السلام عليكم جميعا ..


أنا صار لي كم شهر اراقبكم بصمت وهذه اول مره اكتب لكم بعد زواجي ..

حتى أني حاسه بغرابه لأني اكتب ولأول مره في عالم المتزوجين بعد اربع سنين دوام في عالم المقبلين على الزواج .. عقبال كل بنات المنتدى ..

المهم أنا حبيت اكتب لكم عشان اطمنكم على اخباري بعد الزواج واطلب منكم نصيحه ..



أنا تزوجت من خمسه شهور بعد اربع سنوات ملكه .. اللهم لك الحمد والشكر .. لكني للأسف ماجلسنا مع زوجي غير شهر واحد بس ..

زوجي مغترب للعمل في بلد عربي من كم سنه بينما أنا كنت مبتعثه في دوله اوروبيه عشان احضّر دراسات عليا ..

بعد حصولي على الماجستير العام الماضي سجلت في الدكتوراه مباشرة ورجعت لبلدي عشان ارتب لزواجي ..

طبعا أنا تعبت كثييييير واتبهدلت في التحضير لزواجي لأن الوقت كان ضيق وأهلي وأهل زوجي كانوا مصرين على حفل عرس كبييييير من فرحتهم فينا ..



المهم تزوجت وبعد شهر تركني زوجي ورجع لعمله في البلد الثاني .. ورجعت أنا لبلد دراستي عشان ارتب امور تسجيلي في الجامعه ..

افترقنا طبعا على أمل إننا نلتقي بعد شهر أو شهرين لزوم الوقت اللي يحتاجه زوجي عشان يتحصل لي على فيزه عشان ازوره ..

لكن المفاجأه السيئه جت بعد سفرنا ..

البلد اللي عايش فيه زوجي رفضوا يعطوني فيزه أقامه أو حتى زياره .. ونفس الشئ في بلد دراستي رافضين يعطوا لزوجي فيزه زياره ..

وصار لنا الحين اربع شهور وإحنا في دوامة المعاملات وكل واحد مننا في بلد ..



زوجي تعبان مرررررره من فراقنا وأنا أحاول طوال الوقت إني اشجعه واصبره وارفع من معنوياته لكني من داخلي تعبانه أكثر منه و نفسيتي يوم عن يوم تزداد سوء ..

أيامي صارت كلها شبه بعض ..حبس في البيت واكل وشرب ونوم كثييييييييييير وجلوس قدام التلفزيون أو النت وبس .. حتى صديقاتي صرت اتهرب من شوفتهم .. ودراستي مهملتها تماما ..

زوجي و أهلي مايدرون عن شئ لأني اكذب عليهم عشان يتطمنوا ..



أنا تعبانه مررررررره من الغربه والوحده ويائسه من إنه يكون في اجتماع قريب بيني وبين زوجي ..

ودي على الأقل اتدارك امور دراستي لأني ياربي ماكتبت حتى سطر واحد في الشهور الماضيه .. وعندي موعد مع مشرفتي الأسبوع الجاي وماني عارفه إيش بقولها ..

يعني أنا ماني فالحه لا في زواج ولا في دراسه ..

مدري إيش اسوي بنفسي ولا كيف اتدارك الوضع ? ساعدوني ..