والله يا أخواني أنا تعبت وطفشت من زود المسؤولية علي..
رغم اني لست أكبر واحده في أخواني.. ولكن لأن أخواني الكبار مستقلين بحياتهم ومتزوجين..
وأنا بطبعي خدومة وأهتم بأمور غيري أكثر من نفسي..

صار أهلي كل شيء يرموه علي أنا،، كل المشاكل كل شيء يصير يحطوني أنا بوجه المدفع..
يعني اشتغل،، وأرجع من الدوام أشوف طلبتاهم وأحيانا أنا اللي أطبخ وبعدين أنزل أشتري الطلبات
وأغسل الصحون واللي يريد مشوار أوصله.. واللي رايح للدكتور أروح معاه..واللي رايح المطار أوديه..واللي يبغي يتفسح أطلعه، حتى الوالد نسي اني بنت يطلب مني أدور عمال للصيانه وأجيبهم وأوقف معاهم..
يعني صرت أشتغل طباخ وبشكارة ودريول وسباك ونجار

المشكلة اني اذا مليت وتعبت يشوفوني اني مقصرة رغم ان اختي بيني وبينها فرق صغير بالعمر..
لكن مدلعينها، حتى لما قلتلهم أنا ما راح أسوي شغل البيت وخلوا اختي هي تسوي جابوا خدامة علشان المسكينة ما تتعب نفسها..
صرت أحس بتفرقه في المعاملة وانقهررررررررررر
حاسة اني صارت عندي عقد نفسية وغيرة من أختي بسبب انهم يدلعونها هي وأنا لأ..
وكمان مليييييييييييت من كثر المسؤوليات..

والله أحيان كثيرة أبكي من كثر ما أنا حاسة ان كل شيء على راسي أنا..

واللي يضايق أكثر ان الوالد بعد كل هذا اذا حب يعصب يعصب علي أنا،، ويطلعني دايما الغلطانه بكل شيء..
وهذا اللي خلاني من يومين أعصب عليه واتهاوش معاه حاسه اني كنت مكبوته وطلعت كل اللي بداخلي..
وفي الآخر اخواني غلطوني اني سويت كدا..
انا عارفه اني غلطانه بس والله حرام أحس بالظلم.. لأنهم ما يقدرون وخصوصا أبوي..
لا والحين ماشية معاه زيادة بالعند وقاعد يدلع أختي زيادة قدامي علشان يغيظني..

والله ما أنا عارفه كيف أتصرف.. ومتضايقة وضميري يعذبني اني ما أتكلم معاه وما أحب اني أكون عاقه..
وفي نفس الوقت مو قادره أروح أراضيه وأصالحه لأني مقهورة مقهورة..

حتى فرحتي بالخطوبة ما خلاني أعيشها وكل شوي ينكد علي.. ورغم انه رفض ناس كثير تقدمولي..
الحين هذا العريس هو اللي مختاره لي وهو اللي اقنعني فيه.. ولما وافقت واتخطبنا بدأ يطلع فيه العيوب ..
مع انه ما يسوي كدا مع أختي.. وبالعكس دايما يدلعها ويضحك معاها ويكلمها عن خطيبها..

الغريب انه دايما يقول اني أطيب واحده في بناته وانه يحبني..
وأنا والله ما عدت أعرف هو يحبني ولا يكرهني؟؟!!