السلام عليكم
اخوتي محتاره من وين ابدأ وأحس افكاري متشتته ومو عارفه شلون أفسر الأمور لاني تعبت من وضع المبررات والاحتمالات لتصرفات زوجي
حاولت أتعايش على كثر ما أقدر لكن ماقدرت أستمر على هذا الحال تعبت انذليت انجرحت انداست كرامتي كل هذا لأني حبيته بصدق وبأقوى ماعندي بديته على نفسي حرمت نفسي من أتفه الأشياء بس أبي رضاه علي كنت اناقض نفسي وأقول اهو مو قصده ويمكن يفكر بطريقه غير ويمكن ويمكن
كنت أمشي الأساءه لما تكون من صوب أهله وأقول هذي أمه هذي أخته ومابي مشاكل بيني وبينهم
كنت أسكت ما أتكلم لحد ماوصلت لدرجة المسخره يتمسخرون علي قدام كل العايله أول مره اتكلم عنهم مع إنهم أساؤو لي كثير بس في ذيك المره ما قدرت اتمالك نفسي وانهرت قدامه وقمت أبكي وقلت له أنا مو قادره أتحمل أكثر نغزات سكت كلام باسلوب جاف سكت اما اني اصير مضحكه للكل لا ما أقبل وفعلا كلمهم باسلوب هادي وقالهم إن هالشي ماينعاد وأنا هنا ارتحت لأني حسيته واقف جنبي حسيته خايف على مشاعري لكن بسرعه تبدل وقام يلومني لأني خليته يكلمهم وكل شويه يذكرني بأنه تكلم كلمتين عشاني
وغير التدخلات حتى في علاقتنا الخاصه أمه تسأل اسأله محرجه والله إن أمي ماعمرها تكلمت معاي بجرأة وسألتني هالأسئله
وزوجي عادي عنده الوضع
مجرد مايقول ظهري يوجعني يسألون كم مره في اليوم تنام معاها يمكن هذا إللي مسبب لك ألم ولييش ماتطلع مع أصحابك ليش لاصق فيها ..........................
حتى لما يشتري لي اي شي عطر او فستان جديد وأدخل عليهم لازم يمررون الكيس على وحده وحده ويشوفون إللي شاريه لي وبكم سعره وليه غالي حتى اوقات اكون شاريه ملابس داخليه او أشياء خاصه مابيهم يشوفونها بس انحرج لما أمر عليهم وامه تسألني شنو شاريه وخواته بنشوف واهو على طول يقولي خليهم يشوفون عادي حريم مثلك
مالي خصوصيه في اتفه الاشياء طبعا هذي كانت بداية حياتي مع هالعيله لحد مامشت الايام وتعودت على تطفلهم وصرت احسها أشياء ماتأثر فيني مثل ماكانت تترك أثر قبل وكان زوجي في وقتها يبيني احمل وكل شهر يوديني المستشفى احلل
وبعد ثلاث اشهر من زواجنا حملت
كان مبسوط وخايف علي مايببني اتحرك يدلعني و يأكلني قدام امه وخواته وزوجات اخوانه وأمه تحاول تغثني وتبعده عني على قد ماتقدر وبأساليب وسخه
لما يقول زوجتي جميله تسكت
وبعدها لازم تجيب الموضوع فلانه جارتنا بنتها قمر وتوصفها وتوصف جسمها وخالك كان يبيك لوحده من بناته جميلات كل وحد أحلى من الثانيه....
ويوم جات لها فرصه ماقصرت اهو له علاقه بوحده وتركها قبل لا يعرفني وقبل لانتزوج هالوحده تبغى توصله لان مغير ارقامه دقت بيتهم وكلمت امه وقالت لها ابي رقم ولدك وماقصرت
الام عطتها الرقم وأنا مادريت إلا بالصدفه سمعت أخوه يقوله دقت عليك ولا لا امي عطتها رقمك وأخذت رقمها وإذا تبيه قول لأمي
والله حسيت بقهر بقلبي ماكلمته بالموضوع كنت أنتظره يتكلم كنت اقول يمكن فهمت غلط صرت أشوف جواله مايفارقه وإذا بغى ينزل لأهله ياخذ الجوال لما يرن جواله وإهو في الشاحن كان يركض له وأحس على وجهه إرتباك
كنت اموت من الداخل ادعي على اليوم إللي عرفته فيه وحبيته
ومع هذا سكت لحد ماشفت بعيني رساله منها تذكره بأيام حبهم وبالأغنيه إللي يسمعونها مع بعض وطلعاتهم والفلم الجنسي إللي صار بينهم
خلاص حزتها جاني ألم في جسمي كله وضيق في صدري
