السلام عليكم ورحمة الله
وكالعادة اقص عليكم احدى معاناتي اليومية
مااقول ان زوجي مايغار ابد ولكن مواقف غيرته قليلة ومحدودة وكنت انا السبب فيها عشان اصحي فيه هذا الاحساس ...انا الحقيقة مدري وش اقول
ماني شينة ولاني ملكة جمال لكن الحمد الله لي برستيجي ولي انوثتي رغم كل همومي ولكن لا اتخلى عن مظهري كامراة وكانثى طاغية امام زوجي والله ثم والله كل راتبي يروح في اللبس الفاخر والعطورات الراقية والمركات العالمية ولا ازكي نفسي على الله من هالناحية والحمد الله على النعمة
وفوق هذا كله فاني من بين فترة الي اخرى اسافر الي اروبا لزيارة والدتي لانها مقيمة هناك وانا كنت مقيمة معها قبل زواجي
ولكني لازلت اسافر لوحدي بسبب مواعيد تجيني وبحكم اني كنت مقيمة هناك
طبعا زوجي لا يعارض سفري ابد ولايقول لي اجلسي ولا خليك بسافر معك او شى من هذا القبيل
رغم اني تعرضت الي رسالة غرامية بوسط الطائرة والشخص بعد ماقمت دورة المياة حقت الطيارة الله يكرمكم عشان اتوضى للصلاة اسغل فرصة غيابي وحط الرسالة بكيس العطور الي انا شريته من المطار
والله ياجماعة رسالة يقشعر لها البدن من حسن في التعبير وفصاحة بالكلام
والله اني لم اكشف وجهي بالطائرة اللتزمت نقابي لين وصلنا للديار الفرنسة وجلس يقول فيني كلام حسسني اني ملكة جمال الكون .ورغم هذا ماهز فيني شعرة
المهم بعد ماشفت زوجي برجوعي له وريته الرسالة وكان الهدف اني احرك شعوره
تدورن وش قالي؟؟
قالي الله يقلعه شفتي الي يسافر لوحده؟
ولم يسالني هل كشفتي وجهك ام لا
ولم يحلفني بالله اني تجاوبت معه ولا لا
صدقوني ماحاول يستفسر او انهزت فيه شعرة
ياجماعة لو اني قردة يغار علي بس عشان وضعي وسفري
هو ببداية الزواج كان يغار شوي وكنت انبسط لغيرته بس الحين خلاص راح كل شى
ومرة كلنا ببلد اجنبي وطلعت خصلة من شعري وتعمدت اني مااصلح طرحتي عشان هو يقولي وربي ماتكلم كلمة
وومرة دق علي واحد بالغلط وحطيت على السبيكر والشخص من سمع صوت حرمة بغى يطول بالمكالمة وانا قفلت بوجهه
الشى الوحيد الي قال مين ذا؟
قلت مدري ..وسكت’
هل عشاني بينت حبي له وغيرتي الزايدة عليه جاه برود ولا هو طبعه كذا؟؟
ياجماعة اتمنى انه يشك فيني اتمنى انه تجيه كريزمة غيرة ابد ماقدرت اثير غيرته ولو حتى شوي
وحاولت اني ابين له اني اعشق الرجل الي يغار ولكن المعلومة ماوصلت او انها وصلت ومطنش
انا اخترت زوج متدين لسبب واحد فقط عشان ترتاح نفسيتي من الغيرة والشك وكنت اقول الي يخاف الله لاخوف عليه والمتدين راج يغار علي وتقطع غيرة علي
زوجي متدين الحمد الله ولكن مو ذاك التشدد يعني مرة فري كنه عاش بامريكا
وهو من قبيلة جدا محافظة وانا مستغربة كيف فري
لاتقلون لي يثق فيك ربما يكون هذا صحيح لكن مو عاد لهالدرجة
انا مستحيل اخون زوجي ومستحيل اروح للحرام الله يحفظني والله رغم كل الفتن افانا الحمد الله ماسكة نفسي اسال الله ان يثبتني
صرت اقول مع نفسي يمكن طفش مني وماعاد صار يبغاني وحاولت اسوي اشياء وكل مرة يبادر هو بطلاقي مع العلم اني كنت انا اول من تهدده بالطلاق وكان يتقطع ويقولي والله يفلانة لا افوز بقلبك
كان دخل تحدي والحين ربح
ومرات في مواقف عشان ماتقلون ماعطيته حقه بالكلام يكون شاريني واهلي يشهدون له بكذا
حتى يقلون لي احيانا لاعصبت وطلعت مني كلمات مب زينة الله المستعان لو واحد مكانه كان طلقك
انا احترت ياجماعة
ابييييييييييييييييه يغار علي ابي احس اني انثى ترى بديت افقد الثقة بالتدريج بنفسي
نسيت اقولك شى
مرة قلت له ترى واحد عاكسني ونزل من سيارته وجاني وشخطت بوجهه وقلت له احترم حجابي
وهذا صحيح والله العظيم
تدرون وش قالي ؟
جد مايستحي قليل حيا.... ياااااااااااااااربي وش ذا وربي تفقع قلبي مت والله مت من برود اعصابه
ومرة اخترع له قصص عشان اشوف يغار ولا لا ابد الجدار يتحرك وهو لا
ومرة قلت له طفشاااانة وتشدينا شوي بالكلام قلت له ابطلع اسوي لفة لوحدي باليل طبعا باروبا
تدرون وش قالي ؟؟؟؟؟؟ اوكي حبيبتي انتهي لنفسك
ياعالم ابغى زوج يغار علي يخنقني يموتني يعذبني يحكمني
ابيه متشدد ميخالف بس ابغى اربح في دنيتي ودنياي ابي احس ان هناك من يغار علي ويخاف على عرضي
يادنيا ارحميني وعذاب ابوس راسك فكني ويااااااااااااااااااااااااااااااااااربي انا عبدتك الضعيفة انصفني وشوف من حالي

