قصتي طويلة لكن بختصرها لكم و ياريت الردود تكون في صميم الموضوع وللوصول لحل يفيدني ويفيد غيري .. واشكركم مقدما

أنا كنت مبتعث واخر سنة من دراستي نزلت اجازة للسعودية وبالصدفة تعرفت على فتاة(طبعا بموقف حصل في أحد الدورات و أحرجتها واعتذرت لها) وبدينا نتكلم في الدورة لمدة ٥ أيام وكان الوضع بالنسبالي عادي لا أكثر لأني أنا من الناس الي رافض الحب نهائي ولا العلاقات معنو البنات قدامي بالهبل .. المهم رجعت لأمريكا و اتواصلنا انا والبنت بالصدفة على linkdin وسرنا نتكلم دايما .. وبعد كم شهر تزاعلنا وفصلت البنت عليا وقالتلي انت ماتحس نهائيا ولازم نبطل نكلم بعض ( وانا كنت حاس انها حبتني بس انا داخلي كنت رافض ) المهم زعلت وبطلت اكلمها معني كنت احس بشي اتجاهها ومكابر على نفسي .. واتفاجأت انها ساكنة قريب مننا وامها صحبت الوالدة ، وكلمتها وبدأت علاقتنا سنة ونويت اخطبها

مرت الأيام وكانت فيها مشاكل بسبب اختلافات بيني وبينها عن اشياء بسيطة زي الغطاء و الإهتمامات الشخصية طريقة التفكير .. ماتخرجت لأن بقيلي مادة و مددت ترم ونزلت السعودية اجازة صيفية كاملة .. قابلتها كم مرة في أماكن عامة وكانت مغرقتني هدايا ، ووقفت معايا بمبلغ كبير تقريبا ٣٠ الف ورجعت لها على طول بعد ماانفكت أزمتي ( الغريب اني اكتشفت انها فلوس جامعهتا يعني لو مارديتها بالوقت ماكانت قدرت تسجل في الجامعة وكبرت أكثر بعيني)

المهم بدأت تتكلم متى بتجي تخطبني يلا يلا يلا .. وقولتها والله ابغاكي بس اصبري اخلص الترم الي باقي .. المهم بعدها بشهر وباقيلي كم يوم على السفرة دقيت عليها وسوت مشكلة من غير سبب وحاولت افهم بس ماقالت طبعا المضاربة قوية جدا وحاولت ( استغربت من طريقة كلامها معايا ) وحاولت اخذ الأسباب طلعتلي اسباب تافهه جدا وبعدها بإسبوع ارسلت قالت جاني عريس ، قلتلها الله يوفقك

سافرت .. و مرت ٥ شهور علي وأنا نفسيتي تعبانة مصدوم لا عد سرت اقدر أذاكر ولا أروح نادي ولا آكل ولا حتى أقدر أضحك وسار عندي أالم بالجزء اليمين من جسمي ورحت للدكتور قالي ضغط عاطفي و لازم تشوفلك حل ولا ممكن تدخل باإكتئاب و أمراض وتوصل لجلطة

المهم تخرجت و معدلي نزل شوي ، ورجعت وقلت لازم اشوف حل وكلمتها سأالتها عن مكان وعادي ارسلتلي العنوان و كلمتني طبيعي رجعت كلمتها وطارت فيني واتخاصمنا المهم بعد خصام شهر رجعنا هههههههههه

ورب الكعبة الألم الي في جسمي كله راح و رجعت طبيعي .. طبعا قالتلي العريس ماوافقت عليه لأنه أستبخل بالمهر وكذا .. وأنا ندمانة وتكفى اتحملني ولا عاد تسيبني ..

جلسنا شهر وفكت موضوع الزواج ، وقتها أنا أدور على وظيفة قالتلي ماعليك اي شي رسمي بعدين دور براحتك .. قلتلها بكلم امي واحاول معها وكل يوم تسأال واقولها اصبري ، الين مافي لحظة سوت نفس الحركة الأولى وسوت مشكلة وغلطت علي شخصيا ذي المرة وقالت مابي اكمل ، ابي افهمها ماتبي ترد على مكالماتي ولا رسايلي طبعا مابلكتني ..