كان وقتها يسبح طلع من الحمام جاني وأنا على السرير وفي وفي عالم ثاني حس ان فيه شي سألني احد دق على الجوال وانا اناظره وساكته اخذ جواله وشاف الرساله قالي بكل ثقه وقواة عين هذا إللي مضايقك ترى هذولا شباب يسون هالحركات عشان تخترب علاقتنا ببعض وقام يلف ويدور قلته إني عارفه الموضوع ولاتكذب علي وقلت له امك إهي إلا تساعدك على خراب حياتنا و عاتبته صار يدافع عن نفسه وعن امه وقال إنها كبيره بالسن وماتفهم وماتقصد وإهو ماراح يرد على هالمرأه لانها متزوجه وعندها عيال وكل شي انتهى بينهم
انتهى الموضوع ولكن ضلت آثاره في قلبي لليوم ابتعدت عن مجالسه اهله ومابيني وبينهم إلا السلام وإهو لما تصير اي مشكله بينا يركض ويقول لاهله ويجي بعد ساعات طويله واهو نافخ ريشه علي ويقولي مواضيعنا لاتقولينها لأهلك كل شي خليه بينا وأستغرب لما أكون نازله معاه بنطلع ولا الموضوع عندهم ويسولفون فيه أو اخته تسألني عن شغله بيني وبينه وأمه تستفسر عن شئ قلت ابيه منه وتصرفاته صارت قاسيه بزياده يتنرفز على اتفه سبب ويقولي إنتي جاهله وبعدك مراهقه وعقلك صغير وغيره من الكلام الجارح صار صوته يرتفع بمجرد ما أناقشه بأي شي يتهمني بأشياء مو فيني انتي حقوده انتي غيوره
حقوده على أهلي ماتحبينهم مع إني ما اسأت إلهم في شي بس ابتعدت عنهم لأن مابي مشاكل
يقول إني اغار من زوجه أخوه بس لاني طلبت منه يطق الباب قبل لاينزل في المجلس لأن اكثر من مره تكون زوجة اخوه جالسه وبدون أي شي يسترها واهو يدخل فجأه
فاتهمني بالغيره منها وإهي في عمر أمي
ولدت بنتي بعد كم هائل من المشاكل صارت مشكله بعد ولادتي بكم يوم كان يبيت معاي عند اهلي وامه تحرق الجوال من الاتصالات ولو مايرد على مكالمه تدق علي وتطلبه مني كانت تقوله عيب تنام بيت اهلها وتعال البيت ضروري
وأقل من نص ساعه وترجع تدق ليش ماجيت والله انه بنفس هاليوم قالي بنام في الشقه وحاول معاي أرجع وانا ماصار لي خمس ايام من ولدت وكنت في حاله نفسيه سيئه رجعت لشقتي بعد ثلاث اسابيع لقيت اغراض ناقصه حتى غرفة نومي دخلوها وكسروا قفل الباب عشان ياخذون آله الجري انقهرت تكلمت معاه لقيته يدافع ويقول انا راضي ومافيها شي وهذا اخوي وأنا سمحت له يدخل وياخذ إللي يبغاه ومالك دخل قلت له طيب غرفة نومي وصوري إللي في الغرفه عادي بعد يشوفها صار يرفع صوته علي ويصرخ مثل المجنون وتجمعوا اهله وفشلني قدامهم قالهم أنا ما أبيه يساعدهم ومابيهم ياخذون شي فشلني وسواني مثل البزر
وغيرها من المشاكل إللي تعور القلب
تطور زوجي صار يقولي روحي لأهلك ما أبغاك والأسباب ماتستاهل لما أروح مايراضيني يقولي طلعتي برجلك رجعي لحالك
أي نقاش يقولي مو مرتاحه طلبي الطلاق وإللي مايطلق مورجال
واذا جيت اناقشه بوقت ثاني يقولي ليش تشيلين بقلبك وتزعلين مو مرتاحه طلبي الطلاق وأطلق
حسيت نفسي رخيصه عنده
اي مشكله يعرض علي اني أطلب الطلاق منه واذا قلت له ليش ماعندك حل غير الطلاق ليش مانتفاهم يقولي انا كذا تبيني ماتبيني طلبي الطلاق ابوي وخالي كلموه ينكر تصرفاته ويبرر
لما صممت اني خلاص ما أرجع له وضليت عند اهلي
ثلاث شهور اكتشفت اني حامل
وعدني بيتغير وبنعيش حياه حلوه رجعت معاه مده بسيطه ورجع لسوالفه واصراخه وعصبيته
ولدت جبت ولد كان مبسوط انه ولد ويشابهه وفتره بسيطه ورجع يسوي مشاكل من لاشئ يثير الجدل على تفاهات ينتظر مني كلمه عشان يسوي مشاكل يوصلها للطلاق صبرت وصبرت لحد ماصارت سالفه تافهه وهي إني استشورت شعر بنتي وشلت لها شعرتين من حواجبها لأن متلاصقين المهم اهي قالت له بابا امي شالت شعر من حواجبي وقام يصارخ مثل المجنون كالعاده وغلط علي سبني وسب أهلي قتله لاترفع صوتك لاتكبر المواضيع قام قرب مني ويمسكني من يدي بقوه قدام الأولاد اقوله عورتني اتركني وقصر صوتك لاتفضحنا يقول إنتي تبين الفضايح صرت اركض وأروح أسكر النوافذ وأقوله