السلام عليكم

تردد بطرح مشكلتي.. لكن ماقدرت اصبر اكثر..

انا فتاه ادرس بالجامعه وطبعا جامعتي مختلطه.. والسنه الي طافت.. صار معاي بالصف يدرس طالب سعودي.. هو دايم يطالعني.. بس انا تجاهلت النظرات.. ماصبر اكثر جه وكلمني وقام يسالني بحجه بستفسر عن الدرس.. اليوم الي عقبها قام يشرح لي دروسي وهو محترم جدا. ومره طلب ايميلي بحجه انه راح يطرش لي ملخصات تفيد بالامتحان وانا عطيته ايملي.. وبالفعل طرش. وبعدها ضافني على المسنجر.. وكنا نسولف بس عن الدراسه .. ويوم عن يوم سوالف ودراسه لين ماعترف لي انه معجب فيني بقوه ... وماقدر يخبي هالشي.. انا طبعا انصدمت وماعرف شرد.. لانه هو متزوج.. واكبر مني بوايد.. انا بدايت العشرين وهو نهايت الثلاثين او اربعين . وعنده عيال.. انا قلت له لا خل علاقتنه زماله دراسه..
وصرت السنه الثانيه وصرنا بنفس الصف.. وصار كل ما البس شي يجي يوم ثاني يعلق ونوعا ما احسه يغار..ودائما يلمح لي انه لازم البس عبايه. واذا شخص نظر لي او حاول يكلمني يعصب ويتنرفز وحركاته واضحه بالجامعه. وبعدها اعترف لي انه يحبني ويبي يتقدم لي رسمي.. انا انصدمت ماعرفت شسوي؟؟؟؟؟؟ قلت له شلون انت متزوج ومن ديره غير ديرتي.. وفوق هذه الاطفال وفارق السن الي بينه.. وقام شرح لي قصته وانه زوجته ماتفهمه وماتهمت بنفسها وانه تزوجها ومايحبها.. بس هذه قرار اهله وتزوج صغير.. ومن هذه الكلام..

انا صراحه رفضت انه يتقدم بس كل يوم يلمح لي وانا خايفه اتعلق فيه اكثر.. ومابي اخرب بيته واخرب حياتي انا بعد ابي اجوف المناسب وماعلق نفسي على وهم . لانه احس نفسي كل يوم اميل له.. لانه صعب.. بس التفكير يوديني ويجبني ساعات اقول بخليه يتقدم وساعات لا اقول خلنه زملاء مو عارفه.. لانه كل يوم يفتح لي الموضوع وعن حبه لي..

سوري على الاطاله بس اتمنى تفيدوني.. شسوي اخلهي يتقدم او انهي ايل بينه؟ بس شلون انهيه وهو معاي بالصف وكل يوم بجوفه صعب

فيدووووووني عن جد حايره

حبيبتي انتي قلتيها


انتي قلتي سلبياته بنفسك

فرق السن ..

متزوج

عنده اطفال ...


بسوي لك مقارنة صغيرة و انتي احكمي بنفسك


شاب .. بنفس عمرك .. افكاركم متشابهه و ميولكم متشابهه

ولا رجل اكبر منك بكثيير .. انتي حابة تنطلقي للحياة وهو يشوف كل شي تسويه لعب اطفال ...


شاب اعزب .. يكون لك وحدك .. تكوني اول وحدة بحياته . يحس معاك بطعم الحب و المودة و الحنان لاول مرة
تكون ليلة زفافكم هي فرحة عمركم الاولى .... يكون اول حمل لك . احلى خبر سمعه بحياته .. يكون اول مولود لك
كل دنيته ويحبه اكثر من نفسه

ولا رجل تتشاركيه .. مع اخرى ... تتقسم الليالي بينكم .. مر بتجربة العرس و ليلة الزفاف من قبل فاماتفرق معاه
اول حمل لك . مابيفرق معاه لانه مر بهذه الاشياء من قبل و يمكن حتى يطلب منك تاجيل الحمل و مايفرح لانه طفشان من العيال و حابب يقضي معك اجمل الليالي بعيدا عن هم الاطفال ... اول مولود لك ما بيكون فرحته الكبرى لانه عنده غيره



بعد عشر سنوات من الان .. تفضلي تكوني مع رجل في الثلاثين .. بعز قوته و رجولته
ولا مع من دخل الخمسين و بدات اثار العمر بالظهور عليه ؟؟؟


المقارنة تطول و هذا غيض من فيض ...
لساتك باول الطريق .. اذا حابة تواصلي معاه الله يكتب لك الخير

و اذا قررتي تصديه .. فا اتخذي قرارك بسرعة ... و وواجهيه بقوة
انك ما تبيه ابدا ابدا و قولي له على سبيل التهديد يا يبعد عن طريق ياما بتكلمي حد من اخوانك يتفاهم معاه



فكري جيدا و اختاري ما يناسبك ...

هلا خيتوو اولا اشكرج جزيل الشكر على الرد..

صح مقارنتك بينه فروق كبيره.. صح انا ماتمنى اشاركني بزوجي وكل الي قلتيه صح العقل يتبقبله بس القلب غير.. يعني ساعديني شلون اخليه يشيل الفكره هذي ولا يقعد يعطف ويدلع .. تعرفين انا بنت قلبي خالي وهو يحاول يحسسني اني ملاك على الارض.. وكل ماقول له ماننفع لبعض واحنا زملاء ودراستنه اهم لازم يتفح هالموضوع..

