كثير كتبت مشكلتي وكنت ماأبحث عن حل..أكتب للفضفضة
لأن مشكلتي غير واضحة وغير مفهوم مسبباتها....
وكل مرة أكتب أقول هذي آخر مرة...
تعبت أكتب...
وتعبت أسكت واكتم...


كانت مشكلتي إن زوجي راعي مشاكل..
يختلقها من تحت الأرض..
مايسولف معي سوالف زوج وزوجته..
لا..
ينتقد ويوجه...طول اليوم..

شي يفقع القلب...مليت مليت مليت

أنا قربت للأربعين...
وهو داخل ع الخمسين..

مو لسى متزوجين...مو لسى مراهقين...

عاملت بالطيب مانفع..
نفخت عليه وأرد عليه نفس أسلوبه مافاد..
صرت غالباً ماأرد وبرضو مستمر إشتعال

أرهقني نفسياً أتعبني جسدياً
حسيت إني متهالكه..

طنشت حاجتي العاطفية..
طنشت راحتي وسكينتي
طنشت حاجتي ورغباتي...

أحاول الملم الموضوع أحاول مع الأيام يمكن تتعدل..

مازال مستمر..شامخ للمشاكل...ماضعف ولا أستسلم..

أنا مايقهرني في مشاكلنا

إلا محاولة إسقاطه كل شي علي...

ماأتعبني ألا وساخة لسانه...


له فتره طويلة..من يوم كبرت مشاكلنا..

وهو صاير يقذفني بالكلام..

طبعاً هو ماعاد يمارس جنس معي..
نادراً يمارسه..ماعاد عنده قدره..
الله وأعلم بالأسباب...


فيجرحني لمن كل مازعل من كم سنة
ليش مسويه ليزر لجسمك....
لو تزينت ورجع بالليل..يسأل كنتي طالعه؟؟
كأني ماأتزين للبيت!

صار له فترة يحد من طلعتي للسوق...
ويمنعني أمشي في الممشى..يقول ماأبي أحد يذب كلمه عليك
أو يغازلك أو يضرب بوري...!! حسسني كأني أمشي بالبكيني!

وفوق هذا كل مازعل قال أنتي مع الناس كنك كلب
ومعي مستقويه..

مع إني مادري كيف حكم علي وهو ماجلس معي ومع الحريم اللي أقعد معهم!


( أنا شخصيتي قوية ولا أرضى أحد يخطي علي لاهو ولا أي احد بالدنيا أتمصلح معه على حساب كرامتي!)

كل هذا وسبق وقلته لكم..

اللي خلاني أكتب الموضوع

اليوم زعلان مني ..اصلاً مادري متى رضى!

كنت مسويه غداء...ومنظفه البيت..وكويت ملابس ورتبت كل شي


وهو شغال مكالمات....ومستحيل أكلمه وهو يكلم..
وبالعادة يناديني وين الغداء..
أستغليتها فرصة أروح لفراشي أرتاح..

طلع علي بالغرفة...مع إنه مايتحرك شبر..
بس أبليس طلعه فوق بيشوف وش أسوي..

ناداني..قلت نعم!
قال مافيه غدا..
قلت الا مسويه غدا...
قال ولا تعطوني كني سواق عندكم...وكلام سخيف مو متذكرته

نزل ونزلت وراه بحطه له...
دخل المطبخ وعرفت من أسلوبه أنه مو ناوي خير ومايبي أسوي شي له!

رجعت لغرفتي وأنا أتحيسب عليه
لأني الفترة الأخيرة صرت ماأتحمل أحس رأسي يعورني كأنه بداية ضغط!

شوي الا دق..بعد ماأكل..

الدجاج اللي في صينية الفرن كان حوله عظام الدجاج!
أنا تعطيني أكل كذا..وسخ!

قلت يا أبن الحلال أنا ماعطيتك شي
أنا لو كلمتني وطلبت غداك بيجيك غداء محترم..

أنا تبي هواش وتبي تزعل وأنت اللي غرفت لك..
أنا خذت جزء من الدجاج ونتفته بسوي صينية مكرونة بالدجاج..
وخليته بطرف الصينية...مو عقب أحد...

قام يلجلج بصوته كل هذا بالسبيكر بالجوال...