اسكت لاتفضحنا ودخلت الغرفه ولحقني قلت له اطلع من الغرفه يقولي مو بكيفك دزيته بالقوه وطلعته رجع بعد خمس دقايق وأنا متغطيه بالفراش وأصيح يقولي ترى مابتكسرين خاطري وانتي وحده جاهله ومريضه نفسيا ومفروض مكانك مستشفى الأمل قمت أقوله ليش تسوي كذا ليش تدور مشاكل ليش ماتحترمني اذا ماتبغاني تكلم مسكته من ملابسه وقمت أشده واقوله ليش كذا تعاملني وإهو يقولي انقلعي عني مارضيت اوخر عنه كان نفسي يضمني ويقولي آسف سامحيني لكن سوى العكس صفعني على عيوني اهله سمعوا الصراخ وتجمعوا أمه صارت تصرخ علي وتقولي بتمرضين ولدي وبيجيه الضغط والقلب منك وتدعي علي وتتحسب أقولها ياعمه بدل ماتنصحينه يحترمني ويقصر صوته تقطين اللوم علي وإهي تتحسب وتقولي اذا مو عاجبك تركيه وروحي عند اهلك "نفس اسلوب ولدها سبحان الله "أقولها شوفي عيوني ضاربني تقولي انتي السبب تخلينه يفقد اعصابه إهو يصارخ وامه تصارخ وأنا أرجف حسيت اني في غابه واهم مثل الذيابه متجمعين علي وعلى اعيالي قلت لهم انتوا ظالمين وامه تقولي روحي لاهلك ادا احنا ظالمينك وزوجي يتكلم مع اخوه ويقوله خلاص ما ابغاها خلها تنقلع وجاء في وجهي وقالي تسمعيني ما ابغاك لبست عباتي ودقيت على اهلي طلعت وانا بس كلام ينعاد في اذني اهو يقول انقلعي ماأبغاك وامه تقولي روحي لأهلك
خذوني اهلي من الشارع وأناحافيه وحالتي حاله شافو عيني متورمه ودوني المستشفى
عرض علي الدكتور اني اقدم بلاغ رفضت لكن يوم سمعت اهلي كلموا اهله وانكروا انهم طردوني
وامه تقول انا ركبت لهم اسأل وش فيهم ماطردتها ولا شي وإهو يقول ماضربتها اهي ضربت نفسها وماطردتها إهي طلعت. بروحها هنا قلت مايستاهل ورحت قدمت بلاغ ضده في مركز الشرطه كنت ابغاه يرتدع لأن مايحسب احساب لأي احد حتى اهلي
راح مركز الشرطه ونكر ورفض يوقع تعهد يقول ما أوقع وأنا ماسويت شي بعد ماطلعوه اهله بكفاله دق على بيت اهلي ويهدد يقول بنتكم اللي بتنضر من هالسالفه وتنازلوا أحسن كلمني وقالي أنا ما أبغاك هذي اول كلمه قالها لي وإذا وصل الموضوع المحكمه بطلقك لأني ماراح أعيش بأمان مع وحده مثلك
رديت عليه اني أنا إللي مو حاسه بأمان طرد وضرب وإهانه من أهلك انتهت المكالمه بتهديد منه
أخوانه راحوا بيت خوالي وعمامي وقاموا يذمون فيني ويقولون إني قليلة ادب وما أحترمه عشان كذا إهو يعصب وقالوا بعد إني ما أحترم امهم وصوتي دايما عالي ويسمعون صراخي واخوهم مافي مثله وإهو متحملني كل هذا عشان اتنازل أمه ماخلت كلمه ماخلت عيب ماحطته فيني وسخه ما انظف ما أطبخ ولدها متحملني وانا ماكله خيره ووو...
وصل الموضوع للهيئه استدعوني واستدعوه شافني وعيوني متورمه ومغطيه
حسيته مو مهتم بس خايف على نفسه دخلنا عند المحقق قام يحقق معاه واعترف قال إيه طردتها بس ماقصدت أضربها ايدي بالغلط صارت بعيونها قالي المحقق وش تبين قلت له تعهد بعدم تكرار الضرب والاساءه ويشوف لي سكن مستقل رفض وقال ما أقدر ماعندي إمكانيه وأهلي ماضروها بشي عشان اطلع ايجار وقع تعهد ومشى وأنا مشيت مع اهلي صار لي شهر
عند اهلي ما سأل عني واعياله ماشافهم إلا مرتين وعرفت إنه ماخذ إجازه وسافر ثلاث بلدان وكل يوم يعرض صوره في الوتساب ويحط الحاله انه مرتاح وماراح يهتم لأحد ولا بيسوي شي غصب عنه ويوم يحط آيه عن الطلاق
تعبت من هالحياه إهانه وفضايح عند أهله والكل يتدخل ويغلط علي وبعدها ينكرون ماقلنا ماسوينا تعبت
مادري شلون أتصرف أفكر بعيالي مابيهم يتشتتون ابيه يحترمني أبي أرد إعتباري ويحس بقيمتي مابي أرجع عند أهله بعد كل هالاهانات
ابي اعيش بعيد لأني خلاص تعبت
ساعدوني أبي رآيكم..

