جرحت زوجتي و ندمان
السلام عليكم و رحمة الله
مساء الخير جميعاً,,,
أخواني وخواتي الله يجزأكم كل خير عن النصائح القيمة التي تقدمونها لأخوتكم بالله.
متزوج منذ سنة و عايش مع زوجتي بسلام و محبة ولكن فيه شيء وحيد منكد علي حياتي !
زوجتي عمرها عشرين سنة حساااسه كثييير و اذا أحد زعلها تشيل بقلبها و لا تتكلم ابداً و المشكلة انها لو تكون فهمت الموضوع
غلط ما راح تعرف انه سوء فهم لانها ما تتكلم خلاص تزعل و تشيل بقلبها و قلبها ضعيف مستحيل تواجه أي شخص جرحها.
و أنا قبل الزواج كنت غبي و جاهل كثير و اسمع كلام الناس انه لازم تفرض هيبتك على البنت من اول الأيام و انا طبعي باااارد
و احب المزح و الضحك و مستحيل ازعل او اسوي مشكلة مع أي احد بالعكس بالي طويل و علشان كذا خفت زوجتي تشوفني كذا
تستغلني قلتي لازم اطلع لها عضلاتي بفترة الملكة !!! " أغبى مني مافيه"
مع أني رجل يشهد لي الجميع بالعقل و الجميع يشاورني ووو بس ما ادري كيف تأثرت بهالكلام !!!!
المهم اللي صار:
خطيبتي كانت متضايقة من موضوع "تذكرت احد اقاربها المتوفين" و انا ما كنت اعرف انها متضايقة لانها كتومة و ما تتكلم ابداً لما تكون متضايقة عرفت طبعها من بعد الزواج.
كنت اكلمها و بصراحة كنت ابحث عن الزلة علشان اعصب و اهاوش و اسوي مشكلة من لا شيء صار اللي كنت مخطط عليه و صارخت عليها
و بصراحة جرحتها و مع كذا سويت انها الغلطانة و اعتذرت كثير مني و بصعوبة رضيت بعد يومين "انا غبي و جاهل جداً جداً" و كان
الموضوع تمثيلية مني لا كنت زعلان و لا أي شيء بس ابغى ادبها و ما كنت اعرف انها قمة الادب و طيبة القلب.
بعدها استمرينا بالمكالمات أسبوع و احسها تغيرت علي صارحتها و قلت متغيرة علي ؟
انكرت بالبداية و بعدين صارحتني انها زعلانه علي لانها ما اخطت ابداً و مع هذا اعتذرت مني و انها وقتها كانت محتاجة الكلمة الحلوه مني و وووو
بصراحة وقتها صحيت على نفسي وعرفت خطأي واعتذرت منها كثييير و قالت خلاص مسامحتك و انتهى الموضوع.
تزوجنا و مبسوطين سوى بس الاحظ عليها بين فترة و فترة تحزن و لا تتكلم و تفضفض لي ابداً حاولت معاها كم مرة و رفضت
و بعد فترة بعد نفس الشيء سالتها ما ردت علي و بعدين قلت لها لا يكون تتذكرين هذاك اليوم الى الان جلست تبكي و قالت ايه انت
جرحتني كثييير كنت حاطه آمال كثير عليك بس من بعد هذاك اليوم خلاص ما ابغى منك شيء اهم شي لا تجرحني مرة ثانية
و خلاص تأثرت مكانتك عندي و صرت أخاف منك كثيير !!!
وقتها كرهت نفسي جداً جداً واعتذرت مرة ثانية وثالثة و بينت لها ندمي و انه الشيطان وسوس فيني و كنت جد ندمان من كل قلبي وووو
و بعد نفس اول مرة قالت خلاص انسى الموضوع و أنا مسامحتك و راح أحاول انسى الموضوع.
المشكلة الى اليوم تجيها حالات الحزن و هي بالماضي عانت شوي فقدت أقارب و أصدقاء لها فجأة.
و أنا من أول يوم زواج معاملها مثل الملكة ما تسمع مني الا احسن و اطيب كلام و اطلعها و امشيها و كل شيء تتمناه و هي مبسوطة جداً معي لاكن هالحالات اللي تجيها تضايقني كثير.
دايم اللوم نفسي و احس اني السبب مع اني يا ناس ندمت و اعتذرت و لا كررت الخطأ و مع كذا احس بتأنيب الضمير كل مرة اشوفها حزينة !!!
وش الحل يا ناس ؟؟
مرات أحس زوجتي من البنات اللي يحبون يصيرون حزينات و مرات أقول لا أنا السبب ووو تعبت و رب الكعبة تعبت خصوصاً
هالحالة تصير لها فجأة و حنا نسولف و نضحك أو طالعين نتمشى فجأة تصير حزينة ؟؟
معقولة طول هالفترة و الاعتذار و المعاملة الممتازة جداً ما نفعت و خلتها تنسى الموضوع ؟؟
و كيف اخليها تنسى ارجع افتح الموضوع هذا معاها او لا ؟ شنو أسوي بالضبط ؟؟
محتاج ردوركم الله يخليكم و اذا تبغون أي توضيح أو شرح أكثر أنا حاضر,,,
التعديل الأخير تم بواسطة sadman2015 ; 22-12-2014 الساعة 04:02 PM