اختي بارك الله فيك

يمكن اللي واصل لزوجك انك متكبرة وشايفة حالك وتفتخرين امامه دائمآ بأن كل الرجال يركضون وراك ويتمنوا نظرة منك { يمكن كده يفكر هو } وفكر لو بيغير عليك بيزيد يكبر براسك ويزيد غرورك اكثر

حتى لو كنتتي شايفة نفسك مو متكبرة يمكن هو شايف العكس

الرجل مستحيييييييييييل يتحدى الا المرأة المغرورة او اللي شايفة نفسها

ولا يقول بفوز بقلبك الا لو كانت رافعة نفسها فووق والحين وصل للي يبيه وربح فخلاص



هذا تحليل لحالة زوجك ووجهة نظر لمشكلتك لا تعبر عن رأيي الشخصي فيك بكل تأكيد


ربي يفرجها عليك وعلى كل متضايق

حبيتي سعاد وربي البيت مو من طبعي التكبر
شوفي يالغالية انا في بداية زواجنا ماكنت احبه وتدرين قلبي مو بيدي
لكن مع الوقت صرت احبه وانا احب ياسعاد كل من يحبني
بس سعاد تشوفين ان وضعه طبيعي؟
بالله عليك كيف ماكان وضعي فلازم يغار وبعدين انا مو من النوع الي اغلى كثير يعني لو شفته خاضع
صديقني مايكبر براسي وبالعكس يكبر بعيني
والله ياسعاد الي يغليني بدم قلبي اشتريه عمري ماكنت مغرورة على الناس او متكبر عليهم
الكبر لله

ليش ما تجربي تشيلي هذي الأمور من راسك
اختبارات وشغلات وتبغي تشوفي ردة فعله
أنشغلي وإياه بأمر جديد
أخشى إن كثرت محاولاتك عشان يغير عليكي تنقلب لشك ووسوسة
وتكوني أنتي السبب
الله يهديكي بس

ياليت يشك فيني يالود انا ماصرت احس اني انثى
مو معقول هالبرود الشى اذا زاد عن حده يصير سامج
ترى والله مو من طبعي اسوي هالحركات البايخة بس تعبت وابي احدد موقف زوجي من الاعراب
ود صدقني الوضع مو طبيعي

أنا أختك الورد المجروح
أنا اشوف أشغلي بالك عنه أحسن
كثر التفكير في هذي التفاصيل متعب
ريحي نفسك
وفكري في الحلول اللي أعطوك الأعضاء للتدخين مثلا للغيرة.. للحب بحكمة وعقل

ورد اختي تشوفين اني الي اشكي منه مايخليني ادخن واقول ليش زوجي مايغار علي؟
ياورد في حاجة من الاثنين يا اني اصير مقتولة الاحساس زيه ولا اغار عليه
ياني اتحول الي انسانة شرسة ومحطمة من داخل
وتراني تحطمت
لولا خوف الله وعقابه كان مداني فارقت هالدنيا الدنيئة
اليوم رحت حق دكتور نفساني
قلت اخفف من همي شوي
اول كلمة قالي وش نفسك فيه
قلت له ابغى اموت
انتي عارفة الاروبين يكبرون السالفة قام قالي لازم تتحولين على مستشفى امراض نفسية
انا خفت قلت له وشدعوة
قالي تبين تنتحرين
قلت لاهونت بس ماني مجنونة
الاروبين يؤمنون بالازمات النفسية وان الانسان لا انضرب بنفسيته تحطمت حياته
ورحعت البيت وانا ابكي وعلمت زوجي السالفة بالجوال جلس يضحك

انتي ناقصة بكا وتحطيم؟؟

اختي الله يرضى عليك فكري بإيجابية
فكري في نعم الله عليك
فكري في ميزات زوجك
مش لازم يكون كما تشتهي أنت بالضبط؟؟
مافي أحد كامل ومرونته في وضعك بصراحة.. ميزة
أستغليها في إنك تتغيري للأفضل
بمعنى شخص ثاني كان طالبك تتركي التدخين مثلا بسرعة زي ما وعدتيه صح؟؟
كوني إيجابية
فكري في كلامي أرجوكي

تدرين ياورد تدرين يالغالية كلامك نفس الي تقوله لي امي
وانا نسخت كلامك وحطيت على سطح المكتب عشان اقراه كل يوم
سبحان الله طبعه مناسب وضعي وانا مو عاجبني
تدرين ليه ياورد لاني مشتاااااااقة لمنهو يحتوينيي لاني انحرمت من هذا بطفولتي عشان كذا ابغى زوجي يقيدني بغيرته وحبه
الظاهر ياورد اني لازم انسى سالفة حرماني واتنازل عن رغباتي عشان اقدر اعيش
الظاهر اني لازم افكر بمصلحتي ولا اركز الا فيها
مع العلم وربي البيت عمري ماكنت مصلحجية دوم اضيع على نفسي فرص واتبع ماترتاح له نفسي وليتني قدرت ارتاح
تسلمين حبيبتي على تجوابك معي

لا ما اسمها أفكر في مصلحتي ولا لها علاقة بالمصلحجية
اسمها تفكري بإيجابية وتتعايشي
وترا علاج الغيرة إلي كتبته لك علاج كل شي
لإنه يعلق العبد بربه
البقرة..قيام الليل.. الخ
وبالتالي يرتاح وتهدأ نفسه ويرتاح من حوله.. طمنيني عليك أول بأول ولعاد أشوف لك مشكلة!!!!!!!
مزحة!!!!!