بسم الله الرحمن الرحيم ..

اعاني من ام زوجي ..

متزوجه من 3 شهور ..زوجي يعمل تجاره حره وياتي المنزل اخر الليل تقريبا الساعه 2 او 1 ونص .. وطبعا اسهر معاه للساعه 3 او 4 وانام

اعامل ام زوجي بكل ود وحب واحترام واجلس معها اكثر من امي .. ولاكن قامت تتكلم عني .. اني كثيره النوم .. واني لا انظف الغرفه .. واني اتعطر واتدخن واتمكيج فقط .. ودايما فالغرفه .. لا ادري لماذا تتكلم عني بهذه الطريقه امام الناس .. هي لا تعلم اني اعلم انها تتكلم من وراي .. ولاكني اسمعها فالتلفون وابنائها يأتون لي ويخبروني ..

وحينما امي تتصل وتتحدث معها تقول لها ابنتك نائمه امي تقول لها ابنك يتاخر وهي مصره اني انا انام لدرجه ان مره كانت تكلم امي الساعه 2 ونص الظهر امي قالت لها لا اهي مب نايمه هي اكيد قايمه فالحمام (الله يعزكم) تتوضا وهي تقول لها لا هي نايمه وانا اسمها فالحمام قلت لها عمتي انا مب نايمه .. ردت طرقت عليه الباب وقالت امج اتصلت وقالت انج فالحمام (الله يعزكم) وانا قلتلها هي .. سرت اتاكد من الكلام امي قالتلي لا قالت انج نايمه مب فالحمام (الله يعزكم)..

وغيره اول ما تزوجت قالتلي تعالي بوديج اشتريلج لبس احلى من اللبس اللي شارتنه فالزهبه ونعول ماركه انا سكت وحطيت فخاطري ليش هي جيه تتكلم وزوجي على نياته مع اهله وعقب اتضاربت معاه يعني من باب الاحترام لي ولاهلي المفروض ما تقول جيه .. سرت معاها وما تكلمت ودتني وهي تختار كل شي على ذوقها تميت مقهوره وسكت .. ومره ثانيه قالتلي تعالي بوديج سوق ذهب اشتريلج ذهب تلبسينه جدام الناس انا رفضت وقلتلها ما بسير وتمت اتصيح وزعلت اتصل ريلي وقالي ليش ما سرتي قلتله ما سرت لان ما عندي شي مهم فسوق الذهب ..

وغيره هي كله اتقولي ماركه وانا اشتري كله ماركه .. والله العظيم تفتح شنطه العطور يمكن عندها 6 عطور منهم واحد فاتحتنه من البخل واتي عندي تتعطر .. ومره شافت عندي مسك عجبها جان اتقولي من وين هالمسك قلتلها من عبدالصمد القرشي سألتني كم سعره قلتلها ..قالتلي ما بشتريله غالي قلت فقلبي هي كله اتقول ماركه وكيف اتقول انه غالي .. جداا بخيله .. واحيانا اتقولي مثلا سلعه غاليه كل شي غالي اقوللها انتي ما تدفعين عمي يدفع .. ايلس اقول فقلبي لو هي راعيه البيت بيصير قح فالبيت ..

ومره يت عندي قالتلي نظفي غرفتج ليش ما تنظفين قلتلها انا فبيت امي ما كنت اشل ورقه افرها فالزباله وهي مصره تتكلم من ورايه اني ما انظف الغرفه .. مع ان الغرفه نظيفه بس اخلي الخدامه اتكنس الغرفه واتنظف الحمام (الله يعزكم )

والله طفرت ومليت منها انا انسانه ملتزمه ومعروف عني بحسن السيره والخلق ما احب اتدخل فحيات حد ولا يخصني فحد فغرفتي اذكر ربي واصلي واقرا قرآني وما يخصني فحد .. اتشوفني انا فالغرفه تيلس اتقولي ليش كله فالغرفه منخشه (مندسه) اقوللها اذكر ربي واصلي ليش اطلع ..

ساعدوني كرهتها قمت كله انغزها فكلامي .. ابغي اطلع من هالبيت مليت .. ساعدوني شو اسوي ربي يحفظكم ..

وشي اخر اذا زرت امي تقول لي وين سرتي وشو اشتريتي .. حتى ان اول ما تزوجت تمت تسالني واتحاول انها تعرف شو سويت مع زوجي فاول يوم .. فكل شي تحاول انها تتدخل فحياتي .. واذا طلعت مع زوجي لازم تسال وين سرنا وشو سوينا

هلا اختي

الله يعينك لكن صبري وحتسبي

وحاولي تخففي من جلستك في غرفتك

ومهما كان لا تتحسسي منها لانها بنهايه ام زوجك

وحاولي تفهميه بطريقه انك لك ذوقك واختيارك في لبسك

والله اذ حاولتي تتغافلي عنها وتصرفاته غير تكسبيها بس لاتحطي في خاطرك

وكيد تبي تستحي من نفسها وتبطل ها لسولف

واذ على القومه من النوم نظمي نومك لانك منتي لحالك في البيت

حاولي تقومي معها لو ساعه بعدين رجعي نامي

والله يسخرها لك يارب ويصبرك

__________________
اللهم ابعد عن زوجي المعاصي والفتن ما ظهر منها وما بطن اللهم اقنع قلبه من الدنيا وحب المال وارزقه بالرزق الحلال اللهم جملني في عينه وجمله في عيني اللهم اجعله لي كما احب واجعلني له كما يحب واجعلنا لك كما تحب