نجي لوضعي الآن ( أنا صراحها حبيتها و نيتي اني اتزوجها بس أوضاعي ماتسمح وقتها اني اتقدملها وفعلا كلمت الوالدة قالت يوم تتوظف بخطبلك، حاليا إنسى بس ) تشجعت وقلت للوالدة تعرفين فلانة قالت ايه قلت شفت بنتها بالصدفة وعجبتني قالت معصي لاهي زينا ولا تنفعلك وقالت انا كنت بخطبها لك بس يوم شفتها ماعجبتني، طبعا امي بدأت تحوس ولاحظت عليها .. طبعا لو ظغطت عليها اكثر عارف انها بتوافق بس بتكون متضايقة وانا مابي زواج يكون في حساسيات من البداية.. بس قلبي يحبها ولاني قادر

تشجعت وبدأت أفكر بعقلي و ادوس على قلبي .. في حاجات كانت مرددتني في البنت انا قبيلي وهي لا ، هيا ماتغطي ( حاولت معاها زمان وقالت طيب بعدين جات وقالت مااقدر مو متعودة ) تفكيرها ماركات وسفريات و مدري ايه ( وانا ابي وحدة مسؤولة تربي عيالي ) قلت ممكن ذي الاشياء تتعدل ولمن تتزوج تحس فيها بس برضوا كنت خايف ، الشي الي عجزت اتقبله انه في يوم قالت ابي اسوي تاتو حسبته اللصق طلع حقيقي في حواجبها واتخاصمت معاها اقولها حرام وعناد بعد الزعلة الأولى راحت سوته وحطت خط نحيف مو باين في رجلها هنا انا قفلت ابواب كثير في وجهي خفت على حياتي و عيالي لمن نتزوج .. بس اوقات يجيني التفكير اقول بتندم كالعادة وترجع تشيلة بس ماهي راضيه تركب .. طبعا هي مزاجية شوي و و شخصيتها طفلة معنو عمرها ٢٥ بس كل تفكيرها مانبي نسافر مانبي بيت كبير اهم شي تشتري ماركات وبس وتسوي جميعات عشان كذا !!

طبعا ضغطت على نفسي و قلت ذي ماتنفعلي زوجة و الحين بتقدم لوحدة ثانية بعد ماتوظفت الحمدلله بس الادمية ذي ماتروح من بالي وبعض الاحيان اخاف اظلم الي بتقدملها ولا اني اندم اني مااخذت الي احبها ؟؟

إضافة بسيطة .. أنا عارف انه في سلبيات ممكن تصرفني عنها و هيا كانت تضايقني بعض الأحيان بإسلوبها وكلامها يعنني اني تستنقص بإفكاري ولا تصرفاتي بس ماأرتاح الا معاها ..

وفي شي كمان خوفني منها انه امها اطلقت وتزوجت واحد اصغر منها ب ١٠ سنين وهيا عايشة مع امها وذا الشي خفت يأثر على حياتي معاها طبعا البنت تطلع لأمها !!

اهلا وسهلا . هي واضح انها تكلمك عشان تتزوجك ما تبي علاقة كذا ولا تنتهي بالزواج.

شيء كويس انها تفكر وشيء كويس انك برضو تفكر تتزوجها وهذا احسن شي تسويه . يا تترك الكلام هذا او تتزوجها ما ينفع غير كذا .

الشيء الثاني: هي واضح تبيك تتزوجها بالتالي قد يكون هناك مجال عندها لأن تغير بعض من الاشيء الي مو مقتنعة فيها . مثل الحجاب والغطاء والستر.

انصحك انك تقولها بتقدم لك واخطبك لكن عندي شروط وشروطي كذا انك تتغطي وتلتزمي بالدين والحلال والحرام اوكي ؟ او كل واحد يشوف طريقه .
الشيء الثاني دايما الام والاخوات مايحبون يخطبون لولدهم بنت جت من طرف الولد نفسه وهم مايدرون عنها شي. لا اعلم لكن دايم عندهم شعور غيرة مع خوف من البنت ماتكون كويسة معهم وكذا.
لكن بالنهاية راح يرضخون للواقع ويخطبونها لك مع اصرارك . يعني بالنهاية امك ماراح توقف بوجهك.

الشيء الثاني كيف تفكر بغيرها الي تظلمها ولا تفكر بذي البنت الي عشمتها بالزواج ؟

لا تترك البنت كذا وتخطب غيرها . بعد ما عشمتها بالزواج وصارت تبيك وتفكر فيك. حرام عليك . بنات الناس مو لعبة .

أنا ماتركتها ورب الكعبة سويت كل شي بس كنت ابغاها تصبر علي الين مااتوظف بس هيا الله يهديها بون سبب نهت العلاقة بس تركت الباب مفتوح انه اقدر ارجع اخطبها .. والان جالس افكر ومتخوف اني حبي لها يأثر على باقي حياتي معاها

مافيه تصبر عليك الين تتوظف. هي سوت الشي الصحيح . انه تنهي العلاقة مع عدم رفضها لك في حال خطبتك لها . يعني هي ما تبي علاقة بدون زواج يا انك تتزوجها او تتركها .
العلاقة هذي ما تنفع ومحرمة ولا تجوز من ربي لأنها قد تجر الى اشياء محرمة ، وممكن انت تشوف منها شيء لا يعجبك وتقول هذي ماتنفع تصير زوجتي.