حكيت بالتفصيل عشان تفهمون نوعية مشاكلنا..
يعني لو كل شي بنوقف عنده مارضينا
وهذا حالنا لأنه من كل شي يزعل ويسوي للمشكلة حجم

وبدا موال أنتي وأنتي

أنا قلت حسبي الله ونعم الوكيل...

سكر

ورحت طيران للحمام عارفة بيطلع عندي...

الحاصل دخل وخبط علي الباب الا تطلعين..

طلعت...

كلامه..

أنتي مسحورة..ليش تعامليني كذا
تراه مابقي لك ألا طلقه وتطلعين من ذمتي

أنتي يارعية غزل ياشذوذ (( هذي سبب كتابتي ))

أنا زوجي يتهمني بالشذوذ!!

أم عياله وصلت فيه يتهمني بالشذوذ؟!

وعلى أي أساس؟؟؟
وش شاف مني!!

تدرون ليش؟؟

لأن جارتي...
حرمة عاقلة تخاف ربي أجودية محترمة..
سلوكها وأخلاقها شي فوق الوصف...

علاقتي فيها حيل قوية...وتحب تناديني كثير...
لأنها أرتاحت لي...وأرتحنا لبعض...

أنا علاقتي بجاراتي كويسة وبينا دورية بس هي فاضية
وتطفش وصار بينا توافق وقبول نفسي...

أنا بنت ناس وحمايل وأخاف ربي
وماقد شاف مني زوجي سلوك غلط

ليش يقول عني كذا

والله إني أنفجرت أصيح بسجادتي

وصلت فيه يتهمني بشذوذ!

مو بس قذفني

قذف جارتي الخلوقة..

الين بيوصل زوجي وأخلاقه الواطيه معي

مايكفي إني محرومة من مسمى زوج...
مايكفي إني محرومه من شي أسمه أمان وسكينة..

أحس بحاجتي لوجود رجل بحياتي وهو عايش وينام جنبي!

فهمته كثير...إن مشكلتي لسانه

وماأبطيت كاتبه له رساله

مشكلتنا كلها لسانك لو تكف عني بتلقاني سعادتك..
هجد يوم واحد..بس تأثير رسالتي يوم واحد...


لو يحس بالغلط

لو يحس بوقع كلامه

لو يندم

بكون بخير...

مو معقوله إني أتحمل ضغطه النفسي ويوصل تفكيره معي بالشكل هذا

والله ماتقبلها نفسي من واحد في الشارع

فكيف من زوجي

يعني لو إنه مقتنع بكلامه وإني راعية مغازل
وراعية شذوذ كان ماخلاني بذمته هذي فيها قبايل


قاعد يقول أنتي غامضة
مادري وش وراك..


قلت يا أبن الناس أنا لو أفرش لك الأرض ورد
بتعتبرها وساخة..

أنت عينك ماتشوف شي حلو مني

أنا أتجنبك..أصد ماأتكلم أتهرب من المشاكل
وتجي تلحقني بكل شي وتهاوشني من لاشي


قال لو غيري ماصبر عليك

قلت لو غيرك حطني فوق راسه

أنت شايفني صابره وقاعد تدوس علي
شايفني اتحمل سلوكك معي وأصبر على الأأذى فماعاد تخجل مني...


لو إني سيئة كان حسبت حسابي وأحترمتني...


لاتقولون بسبب ضعفه الجنسي

لاتقولون بيغطي على هالشي

هو تعدا الحدود والمنطق وتمادى ووصل لمرحلة سيئة جداً

ياناس والله تعبت وين المفر.....

الله يفرجها علي

أو يأخذ آمانتي وأرتاح منه...

هلا مليت تصدقي ما تروحي من بالي وافتكرك دايما

مليت شو بتنتظري عشان تقولي لأهلك ؟؟؟ مو كلمته فيها قبايل ؟؟؟ خلها توصل للي بتوصل له

بعدك صغيرة على الضغط

__________________

حرام عليك تحملي نفسك فوق طاقتها تذبحي نفسك علشان واحد مثله

حرام اولادك يعيشو بالجو هذا

وربي افكر فيهم حرام عليكم بعدكم عن بعض ارحم لهم من باول يوم اختبار صراخكم عندهم

__________________
سبحان الله وبحمده

الانفصال عن هالنوع من الرجال رحمة.لان العيشة معاهم تقصر العمر.ما ادري ليش يوم يوصلون لهالعمر يصيرون بهالشكل.
حلك الانفصال لانه مستحيل يتغير