دعولي ان الله يهدي زوجي والله تعبت معه

ياأخيتي وسعي صدرك وأصبري عشان زوجك ولجل عين تكرم عيون حطي زوجك محور أهتمامك لا يهمك كلام أحد كله في موازين أعمالك وحاولي قد ماتقدرين تتوددين له وتجلسين معها وإذا نظفتي غرفتك حاولي تخلينها تشوفك مثلا أفتحي الباب وخلي صوت المكنسة يطلع برا و ريحة المنضف تنشم من بعيد
أعانك الله

__________________

طنششششششششششششششششششششششششششششششششي

__________________

لا تزعليم تراهم اكثرهم كذا ما عليك غير التجاهل اول شي لا تجلسين في غرقتك الا وقت الصلاة والراحه ليه حابسه نفسك اطلعي لزميلاتك ام زوجك تحب تكون الرئيسه لا تحرميه مدامك عندها من كذا دايم قولي ياخاله وش رايك بهذا وش رايك نسوي كذا هي حرمه كبيره لا زم تجارينه واذا اسئلتك عن شي ما تحبينها تتدخل فيه قولي مدري كلمة مدري تضيع فيها الفكر الحين مشغوله برجع لك

حبيبتي ارحميها واتخيلي انها امك واحسن حل انا استخدمته مع ام زوجي اني اتخيل مرت اخوي تسوي الشي الي كنت باسويه لام زوجي فما احب هذا التصرف وابحث عن الشي الي اتمنى ان مرت الخوي تسويه لامي ولا تظنين اني شينة مع ام زوجي بالعكسهي تحبني زي بناتها بس مثل سالفة القعدة بالغرفة احاول اونسها وغيره وانت احتسبي الاجر عند الله

تسلمون اعزائي ع ردودكم ..

ولكن انا دوم اطلع واسولف وياها وهي كله ترمس عن الناس ومادري منو انا ما احب حد يتكلم عن الناس مول .. بعد الرقاد اطلع واسولف لدرجه اني اتم معاها لحد ما ريلي يرد البيت .. انا بعد ريلي له حق عليه ما يشوفني الا اخر الليل يشوفني بعدني مب متسبحه ولا متعدله له مب حلوه .. احب ريلي يشوف كل الزين فيني ..

ما قمت اطيقها مول ..

الوع يوم اشوفها ما احب شوفتها ..


هي تبغي تتدخل فكل شي تبغي تعرف كل شي .. لدرجه ان مره قلتلها عمتي سرت الحمام (عزكم الله)وشفت دوده جان اتقولي عادي حتى انا شفت دوده لا اتسيرين المستشفى مب لازم وحتى وانا اللحينه حامل قلتلها بسير المستشفى بتاكد وبتطمن قالتلي لا تسيرين لين الشهر الرابع ويوم سرت المستشفى اتطمن على البيبي قلت للدكتوره انا شفت دوده فيني قالتلي ما نقدر نعطيج دوا و ان اهل البيت واللي تطبخ فيهم ديدان وانتقل فيج انصدمت.. قلتلها الدكتوره جي قالتلي وقالتلي رشي المااء على الشرج قالتلي لا لا اترشين ماي ولا اتسوين .. ونحن ما فينا ديدان هذا من اكل برع ..اليوم يت بنتها اتقولي شفت دوده جان اقوللها قولي لامج عشان تعالجج ..

هي جدا مش نظيفه ما تغسل يديها يوم تطبخ واتحط يديها ع شعرها عسب جي ما احب اكل من اكلهم ..

واللحينه هي تتشكى اني ما اكل ..

والله اني ما قمت احب اطلع من غرفتي من كثر ما تتكلم عليه

حبيبتي انتي لج حق يكون لج بيت مستقل .. انتي بعد مايبتي الياهل تسوي فيج هالشكل عقب شراح تسوي

ولو انتي ببيت بروحج محد راح يتكلم عنج سواء نومج او اكلج او لبسج لأنه محد يشوفج منهم المهم قبل ماتكرهين نفسج

حاولي تفهمين ريلج دام اهو ميسور حاله ويشتغل بالتجاره ان يوفر لج سكن خاص فيج بدون ماتذكرين مساوئ أمه لأنه

بيعاند اكيد مافيه حد يرضى على امه واكيد بناتها كل وحد ببيت والله ساتر عليهم .. تلاحقي روحج واستقري ببيت

وفيه شغلتين ماعجبني فيج شلون يتحكمون بلباسج ليش مارفضتي من البدايه روحة السوق وان حد يختار لج حتى

مايتمادون ومسألة إن أنتي ماتشيلين شي ببيت امج لأ غلطانه انتي ببيت ريلج الحين وملزومه انتي يروحج تنظفين غرفتج

مو الخدامه ليش تيبين الكلام لج وحاولي تعدلين من نومج واذا اعترض زوجج قولي له اذا تبي تقعد وياي تعال بدري انا مو

ملزومه اسهر انا حامل وتلزمني نومة الليل ... اتمنى كلامي واضح.. وبالتوفيق