بسم الله الرحمن الرحيم
السلام عليكم ورحمة الله وبركاته

أولا أحب أشيد بهذا الصرح الشامخ بأعضائه الذين يمتلكون من الحكمة والرأي الصحيح الذي ينتج منهم بعيدا عن أي الضغوط كما هي حالتي الان وهذا ما لمسته من ردودهم وآرائهم..
لهذا اكتب موضوعي ولا ادري هل أحتاج لأحد أبوح له ما بداخلي أو أحتاج لمن يدلني على الطريق الصحيح..

لن أتلكم عن قلة أدب الزوجة فهذا الموضوع صار بالنسبة لي عادي..
لن أتلكم عن طول لسان الزوجة فهناك من لديهم أطول..
لن أتلكم عن محاولة الزوجة في أبعادي عن أهلي وبذات (أمي الغالية) بقصص خيالية واكاذيب منها..
لن أتلكم في أمور كثيرة فهذه الامور تتعالج مع الوقت ونجحت في التخفيف منها ... والحمد لله على كل حال

سوف أتلكم عن ... الخــــيـــانــة
خيـــانة زوجة لزوجها
بدأت قصتي عندما أحببت أحد بنات أقارب وهي تبادلني الحب على حد علمي وانتظرت الوظيفة بفارغ الصبر حتى اتقدم لخطبتها وفد رزقني الله عزوجل بهذه الوظيفة ولله الحمد والشكر وبعد تعيني بشهر تمت الخطبة وتقدمت للبنك لأخذ قرض للتكاليف الزواج..
وبعد شهرين من الخطبة تمت الملكة وكنت ازورها بين كل فترة وفترة وكانت المكالمات بيننا لا تتسع للحب والغزل والرومنسية.. بعد فترة كنت عندها في البيت وكانت توريني جوالها وفجأة دخلت على الرسائل المرسلة وكان هناك رقم غريب بدون اسم وكانت الرسالة وسائط صورة رومنسية سالتها عن صاحبة الرقم (بحسن نية) ردت هذه بنت خالتي فلانة الرقم كان مميز جدا ويسهل حفظه...
بعد فترة يمكن شهر كنت عندها واذا بنفس الرقم يتصل وكانت تحاول تخفي عني الجوال واعطت الرقم مشغول شكيت بالأمر وسالتها مين المتصل ردت هذه صديقتي فلانة وهي عارفة انك عندي جالسة تأذيني...
تناقض في كلامها..
خرجت من عندها سجلت الرقم بجوالي اخذت شريحة مجهولة اتصلت على الرقم وهنـــــا كانت أكبر صدمة في حياتي..
طلع رجـــل قفلت وانا مصدوم وكنت احاول ادور أي عذر أو مخرج لها من قبل أنا أوجهها طلعت اسم صاحب الرقم..
طلع من قبيلة بعيده عنا تمام وعن صديقاتها اتصلت عليها وصارحتها بكل هدوء وقلت أنتي تخونيني مع هذا الرقم حاولت تبرر انه رقم صحبتها فلانه ولكن هذا اخوها رد ..
جلست اجمع الخيوط قدامها الصغيرة قبل الكبيرة التي تثبت انها تعرف هذا الشخص فعرفت انه ما في مفر قالت هذا السواق كان يوديني انا وأمي السوق وطلع واحد قليل ادب يتصل ويطفشني باتصالاته رديت بسرعة انا طلعت لهذا الرقم فواتير تفصيلية عن طريق احد الاصدقاء في شركة الاتصالات والرقم هذا مكالمتك معه بالساعات وهذه كذبة مني لكن اسم الرجل ساعدني وخلها تصدق.. ارتبكت وترددت في الكلام تحاول تبرر موقفها ما قدرت اتحمل قفلت الخط وجلست افكر هذا اللي انا منتظرهـ من سنين هذا اللي كنت متلهف عليه..
اتصلت عشرات المرات ما رديت كنت افكر كيف اتخلص منها كنت افكر في الفرح والكروت اللي توزعت للناس وش اقل لاهلي وش اقل لاهلها كنت احاول اتخلص منها وفي نفس الوقت استر عليها فجاة اتصلت على جوالي خالتي وهي عزيزة على قلبي بحكم قرب السن بيني وبينها وقالت هذا الرقم أنا اكلمه وزجتك مالها ذنب انصدمت وكانت تترجاني اني ما اعلم عليها وانها هي تركته بس هو يعرف رقم زوجتي ويطفشها يبي رقم خالتي وانه يهددها انه يفضحها..
