عدة مشاكل مع زوجي منذ بداية الزواج
(عدة مشاكل مع زوجي منذ بداية الزواج )
السلام عليكم ورحمة الله وبركاتة
اليكم قصتي وبإختصار واريد رايكم والحل..
انا تزوجت من رجل كان اهلي يمدحونه المهم لما سألت عنه أمي كل من سالت عنه احد قالو لها نصيحة لاتخلين بنتك تعيش مع امه لا امة شديده وبناتها كل يوم عندها واصحاب مشاكل... المهم امي اشترطت قبل كل شي و قبل لايكون فيه بيننا شي رسمي انه البنت ببيت لحالها ...
وافقت وقالت حنا بنتكم مانعرفها وخطبنها من كلام الناس نبغى نشوفها امي وافقت وقالت الله يحيكم المهم جو امه واخواته وشافوني وبعدين خلاص صاربيننا شي رسمي وعطونا المهر والملكة ...
وبعدها دق على ابوي يعتذر وقال انه مايقدر يطلع من بيت امه وانه مافيه رجال بالبيت لان ابوه مطلق امه واحرج ابوي بالكلام ..
وقاله الموضوع كان بين الحريم و مادري عن رغبة البنت ودقت امه تعتذر لامي وامي رافضة كليا وانا ماكنت ادري انه الناس كانو يحذرون من امه وخواته المهم احرجو اهلي جدا وقالي ابوي ايش رايك يابنتي قلت رايي من رايكم ...
المهم تزوجتة وماكان بيني وبينه اي مكالمة لابالخطبة ولا بالملكة.. وليلة زفافي دخل علي ومكان متوقعني بهذا الجمال ولله الحمد والشكر ..
وماامدح نفسي الله يعلم ولمادخل علي وكانت هاذي النظره الاولى له كنت اشوفه مثل الغوريلا قبيييح جدا ..
انصدمت بشكله 180 درجه.. ولما رحنا للفندق اناظر له احسة شخص مريض نفسي كان يمشي من غرفة لغرفة ويرجع لي مره ثانيه ويقول مومصدق انتي مرتي !!
ماخلا شي بالشنطه حقة ماوراني اياه من ملابس وعطور وساعات ...
وانا فيني ضيقة موطبيعيه واقول بيني وبين نفسي مستحيل اكمل حياتي مع هذا...
ولما رحت لبيت امة الي هو طبعا البيت الي اعيش فيه معاه ...
رحت وشفت الغرفه وجلست شوي وبعدين مشينا ماليزيا حق شهر العسل ... العسل بجهه وانا بجهه ثانيه
رحت وانا ماني مرتاحة معاه ابد وكان دائما يقولي ليش ماتسولفين ويخانق حيييل عشان اسولف!!
المهم ماتهنيت ابد وكان شهر هم ونكد
ولما رجعت ليتني مارجعت رجعت عند امه وخواته شيبو فيني ... مشاكل في مشاكل وانا متحملة مااقدر اقول لاهلي مابي اغثهم ..
تخيلو وحده عروس زوجها ينام طول النهار ومايرجع ويقوم يطلع مايرجع الا الفجر .. حاولت اتفاهم معاه مافي فايده حاولت اغير جو الغرفه واخلية يجي بدري مافي فايده ...
امه وخواته يعبون راسه علي أمه كانت تعايرني لاني تاخرت بالحمل وكان يهددني اذا ماحملت هذا الشهر بيوديني بيت اهلي خلاني اكرهه اكثر واكثر ...
وكل هذا وانا ساكته واهلي مايعرفون شي ..
حتى الجماع يمر شهر شهرين مايلمسني هذا وانا عروس حسيته موطبيعي فيه شي ..
المهم حملت وكل يوم المشاكل تزيد عن الي قبل وكل يوم اقول انشالله يتغير ...
ومن كثر المشاكل والتعب النفسي جبت بنتي بالشهر الثامن ...
الحال هو الحال والمشاكل تزيد حتى وانا نفاس كانت المشاكل بيننا مستمره واهلة حتى زياره مازاروني..
المهم حدثت مشكله بيني وبين زوجي والسبب امه وخواته . ورحت بيت اهلي جلست عندهم كم يوم استغربو اهلي ولما سالوني اعترفت لهم بكل شي..
والله كنت اتكلم وابكي بحرقه لدرجة ابوي و امي بيكون معي ...
