بسم الله الرحمن الرحيم
كيفكم عساكم طيبين جميع ،، أنا سبق وكتبت مشكله لي من قبل
وكان مضمونها ب اختصار ان ا نا وزوجي دايم ب مشاكل مستمره
والسبب انه يشك فيني وكله على أمور تافهه بمعنى الكلمه وفي
كل مره ما يعطيني فرصه أدافع فيها عن نفسي لأنه خلاص الشك
اتمكن من قلبه رغم محاولاتي أثبت له أني عكس الصوره اللي
راسمها عني ف باله بسبب شكوكه وبعد انجابي لأول طفله لنا
هدت الأمور بينا وحسيت اتغير معاي شوي وصارت حياتنا طبيعيه
بس كان جدا فضولي ويفتش ف جوالي بين فتره وفتره واذا لاحظ
اي محادثه لي مع صديقاتي فيها استهبال مثلا على شباب وبنات
على طول يعصب ويكسر جوالي ويجرحني بالكلام وانا في كل
مره احاول اشرح له ان كثير متزوجات يمزحون مع بعض وينكتون
ولو كل رجال جلس يفتش ويدقق بكل شيء ف جوال زوجته
ماكان أحد متزوج للحين وحاولت اوضح انه مفروض ما يكون
يدقق بكل شيء لانه راح تصير بينا مشاكل مالها حد
بس هو ماكان يقتنع .. وجلست فتره اطنش جوالي
وما ادخل ف نقاشات كثيره مع صديقاتي ف الواتس اب
عشان اتجنب المشاكل مع زوجي بس سبحان الله
إما يمدي أكل فتره بسيطه فجأه تطلع لي مشكله ما ادري من وين ،،
وأقول ف نفسي ياربي ليه يصير معي كذا كلما حاولت اتجنب
الشي اللي هو سبب كل مشاكلي مع زوجي كلما تطلع لي
مشكله جديده وعلى نفس السبب ..
وبعد انجابي لطفلتي الثانيه عادت الأمور لمجاريها
وحسيت زوجي ما صار يهتم يفتش ف جوالي
وانا بعد صرت حريصه اتجنب هالشي ،، وحمدت
ربي وقلت يارب تزين الأمور بينا على طول
لكن للأسف صارت مشكله جديده كان سببها
بنتي لعبت ف جوالي وسوت حظر لزوجي وكم وحده
من صديقاتي وانا ماكنت أدري وقام يسألني ليه مايوصلني
شيء من اللي يرسله قلت مدري يمكن الشبكه ضعيفه
او شيء وجوالي كان مرمي ف الغرفه بعدما خربطت فيه بنتي
قال هاتي جوالك ورحت وانا على نيتي عطيته الجوال عادي
قام يفتش وشاف الحظر سألني ليه تسوي لي حظر
قلت والله مادري عنه قال الحركات هذي مو علي
وسمعني كلام ماله داعي ،، حاولت أبرر له بس للأسف
مارضي يسمع مني وكأنه أصلا ماصدق خبر وعلى طول
طردني من بيتي وطبعا مو أول يطردني فيها ،، كل مشكله
تصير كان يطردني واجلس عند اهلي بالشهرين والثلاثه
بعدها يجي يردني ،، بس بعد مشكله الحظر هذي
وبعدما طردني من بيتي تركني 3 شهور ما سأل عني
ولا عن بناته وبعدها ارسل لي وحاول بطريقه غير مباشره
يعتذر مني وصار يتصل بين فتره وفتره يسأل عني وعن البنات
وقال انه مشغول هالفتره وماقدر يجي للبيت عشان يجلس
مع أهلي ويتناقش معاهم عشان يرجعني ،،
وقلت له ما يخالف وحاولت أداريه بس عشان بناتي لانه
انسان عنيد ،، لكن بعد شهر فجأه انقلب 180 درجه
وصار يرسل لي خلاص اجلسي عند اهلك وانا برسل لك
مصروف انتي والبنات قلت مو ع اساس مشغول وبس تفضى
تجي تكلم أهلي ! لاحظت انه صار يتهرب وكل مره
يطلع لي بكلام وعذر جديد بعدها أنا مليت من الوضع
وقلت له أنا مو لعبه عندك تطردني متى ماتبي وتردني
متى ماتبي خلاص مليت شوف لك حل ،، قال لي
انتي وحده مالها أمان وخلاص ماعاد اقدر اثق فيك
انتي وحده لعابه بكرا ولا بعده بتسوين لي سمعه
وانا رجال اخاف على سمعتي وكرامتي ،،
وسمعني كلام زي السم بعدها أنا ماقدرت اتحمل
انهارت اعصابي جلست ابككي وقلت له خاف ربك
حرام عليك هذا قذف أنا ماسويت شيء يخليك
تعاملني كذا ،، أنا كنت ضحية الشككوك اللي ماليه قلبك
وحاولت معاه بس للأسف بدون فايده ،،
بعدها أدركت انه لعل الأمر فيه خيره من رب
العالمين وجلست أدعي لعل وعسى يهديه
ويظهر له صدق نيتي وبراءتي ،،
أنا الحين لي 6 شهور عند أهلي وكان فيه عدة محاولات
من ناس حاولوا يكلموه ويصلحوا بيننا بس كل مره يعاند
اكثر واكثر ،، وقبل أسبوعين زوجي كلم زوج أختي
وقال انه خلاص يبي يطلق وقال له بالحرف { يبغون طلاق
بطلق ما يبغون بكيفهك بس رجعه ماني مرجعها }
يعني اللي فهمته انه يبغاها تجي مننا ماتجي منه هو ،،
بس زوج أختي رفض يتدخل وقال إذا فيها صلح راح اتدخل بينكم
بس فيها مشاكل وطلاق مارح ادخل ف الموضوع ،،
رد عليه زوجي اوكيه خلاص أنا بروح لأبوها واكلمه ،،
وللحين ماصار شيء ،،

