كل عام و الجميع بخير ..


اول مرة من تزوجنا تصير بينا مشكلة او اقول توتر ..
و طبعا كان له اثر علي ..

و كانت المشكلة قبل العيد بكم بيوم و بليلة العيد زاد التوتر
و كنا نتناقش و زوجي له وجهة نظر وانا وجهة نظر ثانية
و عصب و رفع صوته و انا تنرفزت بعد و رفعت صوتي
و مع الشد و الجذب قالي كلام ما توقعت اسمعه منه ..
شاء ربي يدق التلفون و ينقطع نقاشنا و كانت فرصة
هديت شوي و تمالكت أعصابي و هو بعد هدا و رديت عليه
و تركته ..
كنت مشحونة جداً و هو جلس وحده و سكت ..
و نام بالصالة و انا بالغرفة مع أنى كنت محبطة جداً من كلامه
اللى قاله الا أنى ندمت جداً أنى ناقشته و اعتقد هو بعد راجع نفسه
طووول الليل ما كلمته و لا كلمنى ما قدرت أفوت كلامه ..!
قلت خلاص عديها اليوم عيد و ما يصير انكد عليه و على نفسي
اقلها اسكت و لا اناقشه .. بس كنت من جد شائله عليه ..
في الصبح عادى كنت جهزت القهوة بس تركته له بالمطبخ ما جبتها له
و انا أفطرت وحدى .. ما دخل المطبخ الا بعد ما طلعت منه ..
أدرى انه ندم على كلامه و كان واضح بس يكابر ..!
و كنت اجهز نفسي عشان اروح لأهلي بعد صلاة العيد و هو جاء عندي
على اساس بيشوف المراية و لا كلمنى و لا كلمته ..
و لا رحت معه الصلاة مع أنى بالعادة اروح و رجع بعد الصلاة و معاه أبوي
يقول زوجي جبته لك عشان يعيد عليك ، يقولها على انه يمزح لان أبوي جاء من نفسه ..
انا فهمت ان زوجي قال كذا معناه ما يبغى أبوي يعرف بالمشكلة ..!
و كان يكلمني عادى جداً عند أبوي و لا كان شي صار ..
اصلا انا مستحيل اقول لأبوي ..

قالي أبوي أجي على الفطور ببيته و قال لزوجي لكن انا ما رحت
زوجي عصب و يقول انتى تعاندي مو كنتي مستعدة بتروحين ليش غيرتي رأيك
قلت له أنى كنت بروح عشان أعايد أبوي بس خلاص هو جاء ..
فما أبغى اروح ...
زعل و طلع و انا بدلت ملابسي و كنت تعبانه و نفسيتي نازلة و ضائقة
الساعة 11 جاء اخوي لانى ما جئت عندهم يسال ليش ما جئت و لما شافني
بالبجامه قال شكلك ما عيدتي ؟! و يسال ايش فيك
انا ما قلت له شي و الله بالعكس صرفت الموضوع بضحك و عادى
و بعدها راح و دقائق الا و اخوي الثاني جاي ..

و جاء زوجي و سأله أخوي غزلان ليش ما عيدت ..
زوجي طل في و على باله أنى انا شاكيه لهم ..!
راح أخوي و زوجي طلع زعلان ما كلمنى الا انه قال إخوانك لا يدخلون بينا
رجع و كان يتحاشى يشوفنى و عارف انه غلطان و خاصة بكلامه
بس يكابر و يعتقد أنى شاكيه لإخوانى ..

يبغاني انا اصالحه و انا الى الان مشحونه من كلامه
انا بعد غلطت بس ما يستأهل يقول اللى قاله ..
انا أبغى اروح لأهلي ارتاح شوي بس أخاف يفهمها غلط و تكبر
و ما أظمن إخواني يكملونه و تصير بينهم مشكلة ثانية ...

أقترح عليك تقولين له تراني ما علمت أحد عن اللي صار. واذا ما قدرتي تقولينها له مباشره أرسليها برساله بعدها انشالله ترجع المياه لمجاريها

قلت له و هو يعرف طبعي عمري ما قلت لاحد عن مشاكلي
حتى هو ....

السلام عليكم ورحمة الله تعالى وبركاته

أختي الطيبة غزلان
كل عام وانتي بخير يارب.

((خيركم من بدأ بالسلام)) ف لاتخلوا المسألة مسألة اطفال!! مين يجي يصالح مين!!
أنتم زوجين وروحين بجسد واحد وبينكم عقد ووعهد غليظ ف مو مستاهل الموضوع كل هالتحجيم!!

كل مافي الموضوع أنكم تناقشتوا في موضوع وأختلفتوا في الأراء
وفي لحظة غضب كلن منكم غلط على الثاني!! وبغض النظر مين اللي غلط أكثر او أقل
بتقعدون تحاسبون بعض على كلام خرج من غير قصد!! وفي لحظة إختفاء العقل!!

انتم زوجين غلطك واحد وصوابكم واحد والمنطق يقول أن المصيب يقوم المخطئ بكل حب!!
هذا هو معنى الزواج وهاذي هي روح الزوجية والمودة والرحمة !!

لاتروحين بيت أهلك إلا لما تهدي الاوضاع!! عشان فعلاً ماتكبر المسألة!!
أقعدي معاه وقوليلة حنا تكلمنا في موضوع وغلطنا على بعض من غير مانقصد
وانا غلطت وانت غلطت!! وحنا بشر ماحنا معصومين عن الخطأ!! فأنا أسفة على خطأي!! فهل أنت أسف على خطأك؟؟؟

انا متأكد أنه بيقولك أسف ..!!

