس بانه تغير الوضع عن قبل او بعد الملكه ...سمعت كثير وقريت الكثير عن البنات بهذه الفتره يكونون اسعد البنات ..ولكن انا حالي العكس مااحس بانه جد جديد بحياتي
تعبت من التفكير وماقدر ابدأ واساله بعد لأني انا دايما ابدأ بهالموضوع.

نسيت اقولكم ترى اعمارنا متقاربه...ومادرى اذا كانت فعلا تربيتنا مع بعض وشوفتنا الدائمة غلط او ايجابيه....اذا كانت غلط وايد ناس مروا بهالتجربه وكانت ايجابية بالنسبة لهم..ليش بالنسبة لي سلبيه؟؟؟ ليش حتى كللللمه ماسمعها ولا احسسس بانه فعلا يبغيني؟؟ مع اني متأكده مليون بالميه انه يبغيني لانه وايد حاول عشاني وبعد اذا بيهديني دايما هداياه قيمه جداااا
وبالنسية لي دايما اسويله مفاجات بالمناسبات وهالمفاجات اتعب عليها ودايما احسسه باني قريبه منه
بس وووين الغلط؟؟؟؟؟؟ وشو ممكن اسوووي

ساعدوني لاني عن جد تعبت

أختي الكريمة أهلا ً وسهلا ًبك بين أخوانك وأخواتك في هذا المنتدى الرائع ومشاركتك ما فيها أي ازعاج ولا شي وأي مشكلة أوشي (الله يبعد عنا وعنكم المشاكل) المنتدى كله يرد عليكي ويفيدك إن شاء الله....
أولا ً ألف ألف مبروك أختي وأدعو الله أن يجعله زواجا ًمباركا ً ويرزقكم الذرية الصالحة....آمين
أختي رأيي انه الموضوع ما يستاهل كل هالهموم والتفكير انتي ذكرتي انكم اخترتو بعض عن قناعه تامه وحب والحمدالله وهذا يكفي إنكم تصيرون من أسعد الأزواج...
أعتقد انه كل اللي مزعجك هالشيء وهذا يمكن لأنه البنات اللي سمعتي عنهم ما حصل لهم اللي حصل معاك وأقصد بكلامي ((التواصل المستمر))...
أختي نصيحة مني لا تقارني حياتك بحياة الآخرين وعيشي أيامك وحاولي قدر الإمكان انك تبعدي هالأوهام من راسك
يكفي انه زوجك يهتم فيك وحاول انه يجدد علشان يرضيك ويهديك دايما هدايا قيمة وأنا أعتبره الزوج المثالي الله يخليه لك
استغلي هالفترة وقوليله كلام حب جددي معاه مثل ما هو حاول يجدد وبتحسي بالفرق إن شاء الله واتذكري دايما ً أرجو أن أكون قد أفدتك بشيء أختي الكريمة...
تحياتي لك
أخوك محمد

__________________

أنا أشوف يا قلبي إنج عدتي ألف مرة إنها فترة فتور وإن شالله خير يعني أزمة وتعدي لا تحاتين بتحسين فيه لما كونين ببيتج

معاه شي طبيعي لانها انتقال من مرحلة لي ثانية .. بس تصدقين شفتي وضعج معاه متربيين مع بعض وبعدين تتزوجون صعبة يكون

أخرت العلاقة الأخوية هذي زواج لانكم مثل ما تقولين صرتو مثل اخوان بس سبحانه نصيب وان شالله خير لا تحاتين مع الوقت بتحسين

انج زوجته ولا تفكرين وايد وعيشي حياتج دقيقة بدقيقة وخلي( بعدين) (ولما) حق ربج اهوا يحكمها لا تحددينها وتقريرن فيها

الحين

وسلام

السلام عليكم
اختى مشكلتك بسيطة و صدقينى الزواج غير كذا لكن لازم انتى تغيرين تفكيرك وماتدخلين على حياتك وانتى بهذا التفكير المحبط و اصلا الرجال كلهم كذا يأخذون الأمور ببساطة وأهم شئ انك تصلين استخارة

الزواج إن شاء الله بغير هالشي لماتكونون بروحكم و تصير بينكم لمسات و همسات و أشياء ثانية ...

كل حاجة حتصير عال العال ما تخافيييييييييييييش


سميدعة

__________________

Memories تسلم على الرد ولكنك قلت (( استغلي هالفترة وقوليله كلام حب جددي معاه مثل ما هو حاول يجدد وبتحسي بالفرق إن شاء الله ))

ممكن تقول لي شلوووون اقول هالكلام لاني ولا مررررره قلت من هالكلام ولابديت..وعذري انه لازم هو يبدأ .......اوكي انا الحين مستعده ابدأ بسسسس كيييييييييف؟

واشكر كل من رد
وبانتظار ردود باقى الاخوان والاخوات

أختي الكريمة الصراحة وضعتيني في موقف محرج ....
كنت أتوقع إنك ما تخجلي منه وقلت يمكن تعرفين بعض الكلام في الحب فقلت أشجعك على قول هذا الكلام لزوجك..
بس ولا يهمك...
أنتي قلتي انه هو اللي يبدأ بالكلام....
طبعا ً عندكم جوالات ارسلي له رسايل تعبرين فيها عن حبكي الشديد له....
و إذا ما تقدرين تعبرين ترى فيه رسايل حلوة كثير الناس يتبادلونها يعني ممكن تحصلين في جوالات صديقاتك وبعد ممكن تحصلينها موجوده في مواقع و منتديات الجوالات و بعدين ومع الوقت شوي شوي وبتصيرين تكتبين له كلام من تعبيرك و بعدها راح تتعودين ويزول الخجل و وآخر شيء راح تلاقين نفسك تسمعيه هالكلام بصوتك.(هذه النصيحة قرأتها مرة في المنتدى وعجبتني أستأذن وأشكر صاحبها).
و قدمي له الهدايا في المناسبات المهمه وأيظا من دون مناسبات وان شاء الله راح يزيد حبه لك ولاتنسي أن تضعي داخل الهدية رسالة أو ورقة مكتوب فيها من الكلام اللي يعبر عن قوة حبكي له(تقدرين تسوين بحث في المواقع عن رسائل الحب والإهداء)
وما أوصيك أهتمي فيه وتذكري أنك تبتسمي له دايما ً ...
أنصحك انك تزورين مفضلة عالم المقبلين على الزواج بتحصلين كل اللي يعجبك من أفكار ممتعة ومفاجآت ونصائح و توجيهات...
وأرجو من الأخوة انهم يفيدون أختنا لأني أعزب وتوني صغير على كلام الحب
وسامحيني أختي هذا اللي أقدر عليه....أرجو اني أكون أفدتك بشيء
وأي استفسار احنا حاضرين...
تحياتي لك

__________________