أعذروني عارفه طولت بالكلام بس احطكم ف الصوره
أنا يا جماعه ما ابغا اتطلق كله عشان بناتي والله حرام
لسه صغار ومصدومه من زوجي انه خلاص بايع العشره
وما يهمه شيء وحتى بناته ما كسروا خاطره
وكمان أهل زوجي تدخلوا بالموضوع بس مارضي يسمع
من أحد ،، يعني مايبي احد يفاتحه خير شر ولا يبي احد
يحسسه بالذنب او ب تأنيب الضمير وعلى طول يقول لهم
غيروا الموضوع خلاص مافيه فايده ،،

يعني زوجي سكرها في وجهي من جميع الجهات
حاولت كثير اجي له بأسلوب حلو واحنن قلبه
قلت يمكن يلين ويحس جربت كل الطرق
لدرجة حسيت أني ذليت نفسي كثير
وكان كله عشان بناتي ،، انصدمت من قوة
العناد والكبرياء وقساوة القلب اللي ف زوجي ،،
وكلما احد تدخل فالموضوع عشان الصلح يعاند
اكثر .. وحتى صديقاتي اللي مقربات مني
عرضوا علي ان ازواجهم يتدخلوا ويكلموا زوجي
وينصحوه بس أنا رفضت وقلت لهم خلاص ماعاد
ينفع لأنه رافض فكرة أن احد يكلمه او ينصحه ،،

أنا جماعة الخير في حاله يرثى لها ،، والله العظيم
اكتب لكم وانا في قمة الألم ودموعي زي النار على خدي ،،
مستغربه من هالقسوه اللي في قلب زوجي
حسني أني وحده رخيصه وراعية لف ودوران
وانا يشهد علي ربي من فوق سابع سماء وهو سبحانه
عالم بنيتي أني كنت اعامل زوجي بما يرضي الله
وكنت حريصه ارضيه واكون دايما في احسن صوره قدامه
من جميع النواحي بس للأسف هو ماحاول ينظر لي بعين
حلوه ،، اكتشفت انه طوال 5 سنوات زواج كان يدور علي الزله
وراء الزله عشان يتخلص مني وكان رافض فكرة الحمل بس
سبحان الله ربي رزقني ف 2 بنات لأن نيتي كانت الاستقرار
واعيش مثلي مثل اي وحده تحب بيتها وزوجها وعيالها ،،
بس هالثنتين البنات بالنسبه لزوجي كانت عقوبه له من ربي
لأنه ماكان يبغاني احمل منه خير شر وسبحان الله كنت اكتشف
فجأه أي حامل رغم انه حريص مايصير حمل ،، بس ربي خيب ظنه
،، أنا الحين مستسلمه للأمر الواقع وقلت يارب ان كل اللي قاعد
يصير لي يكون خيره من رب العالمين ،، لأنه نية زوجي ماكانت
طيبه طوال هالفتره ،،. وأهلي الله يجزاهم كل خير يارب
قالوا لي خلاص هذا مامنه رجاء وبناتك حنا نتكفل فيهم وبتربيتهم
مانبي منه شيء بس يفكنا من شره ،،
لأنه زوجي ارسل لي انه بيخلي الحضانه لي مدة معينه وبعدما يكبروا
البنات ياخذهم مني ويسفرهم عند اهله في بلدنا الأم بس أنا رفضت
ياخذهم مني ،،
وهو عنده ولد من زواج سابق ونفس الشي ابنه عايشه عن اهل زوجي
ومحروم من أمه مع انها بنفس المنطقه والحين زوجي يبي يسوي معي
نفس الشي ،،
هذا كككل شيء ،،
أنا كل يوم اتعذب من كثر التفكير بنفسي وفي بناتي ومستقبلهم
وساعات أحن لزوجي وللأيام الحلوه وتصيبني نوبات بكاء
طويله ما اقدر اوقف الا إذا نمت ،، اعصابي تعبانه ومازلت رغم
كل اللي صار أحن لزوجي وبيتي ومازلت متأمله من رب العالمين
انه لعل وعسى ينصلح حالي وتتيسر أموري من باب حسن الظن بالله
والثقه بما عنده وان سبحانه على كل شيء قدير ،،

اختكم المجروحه { براءة أنثى }
دعواتكم لي في جوف الليل ،،