صدقت مدري ليه يمكن عشان خالتي او يمكن عشان حبي واحلامي وحياتي ضحت خالتي بعلاقتي معها وليتها ما ضحت صرت ما اكلمها ولا اسلم عليها واستحقرها ..
تم الصلح معي زوجتي وبعد تدخل امها بعد علمها بموضوع خالتي ..
تزوجنا في بدايت شهر العسل لاحظت على زوجتي تبكي كثير وهي لوحدها اسالها ليه تقول عشان تركت بيت اهلي كنت احاول اواسيها واطلعها ما خليت مكان بالديرة ما وديتها ...
مر شهرين على الزواج تعبت زوجتي وديتها المستشفى طلعت حامل طرت من الفرح بسماع هذا الخبر صرت ادلعه اكثر مما كانت عليه مرت الشهور وكانت ثقتي بزوجتي لا حدود لها لدرجة ما عمري فتشت في جوالها وفي مرة كنت ابي اتصل من جوالها ولاحظت ان سجل المكالمات ممسوح سالتها قالت يثقل على الجهاز عذر غريب خلاني اشك في الموضوع طنشت جيت بعد كم يوم فتحت جوالها لقيت السجل ممسوح وكنت اتصل عليها وانا في العمل واحصلها انتظار وكل مرة تتعذر بأحد اخواته او امها او خالتها او صديقتها كان يكلمونها بديت اشك فيها جلست فترة احاول اكتشف وش تخبي عني ركبت في جوالها برنامج تسجيل المكالمات مع حفظ رقم المتصل خليتها كم يوم وبعدين اخذت جوالها بحجة جوالي مافي شحن وانا مستعجل خرجت وعلى طول فتحت البرنامج وحصلت مكالمات تقطع الشك باليقن نفس الرقم اللي كان في المشكلة الاولى وكانت تكلمه بحب وغزل هـــــذه بسيطة المصيبة في واحد ثاني تكلمه رقم جديد يعني جامعه بين زوج وعشيق وصاحب انصدمت من هذه الحرمة واللي يقهرني كانت تقول لعشيقها زوجي مو مقصر معي باي حاجه بس قلبي معك اخذت نسخ من المكالمات ورجعت البيت وكنت في قمة العصبية وهي لاحظت هذا الشي اخذت جوالي واعطيتها جوالها وخرجت وهي تناديني اتصلت عليها قلت لها انا مسافر خلي ابوك او واحد من اخوانك يجي يأخذك قفلت الخط وقفلت جوالي جلست يومين خارج المدينة مافي احد يعرف انا وين كنت بس اسمع المكالمات وابكي ما ابكي عليها لا والله لأني كرهتها ضعف ما كنت احبها .. كنت ابكي لأني فضلت هذه الإنسانة على امي ليس بالحب انما بالمعاملة والدلع كنت ابخل على امي واعطيها وهي ما تسوى ظفر امي الغالية... كنت ابكي عشان الطفل اللي في بطنها وش ذبنه..
تأكدت انها راحت بيت اهلها وهي عرفت اني زعلان منها وكانت شاكة اني كشفتها... رجعت بيتي جلست اسبوعين مختفي عن الناس محتار مهموم ضاقت بي الدنيا اتهرب من اهلي واهلها..
اخذت قرار اني اصارحها واشوف ردة فعلها فتحت جوالي اقراء الرسائل و ماهي الا دقائق حتى اتصلت رديت عليها فكلمتني بقلة ادب وترفع صوتها وانا ساكت اقول في نفسي طلعت انا الغلطان وهي الصح سألتني ليه سويت كذا قلت انا ما اعيش مع وحده خايـــــــنـــه
