السلام عليكم ورحمة الله وبركاته..
كيفكم إن شاء الله بخير..
أنا توني متزوجة متضايقة من أشياء كثيرة بزوجي وياليت اللي يدخل يفيدني
أكثر شئ فجر مرارتي سالفة الريحة وبحكي لكم كل شئ بإختصار..
أنا كأي عروس تقضيت لزواجي طبعا مايخفى عليكم أكيد مية بالمية شريت من العطورات الفرنسية والعربية والكريمات والمجموعات العطرية جل بودرة صابون لوشن مزيل عرق ماخلييييييت شئ كل المحلات فريت عليها وختمتها بنكتار وزهور الريف والبودي شوب من غير اللي شرولي صديقاتي هذا غير المنتديات فريتها فر وكل مايعجبني شئ أروح أشوف ريحته وأشريه ولايخفى عليكم إهتمام البنت بنفسها وبالذات العروس
بعد شهر من زواجنا وكنا على السرير فجأة قال أنتي الليلة ريحتك حلوووة وش حاطه!!
والله ياناس اللي حاطته ذيك الليلة أكثر من مرة إستخدمته..المهم أنا قلت له عن العطر
تدرون وش قال؟..قال أنا ماشميت معك الريحة الحلوة إلا ليلة عرسنا والليلة بس!! وطوال الفترة اللي راحت أتضايق من ريحتك بس ماحبيت أجرحك!!
هنا أنا إنجرحت حسيت كأن أحد ضربني على وجهي..أنتم أدرى النظافة والريحة أهم شئ بالحياة الزوجية المهم هوقال الظاهر الريحة اللي موزينه من محل نكتار عاد أنا هزيت راسي بالموافقه وأناأكذب بس إنحرجت ولاأدري إيش أقول..المهم أخذت كل اللوشنات والكريمات والعطورات وزرت أهلي وقلت لأمي وأختي بالله شوفوا فيه شئ ريحته موزينة(مع العلم إني أنوع يعني ماإستخدمت شي واحد) المهم الكل قال وش فيك إنهبلتي مافيه شئ موزين كلها حلوة
إهتميت بنفسي أكثر وأكثر..ولاأحد يقول يمكن تشتغلين في البيت وتنامين معه..لاوالله قبل حتى أنام معه أغسل جسمي(حتى لوكنت متسبحه من قبل ومتزينه) وهاتيك يافرك وتزين ولوشن وبودرة ومزيل عرق وعطر للجسم وألبس وأتعطر مرة ثانية والعود و..و..من غير أسناني دايم أفرش وشريت حلاو من الصيدلية حتى أسأل أمي أقول عمرك شميتي من فمي ريحة موحلوة قالت لاوالله لوفيك شئ أناأول وحدة بتقول لك
المهم مرت شهور طبعا لاأخفيكم إن زوجي دقيييق جدا لدرجة أول زواجنا أقول وش فيه موسوس المهم أنا من ناحية ثانية مومرتاحة معه دايم ساكت دايم على اللاب توب والله من صباحية زواجنا فاتحه وحتى يوم سافرنا جالس عليه ولا يلقي لي بال وإذا جاء وقت الطلعه قفله وقال مشينا!!وإذا طلعنا ساكت يالله يتكلم مرت شهور كذا تصدقون مايطلعني أبدا ماخذ إجازة كذا!!(سافرناأسبوع ورجعنا)غيرة مافيه شئ بس يوديني لأهلي فقط..حنا ساكنين في جناح مع أهله..وأنا شارطة عليه أطبخ في جناحي وموافق لكن بعد الزواج قال عاجبك وإلا روحي لأهلك المهم والله ياناس من أول شهر أجووووع عندهم أستحي أنزل والبيت مليان عائلة كبيرة بنات وشباب وأطفال وعندهم ضيوف يجلسون بالشهور ..والأكيد صرت أطبخ تحت بس بجد ظلم ماآخذ راحتي وهو ولاهمه ..مرة مانزلت أتغدا بأول شهر من زواجنا كنت مستحية حتى لونزلت أقوم ماشبعت أكلهم قلييل مرة وبزارينهم وبناتهم والله تصير حرب على صحن الغدا ويوم دخل الشقة لقاني أسوي لي خبزة بجبنة قال بأعلى صوته اللي ماينزلون يتغدون ياكلون جبن مثل الفيران!!
ولاتفكرون إنه يجبر بخاطري لوليلة ويعشيني برا لااااا مستحيل..ولاحظت شئ من أول شهر كل ماينزل تطييير له أخته الكبيرة هي متزوجة وكل بعد شوي مطيحه عندنا وأحس من مقتطفات أسمعها من أطفالهم إن زوجي جالس يصب في إذنها كل شئ...المهم أنا صابرة وأحاول أتقرب له لكن الرجاااال صااااد عني والله ياناس مافيني شئ ناقص ..تصدقون ماعمره قال كلمة حلوة أومدحني بشئ أوسكر اللاب توب وناظر فيني وقال شئ!!...أحسه إنسان ملول ولايملا عينه شئ حلوة موحلوة مومهم خلاص مل منك!!