زوجي علاقتة باهلي جدا جدا كويسة ويحترمهم ويقدم لهم الهدايا بين كل فتره وفتره وكانو يقولون ماتوقعناه كذا ابدا ..
واستمرت المشاكل وعلاقته باهلي مازالت كويسه.. وبعدين صار يطلع ويروح ويجي مع اخوي الكبير..
بنتي صار عمره 3 سنين .. وبعدها اجبرني على الحمل مع اني ماكنت ابي احمل ..
ولما كنت حامل فجاه جاني اخوي الكبير وقالي وش الكلام الي سمعته عنك? وقالي كلام عريض طوييييل كله كذب بكذب تخيلو يكذب علي عند اخوي والمشكلة اخوي مصدقة وصارت مشكله بيني وبين اخوي وعرفو اهلي بالسالفه وكبرت المشكلة ووصلت لحد الطلاق ويهددني بالطلاق ابوي جبرني ارجع بيتي عشان خاطره ورجعت عشان خاطر ابوي وهو هو نفسه ماتغير .... وقالي ان يبغى يوسع الغرفه عشان نستقل شوي عن امه وخواته ولاكن البيت لخواته وصارت مشكله بينه وبين خواته عشان الغرفه وبعدها قرر يطلع بشقة وجنب امة بالتمام .. مع اني اصيح تحت رجليه عشان يطلع بي بشقه وموراضي ... وكل يوم يعايرني ويقولي انتي ماينفع فيك لو احطك بقصر مع اني البي له كل طلباته احاول اشوف ايش يبي وايش مايبي احاول افتح في كل مره صفحة جديده ولاكن هو مايتغير وبعدها جبت بنتي الثانية والله العظيم المشاكل زادت وانا نفاس عند اهلي يتكلم معي بطريقة واسلوب زي الزفت ..
والله العظيم طلعت نفاس تخيلو ماكان لي اربعين يوم عنه عطاني ظهره ونام تخيلو وانا عند اهلي قبل اجي للبيت يدق علي ويقول تعشي عند اهلك ...!!!!!
المشاكل تزيد وتزيد ..
وصارت بيني وبينه مشكلة قبل رمضان لدرجة انه رافع يدية يبغى يضربني والله ستر وحاولت اهرب منه..
وكان يهددنب بالطلاق او بالزواج علي. .. دائما يهددني بالزواج علي والطلاق يقولها دائما ..
المشكلة وصلت لاهلي وهو الي اخذ جوالي وكلم امي وقعد يقول كلام عني كله كذب ويسم البدن انا هنا انهرت وطولت صوتي عليه وقلت له طلقني اكرهك ماعاد ابغاك تسمع وقلت لاهلي مابيه اكرهه اكرهه ..
وقلت له تر محد راح يجبرني على العيشة معك ووكلام عريض طويل ومع ذلك يقولي انتي الغلطانه وهو يكذب علي امام اهلي الله المستعان..
انا وبكل صراحه كرهته لاكن احترمه واقدره لانه ابو بناتي وبنتي الكبيرة متعلقه فيه مره وحساسة جدا ..
اناتعبت من حياتي معاه واليوم ارسلت له رساله وقلت له الي بخاطري وقلت له ماعاد اتحمل العيشه معك على هالوضع وانا ارسلت الرساله هاذي عشان مايكون بيننا صراخ ونقاش حاد وقلت له اذا عندك حل عطنا ياه واذا ماعندك بقولك العيشه على هالوضع صعب جدا..
لما جلسنا على الفطور مسك يدي ونادني للغرفه وحاول يحظني انا قلت عندك حل لمشكلتنا والا ماعندك وحاول يلف ويدور ويحطني غلطانه ... انا قلت له طلق وقف وكنه متعجب قلت ايه طلق انا العيشه هاذي ما ابيه اذ بنستمر على هالحال طلق..
قال اذا اني عايفه العيشه بطلق قلت نعم اذا العيشه بتستمر على هالوضع انا عايفته ...
قولو لي ايش اسوي وايش الصح وايش الغلط تعبت مع اني والله العظيم مو مقصره معاه بشي بعكسه هو مقصر معي ومع بناته كثيييير اتمنى الاقي رأي سديد منكم
واسفة على الاطالة..
(تم التعديل ليتناسب مع المضمون)
التعديل الأخير تم بواسطة مدن السلام ; 16-07-2014 الساعة 12:34 AM
15-07-2014, 10:04 PM
ضوابط المشاركة
العرض المتطور