حبيبتي هذا الرجال ما يتعاشر بصراحه ' واهله واضح من أساليبهم وتصرفاتهم انهم مايبونك
وقاعدين يقوون زوجك عليك عشان يصير ضدك ' وزوجك طاعهم الله يهديه وأعطاهم جوهم ، معناته مستغني عنك ومايبغاك ، وفوق هذا كله قلك هي على بلاطه تبي الطلاق اطلق !!! وهو ما يبي يطلق من نفسه عشان الغلط مايجي منه
والعيشه مع اهل الزوج من هذا النوع انا أشوفها مستحييييله وبالذات لو كان ولدهم معاهم الي هو زوجك !!!! وان رجعتي تعيشي معاه بتفضلي في مشاكل ماراح تنتهي طالما هو مايبي يتغير وأهله يبغو يكرهونه فيك

وأهلك كيف ساكتين عالموضوع دا ؟؟!!! طالما وصلت للضرب فهذا انسان مايتعاشررررر
وفوق ذا كله مبسوط وبيسافر كل مكان !! مع السلامه هذا باااايع

وربي قلبي معاكي وانشالله ربي يختر لك مافيه الخير
استخيرررررررررري في موضوع الطلاق ولا تترددي وربنا معاكي

أختي اهلي مو ساكتين أكثر من مره يكلمه ابوي وخالي بعد كلمه كان يرمي اللوم علي ويقول أنا اللي أنرفزه وأنا سبب كل تصرف يصدر منه ويطلب منهم اني ارجع عنده وبس يومين ويرجع من جديد
وفي هالشهر تعرض لي مرتين وانا طالعه مع اهلي كنا طالعين نشتري اغراض لحقنا لبنده واخذ عيالي من عندي وصار يهددني يقولي انتي في مسؤوليتي وتطلعين وانا ماادري عنك وراح تتحاسبين قانونيا
والمره الثانيه شافنا واحنا طالعين وصار يهدد اخوي ويقول انه بيطلبني في بيت الطاعه
والله راسي بينفجر علي من كثر التفكير ليش يسوي كل هذا فيني ايش سويت فيه..

الحمد الله على كل حال
اختي إحنا صار لنا 4سنوات متزوجين وعندنا ولد وبنت وهذا حالنا ماتغير ولو كانت مشاكلنا بس من اهله كان مادقيت خبرهم لكن إهو أساس المشاكل وكل شي يصير إهو إللي عاطي أهله مجال يتدخلون ويغلطون
وأنا مستحيل ابادر بصلح بعد إللي صار هانوني وصرت فرجه قدام العايله كلها وش باقي لي من كرامه إذا رحت وصالحته..