اسال الله ان يفرج همك اتابعك من سنوات في منتدى ثاني وتجى على بالي
بما انك ماتقدري تتركي بيتك طنشي حبيبتي ولاتحطي ببالك انتي حساسه يجرحك الكلام وزوجك
ماراح يتغير الا ان يشاء الله

هو مقهور منج

لانج غامضة وعاقلة ويدري ان الناس تحبج وتحترمج

وقاعد يحط حرة قهره فيج

ولا تاخذين كل كلمة محمل الجد

الانسان المعصب يقول كلام ما يثمنه



الله يكون بعونج

__________________
لا اله الا انت سبحانك اني كنت من الظالمين

لاحول ولاقوة الا بالله

انتي احسبيها بالورقه والقلم
اذا انسان كويس و مايخون ولا يضرب و يصرف البيت ويربي عياله
الله يعينك تحملي لسانه وحالولي تتوددين له
هو غيران ومقهور لانك تروحين لجارتكم كثير وهذا لانه يحبك
و كمان يقول راعية مغازل لانه عارف مقصر معك بالعاطفه وجافيك

والله انا اشوف الصبر و تحاولين باكثر من طريقه
لان بينكم عيال و عشره عمر

كثير اشوف من اخواتي و خالاتي اذا ازواجهم وصلو الخمسين يصيرون كذا ومشاكل
يحس انها ماتهتم فيه
اعتقد انها ازمة منتصف العمر
لاتيأسين

والله يحنن قلبه عليك

الله يكون بعونك ، بداية التحول اعتقد من فقدان التواصل الزوجي .

بيتا تدرين مابين فترة وفترة ادخل اشوف ردودك علي وارجع استجمع قوتي من جديد؟؟


ردودكم ثمينة...
بس وضعي مو بيدي بروحي كان انحلت من زمان

اعرف ان سبب المشاكل زوجي
لو يسوي مثلي ويفكر ويبحث عن حل
كان ماعاد فيه مشكلة..



بخصوص اهلي
هذي مشكلة ثانية...
اختصرها لكم بكم كلمة..واعذروني على انتقاء العبارة..

اخواني اشباه رجال...
فعشان كذا زوجي مايحسب حسابي...


حياتي مع زوجي ارحم بكثير من معايشة اخواني
اصلاً هذا لو فتحوا بيتهم لي....الله لايحوجني لأحد منهم يارب

ولا يذلني بحياتي لاحد كثر ماانذليت لزوجي


اصلاً احساسي له مات من زمان
عافه الخاطر...
مهما كان له من صفات جميله
الا انه باختلاقه المشاكل بشكل يومي كرهني فيه
ولانه يحط فيني السبب كرهني فيه اكثر


معليش قول انا مااحبك
مو مرتاح

بس لاتقول عني سبب عشان تريح ضميرك..

انا لو رجع وتكلم بقول ارجع لسبب المشكلة..
ارجع لسبب وضعنا اللي احنا فيه..
تتهمني بمغازل وشذوذ لانك ماتقدر تنام معي
عارف ان لي رغبات تحاول تطمسها بمشاكلنا..

لكن والله اني انحرم جنسياً وتحرمني الراحة النفسية تراك غير محلل..

علاقتنا خربانة
وهو دايم زعلان

وش عاد لو جرحته شويتين؟!
وش عاد لو حطيت ملح بجرحه؟؟

قولي
ليش تقولينها لنا وكأنك بتطلعيها من خاطرك وبس
واجهيه وخل يفهم بأنك فاهمه الوضع
وابعدي عنه ..لا خدمة ولا خضوع .. خل يحط غداه ..شو فيها ؟

. واسعي لنفسك بعمل أو وسيلة رزق ..

اذا شايفتها صعبة حبيبتي تصبري الى أن يكبروا عيالك ويقدروا يستقلوا عن أبوهم .

ابسط يا عم ..رد ملون بعد
ايوا اضحكي حبيبتي ترى الدنيا ما تستاهل ..
لو ما عندك قدرة تستقلي عنه فطنشي كلامه واعتبريه كلام واحد مريض ولا تحطيه ببالك أبد الى أن يبدل الله الحال

__________________