أنت الآن تفكر بعاطفتك، وكل الحلول التي تدعوك للابتعاد عنها لن تتقبلها بسهولة.
من الواضح الفرق بينكما في التدين والأخلاق، وهي منفتحة، لكنك الآن تتقبل ذلك بسبب العاطفة المنقوصة.
وحينما تتزوج منها وتشعر بامتلاكها، سيخف اللهف والرغبة، وستبدأ المشكلات، ويبدأ العقل بالتفكير.
نصيحتي لك أن تبتعد عنها، ستعاااااني ربما شهرا أو شهرين أو أكثر، لكنك ستحمد العاقبة، المهم أثناء الابتعاد، لا تتواصل معها بأي شكل من الأشكال، لأن ذلك سيعيدها إلى قلبك.
علاقة الحب الجياشة تطفئ عمل العقل.
أمك كانت حكيمة عندما رفضت وأبدت لك الأسباب.

__________________
كثير من المشاكل الأسرية والمعقدة لا تنتهي تماما، وإنما تبقى لها بقايا.
أي أنها قد يبقى منها 20% مثلا

مشاكلنا الأسرية المعقدة كثير منها لا ينتهي بصورة نهائية وإنما تبقى لها بذور يمكن أن تنمو في يوم ما، ما لم نتعاهدها بالحصاد.

مشاكلنا المعقدة لا يمكن حلها بضغطة زر، وإنما تحتاج إلى ممارسة ومجاهدة وضغط نفسي ومدة أطول مما نتوقع ليأخذ الحل مجراه.
المهم الصبر، فقد يكون بينك وبين الحل غشاء رقيق، فلا تتوقف.

حياك الله ابو أسامة .. كلامك صحيح.. وهذا الانفتاح هوا الي دايما متعبني معاها اضافة انها من النوع الي مايحب يتناقش ويدور حلول ، حاولت اننا نوصل لحل وسط في جميع الاختلافات و لكن من غير فايدة ، نهايتها تعند وانا افصل واقولها انسي ..

انا الي تعبني اني قاعد احاول افصل عاطفتي و ارميها بره الموضوع واقتنع يومين وارجع انتكس من جديد على ذا الحال ٤ شهور .. دايما اشوف داخلها شي طيب وبذرة طيبة بس هي دلخة تبي تقلد البنات وذا الي محيرني يعني تسوي تصرفات وتقول كلام بغباء لدرجة حتى لو جاء واحد منفتح بيرفض يتزوجها .. يعني تحتاج توجيه و مع الوقت بتصير تمام .. وانا شخصيتي مستحيل استمر معاها لو انا ماخذ انها هي كذا متحررة و لا تصرفاتها بالعاني بس شايف العكس .. عشان كذا طول الوقت افكر وانا احتاجكم توجهوني .. لأن ذا زواج مو لعب ومصير حياة

تقدم لخطبتها بشكل رسمي. وافرض شروطك . راح تحس بجديتك بالموضوع . اذا هي مستعدة تغير من تصرفاتها عشان زوجها راح تغيرها . اذا غير مستعدة بتقولك لا ولن توافق على شروطك.

وانصحك لا تتنازل عن شروطك.

انا صاحبي خطب زميلته بالعمل وقالها قبل لا يروح لابوها ترا شورطي تتنقبي ولا تفكي الحجاب والستر اهم شي ووافقت . ومن يوم خطبها رسمي وهي متنقبة وغيرت من لبسها كثير والكل مستغرب الين ملكو

تلعب بمشاعرها
تاخذ منها فلوس
تكلمها
توعدها بالخطبه
تعلقها
باختصار حالك حال اي شاب يلعب على بنت
كيف ماهي قد مسؤوليه وهي ضحت بمبلغ مصيري بالنسبه لها
مبلغ كبير وهي لسه طالبه جامعيه
تدرين حريم رواتبها ضاربه ماتعطي زوجها ريال واحد لو يموت
ولا توقف معاه
مشاكلهم كلها لان البنت المسيكنه ماتبي تغازل باختصار
تبي خطبه وزواج زي اي بنت محترمه ولا تبي تقضيها مكالمات
ولانها عارفه وكما ينصح لاي بنت اي شاب يماطل اتركيه
الي يقول استني اتخرج استني اقنع امي بالنهايه بيتزوج بمزاج امه وبيترك الي ضيعت وقت مشاعر عشانه
عيوبها وشخصيتها وامها ووضعها مو جديد
ولا لعبت عليك البنت
الحين بديت تدقق وتدرس الموضوع وتشوف
ليه من البدايه ماقلت يابنت الحلال انتي ماتصلحين لي
ليه علقتها بحجه دراسه وغيره
اسمح لي شده تعبيري ، لكن انت من النوعيه الي يخوفوا البنات منهم
الي يلعب عليهم وياخذ مشاعر وفلوس ويوعد بالزواج
وعقبها يماطل وينسحب
اسال الله يعوضها خير منك ويرزقها زوج اصلح منك