حاليا سوي مثلي

اكتبي حالتك في الواتساب
تنام عينك والمظلوم منتبه. يدعوا عليك وعين الله لم تنم



والله ان قلوبهم تتزلزل لان الظالم مهما طغى وتجبر. فيه خوف من الله لكن يأمن مكر الله فيه


ولاتحطين في الواتساب شي انك تبين الرجعه ابدا
ولاتشتكين حالك عند احد. من قرايبك
لان اللي يحبك يحزن عليك ويتألم قلبه واللي يكرهك يشمت فيك

لذا اشكي لله. وتعالي هنا كل ماضقتي



ماراح اقول مثل غيري اصبري وطبيعي يوقف مع اهله

لان الطبيعي انه يوقف مع اهله بحدود

اما للدرجه هذي. لازم ينحط حد لهالمهزله والمفروض هو من يفكر كيف. يرجعك

خليه مبسوط في اهله وخواته. أخر الليل كل وحده نايمه. عند زوجها وهو يساهر الهم والقمره



لاتحسبين انه مبسوط من كلامه اللي يكتب. هذي محاوله للتمرد على الواقع ومكابره لو هو فعلا مو مهتم ماهو مضطر يكتب
وتلقينه يبي ينفش ريشه عند اهله


وكل وحده وواحد من اهله ظلمك بتشوفين قدرة الله عليه وانصافه لك
والايام تثبت لك

أسئلي مجرب. ههه


ان شالله لاخذت اللاب توب من عند اهلي. بكتب بترتيب

من يوم نسيته وانا. ضايعه
ماعرف اكتب بالجوال
المهم ولاتتعبين قليبك. المرهف الحساس

ألزم
ماعليك صحتك
عادي خليهم في طغيانهم يعمهون
وعيشي حياتك. اعتبريه مبتعث


تعانين من وضعك عند اهلك ؟
فيه احراجات او نقص في المال ؟

__________________
..

كتبتها في الوتساب
وسالفتي معاه انتشرت من اول يوم خوانه دارو بيوت خوالي كلهم وعمامي كلهم وصارو يتبلون علي أنا قليلة أدب وماعندي أخلاق ما أحترم أخوهم ولا أحترم امهم مع إني مالي علاقه بأمهم متى ما أحترمتها ومتى غلط عليها مادري كله افتراء وكذب
ولو ماني مجبوره أمر عليها وأشوفها يوميا وانا طالعه وانا داخله كان قطعت علاقتي فيها وفي بناتها من زمان
وأبوي بالعكس مو مقصر معاي بشي عطاني مصروف وشرى أغراض عيالي كلها بدون ما أطلب
الله يخليه لنا..
وزوجي والله لو ماعندي إعيال منه ماجلست دقيقه أفكر فيه بس والله خايفه على إعيالي مابيهم يبتعدون عني لو صار شي
وأبي احد يفهمني إذا المرأه محترمه زوجها ومهتمه في إعيالها ونفسها ومتحمله اهله ولقافتهم وتصرفاتهم ليش
يعاملها زوجها هالمعامله ؟

وضعي شبيه بوضعك حبيبتي بس انا عندي ولد واحد ...

ربي ايكون بعونك

حاليا انا مسوية برنامج كالاتي : ارضي والديا و ادلعهم و اسايسهم لاقصى حد حتى تكون دعوتك مستجابة و تبري ذمتك يمكن اغضبتي اهلك من غير ما تحسي....

قراءة سورة البقرة يوميا (حزب بعد او قبل كل صلاة)

المحافظة على الصلوات في وقتها و حبذا الرواتب و الاستخارة و الحاجة

قيام الثلث الاخير من الليل بالدعاء و الصلاة

الاستغفار و الصلاة على الرسول متى ما جلستي على النت او جالسة وحدك خلي لسانك رطب بذكر الله

اذكار الصباح و المساء ،، ثم التصدق و لو بدرهم كل يوم بنية الفرج...

الهدف ارضاء الله حتى تستريح ضمائرنا و نوقن انه ابتلاء للتقرب لله و باذن الله ما يصير الا خاطرك طيب

__________________
لاتضع كل أحلامك في شخص واحد ...ولاتجعل رحلة عمرك وجه شخص تحبه مهما كان صفاته ولاتعتقد ان نهاية الأشياء هي نهاية العالم
فليس الكون هو ماترى عيناك

[img]http://im33.***********/edShu.gif[/img]

الله يفرجها علينا ان شاء الله
أنا متكله على ربي وإن شاء الله حقي وكرامتي ترجع لي لأني مستحيل أرجع وأعيش هالوضع مره ثانيه
الله يكون بعون الجميع .

جعل الله لك من كل هم فرجا ومن كل ضيق مخرجا..
استخيري الله في اﻹستمرار أو اﻹنفصال..
وألحي على الله بالدعاء خاصة في الثلث اﻷخير من الليل فإن سهام الليل لا تخطئ..
الله يلهمك الصواب..