حلو ان تكون عندنا مهنية في التعامل مع المشاكل!!

موفقة.
وفي لحظة فقدان العقل!!

__________________
استغفر الله واتوب إليه

ما عندي مشكلة اعتذر له و اصالحه
بس هو مؤ معترف بغلطه ..
و ما ينفع أتكلم الحين لان نفسيتي ما ستقرت و راح نتوتر مرة ثانية و بشكل اشد
ما تعرف هو ايش قال !! مهما كان غضبه ما يعطيه الحق انه يكلمني كذا
و يتوقع بعد أنى شاكيه لإخوانى ..
انا ما ابغى أقوله أنى غلطت لان هو أخذ حقه وزيادة و هو اللى بادي بالغلط

لاتتكلمين الحين معاه أرتاحي وريحي أعصابك ولما تهدين تكلمي ع راحتك!! بس بشكل مايزيد المشكلة!!
وبعدين زوجك حبيبك غلط عليك ومهما قال إذا انتي اقرب الناس له ماسامحتية منو يسامحة!! رققي قلبك شوية!!

بالنسبة لشكوة أخوانك قوليلة انا ماقلت شي ولا صار شي وينتهي هالموضوع!!

ولأنه بادي بالغلط أحرجية بكرم أخلاقك وقوليلة لأنك حبيبي بسامحك ولو اي مخلوق غيرك ماسمحتلة!! ولاعاد تقولها مرة ثانية لأنها بجد زعلتني ولو أني ما احبك ماكنت بسامحك!!

أستعملي الكلمات الرقراقية والله العظيم بتكسبينة العمر كلة خصوصاً اذا كان يبان معاة المعروف!!

والكلمة الطيبة أولاً وأخراً صدقة!! والأقربون أولى بالمعروف ، وخيركم من بدأ بالسلام!!

أمانة لاتخلين للشيطان مدخل عليكم وأدحرية وتصالحوا وسكروا بابكم عليكم وانتم متراضين.

عسى ربي يصلحكم ويسعدكم ويحنن قلوبكم لبعض.

__________________
استغفر الله واتوب إليه

معليش يا حبيبتي طولي بالك الحياة بدها صبر وسياسة
اختصري المشاكل ولا تنكدي على حالك وانت بادري بالاصلاح بس اليوم علشان الدنيا عيد
المتفائل بالله كل عام وانت بخير طمنا على اخبارك

__________________
انا لله وانا اليه راجعون

اقترح عليك حاليا تبينين له انك ماخبرتي احد

( بصراحه توقعت حياتك مع اهلك الى الان مكركبه بس الحمدلله يبدو لي ان المياه رجعت لمجاريها )

الله يهدي سرك ويشرح صدرك
( انتي ادرى الناس بزوجك اذا كان يقصد الكلام اللي قاله او لا )
احيانا الانسان فقمة غضبه يطلع كلام يندم عليه قد شعر راسه بس المشكله المكابره
( اتوقع انه يمووون عليك بهالمكابره خصوصا انك متأكده من حبه لك )

غزوله يا قمر قوميي واتد\لعيي عليه


واجلسي فييي حضنه وقوليي له مش جايه اعتذر ولا اعاتب ,جاييه آخذ العيييديه واعايد عليك فقط


واتدلعي وفهمك كفايييه

هم ما يعرفو يعتذرو الا بالفراش ....


قوميي اموره انتي


لحظة غضب وطلععت خلاصص عديها

هو عارف حالو غلطان من تصرفاته

أختي غزلان ’’

أسأل الله أن يؤلف بينك وزوجك ’’

أنا جلست أقرأ القصة ,, وماني عارف أنتي وش تبين بالضبط ,, هروبك من المشكلة لأهلك قبل أن تحل غلط ’’ وما هو حل ’’
وما دام عارفة إنه احتمال تكبر رقعة المشكلة و تقوم مشكلة بين زوجك وأخوانك ليش تفتحين أنتي الطريق للشيطان ’’ وتجعلين مجال للمشكلة أن تتسع ,,
كتابتك للمشكلة هو جزء من العلاج ’’ الكبت اللي في قلبك طلعتيه وباقي شويتين وكملي جميلك ’’

أتمنى تجاوبيني على هالأسئلة .. لأنه بإذن الله وحده تنتهي مشكلتك ,,

1- وش تبين من طرحك للموضوع ؟ ( وش هدفك من طرح الموضوع بوضوح )
2- أنتي وش سويتي عشان تحلين الموضوع ؟ ( ما هي الحلول التي فعلتيها لإنهاء المشكلة )
3- وش تقييمك للشيء اللي سويتيه عشان تحلين الموضوع ؟ كم تعطينه من 100( متعلق بالسؤال الثاني أنتي عشان تحلين المشكلة كم بذلتي من جهد وكم تقيميه من 100 ’ يعني 30 من 100 للحلول اللي سويتها أو 40 من 100 أو 60 من 100 )
4 - بناء على إجاباتك ستعرفين الحل وسنرشدك أنا والأعضاء لبعض الحلول المناسبة ’’

تأكدي أن المشاكل لا تتعدى نسبتها الـ 10 بالـ % ’’ لكن ردات فعلنا هي من تكبر المشكلة وتنشئ سلوكا سيئا ’’
إذا كانت ردة فعلنا إيجابية للمشكلة فستكون أفعالنا إيجابية وتنتهي المشكلة بسرعة وسهولة تامة من الطرفين ’
إذا كانت ردة فعلنا سلبية للمشكلة فستكون أفعالنا سلبية وتكبر المشكلة بسرعة وسهولة تامة من الطرفين ’

بالتوفيق ’’