ردت انا متربية احسن منك وبدأت تتلفظ عليا شغلت المقاطع وهي تسب وتشتم فيني سمعت المكالمة الاولى تفاجأت وسكتت وسمعتها مكالمة ثانية للشخص الثاني وهي ساكتة قفلت المقاطع قلت لها وش ردك قالت بكل برود مو انا خاينة هيا طلقني صراحة تفاجأت بردة فعلها وماهي الا ثواني بعد كلامها الا وتبكي وتقول انا والله احبك واموت فيك بس مدري وش ليه انا سويت كذا قفلت الخط في وجهها لأني وقتها ما كنت مستعد لأي كذب ثاني كنت محتاج الصراحة منها اتصلت مرة ثانية رديت عليه وقلت لها بصوت عالي.. انا ابي الحين اعترافاتك وبكل صراحة من يوم ما بديتي مع هالشخص الين الحين ومن هو هذا الشخص الثاني اعترفت بكل شيء من يوم ما تعرفت عليه الين الحين .. سجلت اعترافها من دون ما تدري وقلت لها مستحيل ارجعك كلها كم يوم واطلقك قفلت الخط جلست اسبوعين وانا ماني قادر على الطلاق لأنها كانت خطوة صعبة ومازالت..
مدري وش اسوي احترت كنت ابي احد استشيره ما عرفت اروح لمين ماكنت ابي استشير على سالفة الطلاق كانت فكرة الطلاق مجزم عليه بس ليه انا متردد...
بعد ضغوط على زوجتي من اهلها ومن خالتها وامها عن سبب الخلاف اعترفت لخالتها بكل شيء..
عرفت ام زوجتي بالسالفة تعبت وتنومت في المستشفى وكانت بتروح فيها بس الحمد لله .. ام زوجتي كبيرة بالسن عندها القلب والضغط والسكر ومعزتها عندي من معزت امي واحبها مثل ما احب امي ولا احب احد يزعلها... خرجت من المستشفى واتصلت عليا وتبكي وتقول ان بنتها اعترفت بغلطها وان في ولد في بطنها سامحها واعطيها فرصة اسحب منها جولاتها ولا تخلي معها أي وسيلة اتصال واذا كررتها لا تطلقها اقتلها واحنا مسامحينك كانت تكلمني ونبرت صوتها باين عليها التعب قلت لها يصير خير ان شاء الله...
جلست افكر وش القرار اللي راح اتخذه خاصة امي بدأت تضغط عليا اني ارجع زوجتي وافكر في عمتي ام زوجتي وافكر في ولدي اللي لسه ما شاف الدنيا.. طلعت بقرار ارجعها واعطيها فرصة بدوس على قلبي واضحي...
رجعتها البيت في البداية ما كنت أطيقها لكن بعد الولادة وبعد ما جاء ولدي فارس غير فيني اشياء كثير بديت اعاملها بحب ورومنسية وبديت ادلعها ورجعت زي ما كان بعد الزواج واعطيتها الثقة زي اول واحسن...
مرت اربع سنين من ولادة فارس كانت الاربع سنين كلها مشاكل بسبب قلة ادبها واحترامها ولسانها الطويل كنت اطنش عشان ولدي بدا يكبر وصار يفهم وكل هذا والله ما اقصر معها...
الان وبعد اربع سنين وبعد تغير رقمها عدت مرات حتى اكتشفت انها مازالت على علاقة بذلك الرقم الذي قبل الزوج بعد ما شفت في السجل جوالها رسالة مرسلة لهذا الشخص وعادت لمسح السجل كل يوم..
الان لا يوجد في بالي الا الطلاق
العواقب :
ولدي بيتشتت .. خلافات بتصيير بين اهلي واهلها .. امها مسويه عملية قلب قبل شهر والله يستر عليها

هذه قصتي وابي شوركم ماذا افعل؟
اطلقها.. كيف اطلقها باقل الخسائر؟
وهـل الطلاق (في بعض الاحيان) بداية حياة سعيدة؟

سامحوني على الاطالة لكن والله حاولت اختصر لكم بما في داخلي واكتب لكم بعض التفاصيل لتكونوا بالصورة..
وسامحوني على الخلط بين اللغة العربية الفصحى واللغة العامية هذه اول مرة اكتب قصة او رواية...