واتمنى شخص قريب بالسن مني مو اربعين

هو طيب واذا استخدم اسلوب الهواش صراحه يكسر خاطري لانه يقول لي جرحتيني و بكيني وانا قاعد ابكي اهني احس بتئنيب الضمير

صراحه مو عارفه شلون اتفاهم وياه
علميني.؟؟

حتى لين بابا يجي ياخذني من الجامعه يجوفه واقف معاي ويسلم على ابوي ويحاول يتقرب من ابوي..

تعبت مو عارفه قولي لي

شلون اكلمه

هو بعدين بدش

شلون اتكلم معاه؟؟؟؟

شقول؟؟؟

ويعطيج العافيه

هذا الإختلاط ومايسوي
انا ماراح اتكلم عن الاختلاط لانه مووووضووووع يطووول الحديث فيه
لكن حبيبتي انا انصحك نصيحةخليكي بعيدة واحكمي نفسك ترى بعض الرجال عندهم نزوات
واللي قالة عن زوجته لازم يقوله اجل يقول كاملة وانا حبيتك من وراها استغفر الله
صديه وترى راح يتعلق بيكي اكثر لكن حاولي تبعدي عنه
ولو كررها قوليله بكلم زوجتك
واللي سوله في زوجته بعد السنين والعشرة والاطفال بيسويه فيكي

مشكووووووره خيتوو على النصائح

شلون اكلم زوجته؟ وانا بحرينيه وهي بعيدب السعوديه؟ وثاني شي زوجته ماتعرف للنت شبه اميه!!

والله كله اذكره انه حرام تسوي هالشي من ورا زوجتك يعتبر خيانه..
قال يعني حرام ادور على سعادتي وهي مو ساعدتني .. قلت له انصحها يقول تعبت وانا انصحها مافي فايد.


وانا صج صج ابي احسمالموضوع لانه احسه قاعد يكبر والتعلق فيني صار اكبر من قبل..

وابي بنفس الوقت لو تركته متيجي لي الجامعه يوحرجني..
لانه تعرفين هو معاي بالصف.

شو رأيك لو قلت لك انه سيقول و يفكر عنك نفس ما قال و نفس ما يفكر عن زوجته الحالية؟؟؟
هذا انسان تعبان... زوجته جايبتله الاولاد و عاشت و صبرت عليه و هو جاي يزحط لها؟؟؟؟؟

ابعدي!! و هدديه ما يقرب لك بعد اليوم و بس..
الله يوفقك...

بل بيتكلم عليي يمثل ماتكلم على زوجته؟؟؟؟ الله يستر منه بس

انا بعد افكر اقول بعد عشرت هالعمر يقول ماتنفعه وانها اميه وماتلبس وما عندها نقاش وسلوب ومن هالكلام.. دائما يشكي الحال انه مظلوم من ناحيتها وانه ظلموه وزوجوه صغير ..

صعب اهدده لانه خايفه صعب كل يوم يطلع لي بوجهي بالجامعه.. وصراحه خايفه يسوي شي ضدي بالجامعه بس ماتوقع لانه طيب ..

انا صج خلاص مابي اكلمه لانه هو مو باله زماله ودراسه في باله حب وزواج تعبت منه..

وتشكر على التفاعل بالموضوع والنصائح

شوفي قلبك ممكن توقفيه الحين لانك لسه ببداية الاعجاب

و تاجيل الموضوع و سماعه و التواصل معاه و الليونة راح تزيد الموضوع تعقيد ..

لو حابةتسمعي رأيي

ارسلي له ايميل .. قولي له كلمتين

يابن الحلال .. الله يوفقك مع زوجتك و اولادك
شوف طريقك و لا تعترضني و الا والله بقول لاهلي يشوفوا حل معاااك

لازم تكون الرسالة حاازمة عشان يحس انك جادة مو تلعبين عليه

بعدها
اقطعي المسن .. سوي له بلوك و احذفيه ...

ا اذا في بينكم اتصالات اقطعيها فووورا ..

اذا تعرض لك بالجامعة

.. زي ماقلت لك وااجيهه ...

قوليها بصريح العبارة مابي معك اي اتصال او سؤال و سيبيه و امشي

هاوش ... بكى .. قام .. قعد مالك دخل

قوي قلبك و اذا اعترض طريقك هدديه انك بتقولي لابوك انه في حد يضايقك و بتخليه ابوك يتصرف معاه

الموضوع محتاجة قوة شخصية و حزم ... هذا اذا كنتي فعلا جااادة


اما اذا بتقعدي تقولي لي كسر خاطري و بكى و انا ما اقدر و من هالكلام ... فا اكيد راح يظل وراك لانه يحسبك مبسوطة و تثقلي عليه ... اما بالحزم بيعرف انك جدية

الله يوفقك

لا مابينه غير المسنجر وبالصف. وعلى فكره كل يوم يطحن على سالفت الموبايل بس انا اتهرب.. لانه صج ماتخيل نفسي اكلم وفوق هذه متزوج وعنده عيال.. حرااااام احسه خيانه.. هو يقول انه مو خيانه وانه شرع ومن حقه

انا خيتو والله جاده ابي يبتعد عني.. لانه تعبني.. كله يطحن عن الزواج.. ويحاول يفر مخي .. اقول له يمكن ابوي مايرضى.. يقول اذا انتي تبين تقدرين تعارضين وتقولين ابيه..
وانا صعب اعارض اهلي صعب.

وانا الحين بسوي الي قلتيه مابدش المسنجر لانه مابتسحمل كلامه .. لانه اعرف من بكلمه بالموضوع بقول انا ابكي وانكجرحتيني وكسرتيني ومن هالكلام وارد اهون..

قاعده افكر اكتب رساله على الايميل وطرشها وانه لازم يشيل هالفكره من راسه ويتركني..

والله يسعدج حبيبتي

كلام منطقي وسليم 100%