زوجي تزوج وانتهى الموضوع ولا راد لأمر الله،
أنجب ، أمر الله نفذ،وقُضي الأمر،،
رضيت أم أبيت ماراح يتغير شي،

موضوع زواجه مابي أتكلم فيه،لأن زعلي ماراح يقدم ولا راح يأخر شي،
وإن كبّرت الموضوع وصعّدته،راح أخسر صحتي ونفسيتي، والأيام ماراح ترجع لورا، عشان زوجي مايتزوج ولا ينجب...

المشكلة هي:
تذكرون ذاك اليوم خرج زوجي للدوام الصبح وما رجع،وبالليل أرسل رسالة يعتذر إنه مو جاي ؟

زوجي خرج من الدوام وراح لها،وهي طلبت العدل في كل شيء،زوجي رفض،وهي أصرت، والله مدري وش صار بينهم، المهم يقول زوجي اتصل بأخوها وراح لهم واتناقشوا وهي أصرت على موقفها العدل أو تترك له البيت وتتنازل عن الولد..

يقول زوجي حاولوا فيها هي وأخوها للساعة 2 تخلي الولد معها لأنه يرضع منها،هي رفضت رفض قاطع قالت له ماتبيني مابيك ولا أبي شي من ريحتك..

وتركت البيت وراحت مع أخوها..
زوجي ماعرف وين يودي الولد راح لأخته الساعة 3 بالليل..فهّمها السالفةوأعطاها الولد ترعاه..وجا البيت عندي،العيال منهم الصاحي ومنهم النايم..وجلس يتكلم معهم وأنا بغرفتي سامعتهم..

أخته ضعيفة حرمة مو مرة كبيرة لكنها مريضة سكر وضغط،، الولد مو راضي يسكت معها يبغى أمه،يبي يرضع، حاولت فيه بكل الطرق مافيه فايدة وصياحه مالي بيتها،،تعبت معه..

راح أحمد بعد الفجر لعمته وجاب الرضيع لزوجته، الولد يبي يرضع والظاهر أمه ماعودته على الرضاعة، عجزوا حريم عيالي فيه، يعطونه تصبيرة سيريلاك وعصير وموية لكن هو يبي صدر أمه، زوجي مازال مستمر معها تاخذ الولد وسمعته يترجاها وأرسل لها فيديو لولدها وهو مقطع نفسه من البكاء يبيها تحن عليه مافي فايدة...

أحمد بعدما جاب الولد جاني وقالي أمي الله يرضى عليك لاتزعلين مني،إنت أمي وهذا أبوي و....... صار أخونا وأنا والله مقدر أتخلى عن أبوي في هالظرف..

دخلت غرفتي وقفلت الباب على نفسي بكيت بكيت بكيت بكيت بكيت بأعلى صوتي،
بكيت بحرقة من كل قلبي،،ودموعي ماراح تحل شي..

المهم
بتقولون خطأ زوجي وهو المسؤول وهو اللي يتحمل،
هذا مو وقت حساب، أبي حل للمشكلة، الولد صار بالبيت،والين متى حريم العيال بيتحملونه؟!

والولد للأمانة يكسر الخاطر يحزززززن جيعان.. وأمه رافضته..

للعلم زوجي مازال يتواصل معها ومع أخوها تاخذ الولد ترضعه وتفطمه بالتدريج إذا هي مقررة ماتبي تستمر بنفس الوضع،،لكنها هي رافضة وأخوها يقول عجزت فيها..أبي شوركم.. وفضلاً لا تخرجوا خارج نطاق الإستشارة..

ولو انه الحل مزعج لكن مامنه مفر العدل الولد حرام يتشرشح وانتي مش مسؤله عنه

أمه المسؤله وزوجك مسؤول عنه دامه قدم ع هذي الزواجه يتحمل ماجاه ...

حسيت انها قلبت الموضوع لصالحها لكن في النهايه مصلحة الولد أهم من كل شي انتي اخرجي منها وزوجك يتصرف لكن لو طالب بالعدل برأيي ترضي

أبنك لما كلمك واضح انه زوجك يبغى يعدل بينكم لكن مايبغاها تجي منه يبغاها من أبنائك ..

هي أزمه ياأم دان وتعدي مانتي اول ولا آخر وحده تزوج زوجها عليها

لا حول ولا قوة إلا بالله

__________________
أشهد أن لا إله إلا الله و أشهد أن محمدا رسول الله صلى الله عليه و سلم

كل الحفلة اللي سوتها عشان تحطه قدام الامر الواقع ويتورط به ويرضى باللي تبيه

مراعاتكم له لصالحك.. اذا الولد انلقى له من يشيله

هي اللي بتتورط مو انتو..

هي جابته عشان يتدبس فيها لان قبل كذا وضعها كان مهزوز كزوجة ثانية

بدت تطلع الوجه الثاني المعتاد

اللي جاي مو اصعب من اللي راح

تصبري يا ام دان

عموما هي عارفة مويتك وشافتك ماقبيتي وعرفت انك ماراح تضغطين على زوجك يسوي اي اجراء

ماعندها شي تخسره عموما.. هي ماكانت عايشة حياة زوجية سوية مع كل هذا

وكذلك تعاطي زوجك مع الموقف ماكان ضدها..

__________________

اختلافي عنك لا يعني اختلافي معك

سلمت يداك
...........

الصراحة انا في موضوعك السابق كنت متعاطف مع الزوجة الثانية وقلت يمكن ظروفها العائلية والنفسية اضطرتها لهذا العمل ، لكن بعد ما عرفت انها تخلت عن ابنها الرضيع في اهم مراحل احتياجه لامه ، لا والله ما اتعاطف معاها وما في سبب في الدنيا يخلي الام تتخلى عن ابنها الرضيع حتى لو كل الدنيا تتخلى عنها .

اما عن الطفل ، جربوا حليب صناعي اكثر من نوع لغاية ما يتقبل الطفل الحليب المناسب له او ابحثوا عن مرضعة واكيد الطفل بيستجيب في النهاية ويسد جوعه

هل هذا إحتجاجٌ منها و ما يسمى بليِّ اليد حتى تحقق مقصدها ؟
أم ان غرضها الطلاق ؟

__________________
أشهد أن لا إله إلا الله و أشهد أن محمدا رسول الله صلى الله عليه و سلم

احس مصلحة الرضيع فوق كل اعتبار..احتسبي الاجر العظيم..بصبرك..ماله بد الا يعدل علشان الطفل..واذا كبر لكل حادث حديث..لعل الله يحدث بعد ذلك امرا.. لاتوجد حلول وسط😐 الله يفرجها عليكم

اختي حملت و هي ترضع طبيعي فقط
فكان لازم تفطم بنتها و تعطيها صناعي
السالقة يبيلها طوله بال شوي يعني اتوقع الولد خلال يومين او ثلاث بيتقبل الحليب الصناعي

أنا مادخلني بزوجي ونواياه،،ومسألة العدل مو متوقفة علي،،..
هو لو يبي يرجعها ويعدل مو محتاج شوري ولا إذني.