السلام عليكم ..

هذا اول دخول لي واول مشاركه .. وطالبكم النصح

بصراحه انا متزوج من 5 سنوات وعندي ولد وبنت والحمدلله مرتاح بزواجي وماعندي مشاكل كبيره .. اكيد تعرفون انه ما يخلوا بيت من المشاكل ولكن الحمدلله مشاكلنا بسيطه جدا ..

ولدي عمره 4 سنوات وبنتي 9 اشهر

انا بصراحه احس برغبه بالزواج من الثانيه .. ها الشعور فيني الان من 6 اشهر .. وقد بدأت بالبحث فعليا ..

بصراحه ودي اسمع نصايحكم .. هل اتمم الموضوع واتوكل على الله .. هل بتصير لي مشاكل ياليت المتزوجين ثنتين وثلاث يخبرونا عن تجاربهم لو ممكن ..

انا ناوي اني ما اعلم زوجتي الاولى عشان ما افتح لي باب لمشاكل انا في غنى عنها .. وما ودي اجرح شعور زوجتي باني احط عليها وحده ثانيه لاني ما شفت منها تقصير وانا اعرف شعور الحرمه لما تاخذ عليها الثانيه .. بس انا راغب بالثانيه ورغبتي كبيره ..

فمادري شو رايكم .. او بشو تنصحوني ..

نصحح عبارة بس انك لما تتزوج ثانية فانت بتحطها على نفسك مو على زوجتك..ياليت نصحح هالافاظ اللي تستنقص من الزوجة

احطها على نفسي .. ولا تزعل ..

اذا انت مرتاح مع زوجتك وهي مو مقصرة بحقوقك ووجباتها تجاهك
ليش تتزوج وتفتح لحالك باب مشاكل
ممكن هي تتقبل لكن راح تتغير عليك لااراديا
وممكن زوجتك الثانية تطلع رفله ولا مهمله او كويسه توافيق من الله
بعدين زوجتك على كلامك انها جيدة
وعندك منها بنت وولد الله يخليهم لك
اشوف شخصيا مافي سبب للزواج من ثانية

ما دام هذا وضعك مع زوجتك
ف احمد الله
ولا انصحك بالزواج فيتغير حالك
لو كانت مريضه
او مهمله فيك وفي بيتك وابناءك
او سليطة لسان ولا تحترمك
لقلنا ماشي
لكن والحال ما ذكرته لا انصحك بذالك

وش السبب يااخوي ؟هل حب تغيير ام فلوس زائده ام ماذا؟؟
وبعدين منت معلم زوجتك حتتزوج بالسر يعني ..والحريم ذكيات راح تكتشف وتعرف لو من رائحة ملابسك انت عادي عندك يتششتو عيالك وتنهدم اسرتكم

__________________
مضى مامضى والله على المقبلات يعين ..! وعسى الله يزينها على القلب لاشانت~

اشكركم على الرد .. بس رغبه في نفسي اني اتزوج الثانيه .. صحيح اني مرتاح مع الاولى بس احس عندي رغبه في الثانيه .. مابغي اتعمق في التفاصيل اكثر للحياء ..

زوجتي الثانيه نعم مب مقصره معاي .. بس هذا من حقوق الشرعيه .. يعني ما راح اظلمها ان شاء الله ..

مبدئيا راح يكون بالسر .. اما اذا اكتشفت وما اضنها بتكتشف .. راح تعدي الامور علي خير باذن الله .. وانا راح اكون عادل فيما بينهم .. الله بيوفقني ان شاء الله ..

تبي نصيحة التي لن تندم طيلة حياتك إذا أتبعتها
لاتتزوج ثانية
خصوصاً دامك مرتاح بحياتك الزوجية ولا فيه مشاكل
لا تخلي لحظات عاطفية أو شهوتك هي التي تقودك
ركز على زوجتك الحالية وابنائك، لتخلق عائلة مستقرة مناسبة
وجود زوجة ثانية وأبناء آخرين سيجعل مهتمك التربوية، وسيطرتك على الأسرة ضعيفاً
حتى زواجك فيه نوع من عدم الجدية من خلال أنك لاتريد الأولى تعرف أمر زواجك
وستكون تحت وطأة الخوف والقلق
ألعب أرضي ياصديقي
ولو حاب نفصل بالموضوع أكثر وسلبياته، والدافع الذي لايستحق لأن تأخذ زوجة أخرى فيمكننا ذلك.

__________________
ياصبحِ لاتِقبل !!
عط الليل من وقتك..

اذا عندك رغبة ملحة لهذا شيء ,, اول شيء حلل نفسك وشوف هل تقدر توازن بين بيتين ولا لا ,, الموضوع مو بس تغيير وبس ,,يجي بعدها امور ثانية ,, كل بيت له مسؤلياته ماديا ومعنويا وتربويا وابويا ..الخ لان قرار بالزواج من اولى او ثانية حتى,, مو شيء بسهل مو مثل الوظيفة اذا ماعجبتك تسحب منها ,, لكن قرار زواج والطلاق مبني على اشياء ثانية صعب تراجع فيه ,,افرض زوجتك رفضت ترجع وطلبت الطلاق ,, وبالنسبة انك تخبي زواجك من ثانية فيه صراحة نوع من الانانية وراح تظلم اثنتين فيه وبمافيهم اولادك ,,

جزاك الله خير

والله كفيت ووفيت