السلام عليكم ورحمه الله
تمنيت ان اول موضوع لي بعالم المتزوجين مايكون مشكله لكن الحمدلله على كل حال
تزوجت قبل شهر وزياده من شخص لا اعرفه لامكالمات ولاشي مع اؤؤيد المكالمات للراحه قبل الزواج
وانا الان في بيت اهلي اريد الطلاق مع اني اعرف الطلاق مو شي سهل للبنت خصوصا
بس عشت معاه وماشفت الا الانتقاد بشكلي وبجسمي قسم بالله قلب مزاياي عيوب لين صرت اوقف قدام المرايه احس اني اقبح بنت على وجه الكره الارضيه وبالاخير صرت اقول ماراح احط مكياج كله واحد جاني احباط مع انه هو شافني وجت بعده امه واخته انا واثقه من نفسي الحمدلله
2- كلمه حلوه ماسمعتها احبك عمري حياتي الخ ولاحتى كلمه مدح ماسمعت لبست او مالبست كله واحد حتى مايناظرني ولاكاني عروس يطالع التلفزيون وبس ولاقرب لي ابد
3- ضعيف شخصيه وخواف بشكل مو طبيعي ويقص لي قصصه مع الخوف والصياح لدرجه اني استحقرته انه كرجال يكون بهالضعف كلمه اصيح عنده عادي لمواقف احس انها تافهه
4- دايم ساكت ويبغاني انا اللي دايم احكي ولو سكت وقلت ماعندي خلصت قال عيديهن و ماقال ولا كلمه لعلمكم هو مايطلع لا استراحات ولاشي بيتوتي يعني يعني مافي حوار بيننا احس تفكيره ضيق وان حكى باهله وبس
5- فيه غرور بشكله يمدح عيونه وانه ابيض ويقص لي قصص البنات يلاحقونه بالاسواق وهو مع اهله وقصص قريباته اللي يحبونه وامهاتهن كلمو امه علشان يتزوجهن وانه كثير يهدا عليه بنات وهو اللي يرفض وقالي ان 90% من المواصفات اللي يبيها لقاها فيني؟؟؟؟ ويحس انه ذوق وفاهم بالعربي اخذ بنفسه مقلب يعني
6- خياله وااااااااااااسع جدا لدرجه انه يتخيل شكل ولده ويوصفه لي؟ وكثير بلسانه تخيلي احس نفسي مع بزر اقوله انا ما اقدر اتخيل كذا
وهو معاه ثانوي وموظف وعمره 30

من الكلام اللي فوق ممكن تقولون ماحبك؟ بس يوم رحت بيت اهلي جا لاهلي يصيح يقول خلوها ترجع واحبها وين هالحب وانا عنده ماشفته ولاعبر عنه انا نفسي طابت منه
انا جامعيه موظفه عمري 27 والوالد الله يرحمه متوفي وانا طفله.
ويوم واجهه اخوي تعذر باعذار بايخه
1- الانتقاد يعتبره خفه دم وعلشان يمون علي ونصف الانتقادات انكرهن وقال هي انتقدتني بعد وكذب علي عند اخوي وقولني كلام ماقلته علشان يبرر موقفه
2- ماقال ولاكلمه حلوه بحجه انه خايف يروح بالي للجنس وانا طالبه منه يعطيني فرصه كم يوم اتعرف عليه وارتاح له
ما اتوقع ان فيه عروس يعاملها زوجها كذا الا اذا كان مايحبها وهذا يصيح علشان ارجع له
ما اقدر اعيش مع انسان همجي كذا مدري من وين جاي ومتاكده ان الطبايع ماتتغير او يتغير فتره ويرجع
اسالكم بالله ساعدوني فيه عروس يعاملها زوجها كذا وهو يقول يحبها
عجزت افهم شخصيته ما اقدر اعيش مع انسان يحطمني اقدر ارد عليه واعيب بشكله وبجسمه بس ما اتنزل اسوي كذا مع غريب وشلون عاد مع زوجي مع اني فهمته وقلت له الاحترام عندي اهم من الحب بس ولا على باله. مره يقولي ابيك تسمني ماتدخلي مع الباب ومره تزودي 4 كيلو بس ومره يقول اذا سمنتي لازم تدخلي نادي؟؟ جنني
تكفون ساعدوني والله اني بحاله مايعلم فيها الا الله

عفواً تم تعديل العنوان ليتضح المضمون
الإشراف

الله يكون بعونك .. بس تقدري الرجال تغيريه .. وشووفي ياقلبي .. يعني جيبي كلام وقولي مداح نفسه كذاب .. واذا هترك قولي انا معجبة بنفسي وانا يهمني ارضي نفسي بشكلي .. واذا موعاجبك شكلي ومهما سويت ماراح يعجبك انت غير شكلك اذا تقدر .. واذا قال جسمك انحفي اسمني يمكن ماتغيرين لبسك وتنوعين شكللللللللي كثير ..اذا شخصيته ضعيفة ويقول البنات يلاحقووني يمديك تسيطرين عليه وقولي اذا معجبتك البنت ليش مااتزوجتها الى هالدرجة فرحان فيها اكيد اذا لحقتك بتلحق غيرك لاتتوقعها زوجتك ماتشوف غيرك ..
وقبل كل شيء استخيري والطلاق اجعليه اخر الحلللللللللللللللللللللللللللللللللللللول

__________________
وإني لأرجو الله حتى كأنني ... أرى بجميل الظن ما الله صانعُ .

خيتي هداك الله وزوجك يارب الى طريق لسوي,,

اخيتي ترا بعض الرجال ما يعرف يعبر ويقول بالسانه,,

فقط في قلبه الاحترام وانتي اخيتي توك متزوجه


علميه انتي وجلسي معه في مكان وتكلمي بالموضوع..