مرة واقفه قدامه قال أنتي مشقرة حواجبك قلت لا..قال حلوة..قلت إيه بس أنت تبيني دايم أشقرها.. قال التغيير مطلوب....إيه نعم ياناس كلنا نحب التغيير بس فيه فرق بين التغيير وبين اللي يمل منك بسسسسرعه...يعني أغير بشعري يعجبه أول ليلة بعده خلاص طفش مني...يسافر مستحيل ياخذني أويتصل يسأل وإذا دقيت يرد نعم كيف حالك يالله مع السلامه..قلت له مرة مشتاقه لك قال لاعاد تقولين مشتاقة لك وإلا ماأتصل عليك...يطنشني إلين يبغى حاجته ثم قام يدقدق روحي للبيت أنا جاي بالطريق بوصل الليلة أبي ألقاك هناك..أروح لبيتي أنظفه أبخره أتزين له (وأنامن قلب أحبة وأشتاق له) يجلس يرسل إلبسي كذا وكذا..يوصل خلاص أخذ اللي يبي ماعاد يسأل عني وعنده إستعداد يعصب يهاوش لأتفه شئ..قلت له مرة أناأشتاق لك إذا سافرت قال أنا أشتاق لك وإذا وصلت خلاص يخف الشوق او الحب!!
بصراحه أحس إني أجتهد له وأطلب رضاه كأني جالسه أبلط البحر..وفي النهاية أكتشف خيانته مكالمات علاقات!!وأنا يعني مالي شئ !! الكلام الحلو والهدؤ لغيري وأنالي العصبية والتجاهل!!..ليييه؟؟؟؟؟
مع العلم إني أموووت فيه لدرجة أني أروح لأهلي كل إسبوع وإذا دخلت بيتهم أوقف عند الباب إلين أسمع صوت سيارته راح وأحس إن قلبي هو اللي طلع من مكانه ومشا عني..لدرجة إني ودي أقول لحظه وأرجع معه رغم إنه زيارة عاديه لأهلي وأنبسط معهم وأرتاح عند أهلي كثيير ..بس أحس إني أحب زوجي بجنون ياناس مرت شهور مثل ماقلت لكم وأكتشفت فجأة إنه يتكلم عني عند أخته كلااااام كثير عن لبسي وحركاتي جالس يتكلم من أول شهر من أول أيامي وأنا عروس ماأحترم إني زوجته لي خصوصياتي ليش يتكلم عند الحريم وأخته تتكلم وأمه تتكلم والناس صارت تتكلم والكل يعرف كل شئ!! والكلام يفشل ماله داعي يقوله يعني مثلا أول شهر مالبست عنده القصير وجالس يشكي لأخته من هذا الشئ طيب أنا أستحي وش معجله هذي مرت الشهور وصرت ألبس كل شئ عنده بعد ماتعودت عليه!! بداية زواجي ماشقرت حواجبي أولا أهلي ملتزميين مرة وشكلي مرة حلو يعني مايأثر وبعد شهر رحت وشقرتهم سويت تغيير ..طيب ليش يتكلم عني بطريقه مالها داعي!!ويسمح لنفسه يناقش الحريم بأسرارنا ونومنا!!
المصيبة إن أمه تقول لأمي ولدي يقول أحسن ليلة معها يوم رجعت من السفر!! طيب أنا وش ذنبي إذا ولدها ماينبسط إلا إذا طول عني ورجع لي!!
المهم أنا واجهته بطريقة هادية يافلان عيب أحلا ليلة مع زوجتي ومدري وشو؟ لاتتكلم عند الحريم فيني تدرون وش قال؟..قال إيه بتكلم وأنا قلت لأختي إن ريحتك موزينه!!!!!
أنا سمعت كلام كثير لكن الظاهر اللي قالت لي إستحت لاتقول سالفة الريحة!!
أنا إنصدمت وبأعلى صوته يقول قلت لأختي إنك ماتتروشين؟؟؟عشان تنصحك!!!!
أخته ماقالت لي شئ كل اللي قدرت عليه تمشي وتتكلم فيني!!!
أنا إنهزت ثقتي بنفسي؟؟؟والله كل ماأروح لأحد الكل يسألني عن ريحة العطر اللوشن........وش معنى زوجي؟؟
تتوقعون كان على حق يعني عادي يارجاجيل تتكلمون لخواتكم ؟؟؟
عادي ياحريم الوضع هذا إن زوجك يتكلم بكذا؟؟؟
هل كل الناس كذا؟؟ وأنا اللي حساسه ؟؟؟؟؟
ياناس تكفون إنصحوني...
ولكم كل الشكر...

