السلام عليكم ورحمة الله وبركاته ..
من فترة وانا مسجلة بالمنتدى واطلعت على اخوتكم وتعاونكم وحبيت افتح قلبي لكم عشان تسدلون لي النصايح ..
انا ابوي توفى الله يرحمه وعمري شهرين وامي جاها نصيبها بعد وفاة الوالد وراحت لقطر مع زوجها وبقى انا واخوي عند جدتي ( ام ابوي ) وربتنا وبعد ماصار عمري 19 سنة جت لأخوي بعثة لأستراليا وقال لي اخوي مستحيل اخليك لازم تروحين معي انا الوحيد الي لك بعد الله سبحانه وعماني قوموا الدنيا وقعدوها عشان ماأروح مع أخوي وأخوي عمره 24 وزادت همومي وتقفلت الدنيا بوجهي هذا اخوي الغالي بس طلبه كان من المستحيلات بالنسبه لعماني وشكيت لعمتي همومي وعمتي خطبتني لولدها وانا مباشرة وافقت عشان أنهي المشاكل إلي بين أخوي وعماني ودخل علي أخوي وحلفني وسألني بالله إذا كنت عن قناعة كاملة ولا عشان أنهي المشاكل وأخوي يعرفه زين ويمدح أخلاقه وتمت الخطبة بحمدلله !!
وبعدين سافر أخوي لقطر يجيب أمي لان استعجلنا بزواجي عشان سفرة أخوي وجاء ولد عمتي وقال لجدتي أبيك تسألين هناااوي أذا تبي بيت بروحها ولا مع أهلي ؟؟
قاالت جدتي مااتطلعون من هالبيت هي بنتي وانت ولدي تطلعون بهالغلا ليش ؟؟
والبيت فااضي وتركي بيساافر ماعاد يبقى لي أحد وولدي يمكن يطلع ( تقصد عمي المتزوج ) ؟؟
وقاال ولد عمتي يايمه شاوريها ومايصير الا الي يرضيك وجت جدتي وقاالت لي وانا بكل براءة وسهولة قلت عاادي نقعد وهذي غلطة عمري والي مااحسبت لها حسااب بس انا وافقت ابي اتخلص من المشاكل والدوخة !!
وبعد مااتزوجت وساافرت شهر العسل رجعت مباشرة لقطر وودعت أخوي وكااااان زوجي جنة الدنيا كاان رجولة بمعنى الكلمة ويحترمني ويمووت فيني !!
وبعد مارجعت للرياض وآآآآهـ ليتني مت قبل ماارجع !!
صاار الي مااتوقعته ولا حسبت له حساب جدتي ايه ياناس جدتي صارت تعاملني مثل قبل مااتزوج ومو بس انا حتى زوجي واشد من اول !!
اذا دخلنا وطلعنا تسأل ووين وليش ولا تتأخرون ومن متى طاالعين وليش ماتاكلون من البيت واذا جااء احد عندها تقول هالاثنين ماايقعدون بالبيت ياطالعين او بغرفتهم اسمع اصواتهم !!
وصابتنااا عين صرت انا بغرفة وهو بغرفة وكل واحد يصيح مثل الطفل وفينا مثل ضيقة الصدر واذا صرنا بعيدين عن بعض اشتقنا لبعض وكله من كلام جدتي للناس ..
ومع ذلك صار هو ماايجي للبيت كثير وجدتي مازالت مايطلع من الغرفة واذا طلع طلعوا مع بعض !!
وقريت البقرة وشربنا مويه مقري عليها واي احد يجي لجدتي أخذ غساله ونتغسل منه والحمدلله والشكر رااحت العين اللهم لك الحمد والشكر ..
ومرة جدتي شافت زوجي وهو يشيلني من الصالة وطلعنا فوق وبعدين جتها ضيفة وقالت لي الضيفه انك سامنه قالت جدتي ماتنلام ماتطلع فوق الا على ظهر ولدي وماتاكل الا من المطاعم واذا جوا تجيب معها حلويات ومقاضي قطعت ظهر ولدي بخرابيطها وانا انصدمت من كلامها ومااقدرت اقول شيء وانا من طبعي اني مااتكلم وهااديه بس اعبر بالدموع ..
وقلت لزوجي الي صار وقال ليش انتي تهربين ولا ودك بعين ثاانية ان كان حاولتي تمنعين جدتي وهاوشني وطلع ..
وقلت لزوجي لازم نطلع لبيت وقال لي نطلع نطلع من عيوني ومن بكرة يوم جينا بنطلع ندور بيت سألتنا جدتي وين وقلنا لها بندور لنا على شقة وياااااااليت مااقلنا صيحت وقالت انا امكم وانا وانا وحلفت مانطلع وانخفض سكرها ودروا عماني كلهم وجوا عند جدتي وقالوا مو اللحين تطلعون اجلسوا عندها..
قال زوجي هذي امكم ووانتم احق انكم تجلسون عندها وهذي حياتي وانا اعرف اقررها وقلت لزوجي عشاني خلنا نجلس الين تهدى الامور وقال بعد ماتهدى نقولهم بنطلع وتصير مشكلة وقلت لا وعد مايصير شيء قال بنطلع يعني بنطلع وقلت خلاص عشاني قال قسم بالله مانطلع الا اذا تقاسموا خوالي البيت وآآآآآآآآهـ ياليتي ماقلته وهذا انا جالسة هالمشكلة لها ثلاث شهور وبعد فترة قلت له خلنا نطلع عصب علي وجرحني بالكلام ..
بس تعبت من جدتي وكلامها للناس عنا واذا طلعنا ننام بالفندق تتصل علينا وينكم وليش تأخرتوا وتتصل على عماني وعماتي كلهم وتقولهم بنتي وولدي لهم فترة وهم ينامون برااا البيت عشان اصواتهم تااصل الجيران !!
تعبت منها والله تعبت وخااصة انها جدتي مو خالتي ام زوجي يعني هي حمولتي واهلي كيف اتصرف معها ياناس ..
وتخيلوا اذا زوجة عمي ماحصلت السواق تقولها جدتي خلي يوسف يوصلك وتتصل جدتي على يوسف (زوجي) وتحلف عليه يجي ويجي وبعدين تهاوشنا وصار اذا قالت له جدتي يوصل زوجة عمي يتصل علي يقولي وانا ارفض وبعدين يتصل على جدتي ويتعذر ومرة اتصل علي وانا كنت عند جدتي جاالسة ويوم اتصل على جدتي هاوشته تقول مهوب رجال الي يمشي بهوى زوجته !!
وعمي موجود بالرياض بس طالع حضرته لمشوار وانا قبل مااتزوج اذا بغيت شيء منه يقول أسألي المداام !!
والى الان انا وزجي نسرق انفسنا اذا بغينا نطلع او نكذب عليها واقولها بروح لعمتي وحنا نروح نتمشى وتخيلوا مرة اتصلت على عمتي وسألتها من عندك وصارت عمتي اذا اتصلت عليها جدتي تقول ايه عندي بس هنااوي ويوسف طاالع ..
وهذي حاالتي معها وقولوا لي ويش الحل معها اطلع من البيت زوجي رافض وزوجي داايما يستهزئ فيني لاني اتهرب من المشاكل على حساب حيااتي ..
وجدتي حااطة زوجة عمي على راسها ..
ياربي ثبت قلبي ..
نصايحكم ودعواتكم تراني شبه انجنيت ..