وان شا ء الله خير

__________________

هناوي
والله ما اقدر اتحمل انتقاده كل يوم مطلع لي شي انا اقدر اخليه مايسوى وانتقده وارد عليه بس بذمتك ابعيش طول عمري ينتقد وانا ارد عليه ؟؟؟؟؟؟؟ ياناس هالحكي وانا عروس بشهر العسل وش بيقولي بعد سنه؟؟ انا انصدمت بالزوااااااااااج صدمه ماتتوقعونها

مرحبااا حبيبتي ...

الله يكون بعونكـ ....ويهدي زوجك ...

ما أدري شقولك أنا من كلامك عنه احس انه فيه شي نفسي!!!!

يمكن بعدين يتغير ...

ماأملك إلا الدعاء لك...

ياسلاااااااااام يايتيمة نجد

سبحان الله هذا الزوج بالذات هدية لك من رب العباد

ربي اعلم بحالك ويتمك ورجال زي كذا انسب حل لك

تدرين ليه؟

لانه عنده شخصية ولكن مهزوزة شوي تحتاج شوية دعم وثقة

الرجل الضعيفة ثقته في نفسه غالبا مايلجأ للاكثار من سرد مثل هذه القصص (معاكسات البنات له واعجاب قريباته به) ليغطي مايشعر به من نقص امامك

كذلك يحاول ان يستعيب من شكلك وهذا النوع ثقي تماما انهم لايعيبون الا مايعجبهم يعني يعيبون الشي الي يعجبهم

الحين بعد ماعرفتي زوجك من اي نوع لازم تعرفين وشي اهم ميزة فيه (ترى مميزاته كثيرة على فكرة)

اهم ميزة فيه انه اذا استطعت تغييره وزيادة ثقته بنفسه سوف يتيم حبا بك وسترينه رجلا حقا كما تحلمين به

وتصبحي ارضه وسماءه وماء الحياة الذي يعيش به

ويعوضك حتى عن فقدك لوالدك

مع العلم بان تغيير مثل هذا النوع من الرجال لا يستغرق معك اكثر من سنة وممكن اقل حسب شطارتك وانوثتك

لكن هذ مشروط بانك تلحقين عليه قبل مايتعود على بعدك ويعافك الخاطر

اذا استوعبتي كلامي ابكتب لك طرق تتبعينها معه بقدر مااستطيع من الدقة ان شاء الله

الله يكون بعونك ممكن تكون عنده عقده نفسيه لكن انا من رايي انك دامك تزوجتي وانتهى الموضوع انك تصبرين عليه شوي ممكن يتغير مع الوقت والله يوفقكم ويسعدكم ويسر اموركم

الله يكون بعونك يا يتيمة نجد...

يا قلبي انت.. ترى مافيه حياة من دون معاناة.. و هذي هي سنة الحياة

بس اللي لازم تعرفينه هو وش الخيارات المتاحه أمامك.. و وش افضلها

أنا أقول انت بالطبع اعرف الناس بوضعك، إذا كنت تشوفين ان احتمالك لهالزوج و المشاكل اللي عنده و احتمالية تغيره من عدمها أفضل من وجودك في بيت اهلك(و تذكري انك مهما كان ماراح ترجعين زي اول) فحاولي انك تغيرين زوجك... و فيه طرق كثيره يبدو ان سهام عندها منها بعض الشيء

و إذا رأيتي ان عودتك لبيت اهلك أفضل .. فاختصري طريق التعب و تغانمي عمرك

و صلاة الاستخارة هي أفضل ملجأ

الله يكتب لك اللي فيه الخير

اشكر كل من تفضل بالرد علي
وجعل الله ذلك في موازين حسناتكم
سهاام هذا هديه؟؟ اذا كان ماعندك مانع اتواصل معاك بالخاص
هند بنت عتبه الحمدلله اعيش ببيت اهلي معززه مكرمه افضل من زوج يكرهني بعمري بكلامه بس ودي اعرف
ليش قلتي البنت ماترجع لاهلها زي ماكنت؟؟؟؟

اختي
كان الله في عونك
اذا كانت شخصيته كذا فانتي تستطيعين تغييرها
حاولي ان تتحدثي امامه بالمواصفات والطباع التي تعجبك سترينه يطبقها
حاولي ان تمدحينه ببعض المواقف قولي له انكي تحبين ان تسمعين منه الكلام الجميل
اجعلي ثقتك بنفسك اكثر وزيدي ثقته بنفسه
اما الطلاق فأجعليه اخر الحلول لاتفكري بالطلاق الان
وعودي اليه سترين بعض التغيرات ومعكي سيتغير بأذن الله