اختي 000الله يعينك على زوجك مصيبه وفضيحه انه الزوج يطلع اسراره برا 00كيف يتكلم عن احلى ليله واسواء ليله 00هاذا ليس برجوله 00وكيف الام تتكلم هي وبنتها بهاالشكل (اذا كان رب البيت على الدف ضاربا فشيمة اهل الدار الرقص)موووكل الناس كذا ولا انتي حساسه 00حاولي معه ينقصه التوجيه والوعي 00بالنسبه للريحه خليه هو من يجلب العطور 0ويرى الفرق

ما اقدر اقول الا الله يكون بعونك
لازم ترجعي تتكلمي معه وتتناقشي بهدوء واتفهميه انه اسراركم بينكم وبس
ومش غلط الزوج او الزوجه ينبهو بعض على امور ما بتعجبهم ببعض عشان الواحد يتفاداها بس دايركت عاطول لا يقول لاخته او لامه مافي حدا ينصح حدا مفروض يكون في شفافيه ومكاشفه بين الزوجين
يمكن انا ما ساعدتك كتير بس اتمنى من الله ان يهديه الك ويهدي النفوس بينكم
موفقه اختي

كان الله في عونك
اختي طنشيه او بمعنى اثكلي

لاتهتمين به زايد خليه يركض وراك

واهتمي بنضافتك اكثر

اشتري ليفه جسم قويه جدا وطولي وجودك بالحمام لاجل تكون النظافة اكثر

واصبري
ولاتركضي وراه

خليه هو يركض وراك

__________________

والله ياأختى انا لا اشكك فى كلامك ولا نظافتك
بس هى الرجاله والله اصبحت غريبه ويحبون ينغصون عيشة زوجاتهم

__________________

طنشيه هو انسان يحب احد ينااقشه ونوعية زوجك كثيره هااا اليام


خلي ثقتك في نفسك عاليه وقللي الاهتمام به

__________________

وعـليكم السلام ورحمـة الله

أختي الفاضلة


كنت اقرأ ما تكتبين ووصفك لحال حياتك الزوجية ووضع زوجـك، وكنـت استـغـرب
من سلـوك زوجـك وعدم تجاوبـه مـعـك، وأيضا تصرفـاتـه التي لاتمثل رجـل سواء كان متزوجا او أعـزب
بإفشائه لخصوصيات حياتك الزوجية
لكن زال استغـرابـي لما قـرأت هـذه العبارة

اقتباس:

وفي النهاية أكتشف خيانته مكالمات علاقات!!

أختي كيف علاقة بربك؟ وكيف وضع زوجـك مع الصلاة؟

أختي كم عمرك وعمر زوجـك؟

هـل زوجك من أقاربك؟

هـل يـوجد احد من أهـله من النساء تثقين بعقلها ودينها وله احترامها بين العائلة، لتـقـوم بمناصحة أخته الكبيرة عن حديثها واستماعها للخصوصيات.

أين أمـه من المـوضـوع هـل لها علم بمسألة إفشاء الخصوصيات؟

اقتباس:

المشاركة الأصلية كتبت بواسطة المصرية والله ياأختى انا لا اشكك فى كلامك ولا نظافتك بس هى الرجاله والله اصبحت غريبه ويحبون ينغصون عيشة زوجاتهم

لا غريبه ولاشيء اختي المصرية، الرجال من مثل هذه النوعية لم يأتـوا من كواكب أخرى، وليسوا اعراق
غير بشرية تعيش بيننا.............!!!!! بل هم نشأوا وتربوا في مجتمعاتنا ،
الفرق أن والديهم وأسرهم غلبوا عليهم جانب التغذية على التربية، فينشأ الواحد منهم وهـو لا يعرف حقوق وواجبات الحياة الزوجية بل
حتى حقوق والواجبات التي عليه كعبد لله - عز وجل - يهملها ولا يعطي لها قيمة.



وللأخت الكريمة صاحبة الموضوع، أنصحك بكثرة التقرب والدعاء لله عز وجل بأن يصلح حالكما
وبإذن الله ما يقصرن الأخوات الكريمات بنصائحهن المفيدة .....









عزوبي بس رجل

__________________

يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين

مع أحترامى لـــــــزوج أختـــــى ( صاحبة الموضوع )
صراحه ياأخى أحتار فى الاسباب !!
لكن اللى أعرفه جيدا
أن الرجل حقاً لا يخرج أسرار بيته .. ( فهل تربيته لا تخرج رجاااال !!! )
والذى يفعل ذلك
فكيف تكون حياتى معه ؟
فكل أخطائه رغم قسوتها فهى أرحم من هذا الذنب
وعلاقات محرمه
الله يحفظك أختى كيف تصبرين والله أنتى أمرأه تستحق التقدير على صبرك
أتمنى أكون بنفس صبرك

__________________

حياك غاليتي

غاليتي اعانكي الله على مابلاكي والله انه امر ليس بالهين ونصيحه لا تهتز ثقتكي بنفسك
بالعكس انتي ان شاء الله منتي مقصره والعيب ليس منك الدليل انه هداه الله نشر

اسراركم الصحيحه والكاذبه وماعليكي الا انك تصبري وتدعي ربك العالم بالخفايا

اختي انتي اهتمي بنفسك وبمظهرك ولا تركضي وراه كثيير
وصدقيني راح يندم على فعلته ويجري وراك