بصراحه ما أحب زوجتي من 5 سنوات !!! ومستحيل احبها (مستجدات بالرد 116)
السلام عليكم ورحمة الله وبركاته
المنتدى هذا ليس بالجديد عليه ... ولا لأني سأكتب في هذا المنتدى لكي أجد حلا من الاعضاء أو إنسان فاعل خير لي مع أني ليس عندي أي شك في أهل الخير في المنتدى وخارج المنتدى ... بل والمفاجأه الكبرى لكم يا أخواني بأني كنت ممن يحاول أن يحل بعض المشاكل الزوجيه التي اقرأها في هذا المنتدى
وكنت فعلا .. أتفهم لكل ضيف المنتدى مشكلة مع زوجته أو العكس !! بحكم أني إنسان متزوج ومجرب للحياة الزوجية ..
سأكتب لكم موضوع كما قلت لكم ليس لكي أجد حلا ..... أو أجد إنسان يحاول بأن يقنعني ... أو يحاول
بأن يجد فيني ثغره للإقناع ... فلا تتعبوا أنفسكم ...!!!
غريب أنا صح
طيب ليه تكتب موضوع مدام ما تبي أحد يقنعك
أعرف أنها ردود أفعال في البداية !!!!!
ولكن ....
أنا جالس أكتب موضوعي والله للفضفضة فقط لا غير ...
أو بالأصح فراغ أعيشيه بحكم بأني معلم ونحن في إجازة نصف الترم ...
طبعا على طاري إني معلم ترا ما يمنع إني أقولكم إني عندي دورات في الذات ـــ وطريقة التواصل مع الطرف الآخر + دورة في تكوين الأسرة الزوجية + ودورات في الهندسة النفسية .........الخ إلى غير ذلك من الدورات إللي فعلا عطتني معلومات غزيرة جدا ...
على فكرة ...... يا فتيات ونساء ...... !!! أنا على طول في البيت تكون قناة بداية شغالة 24 ساعه وأنتم تعرفون وش فيها من فوائد ونصائح تفيد الزوجين .... بصراحه أنا كنت واحد من اللي يرشد زملائي المعلمين في المدرسة للقناة هذة %% بصراحه إبداع هذه القناة ....
وغيرها وغيرها من القنوات الاسلامية ... وأي شي عن الزوجين أحب أسمع بكثره ...
وصار عندي تشبع منها إلى درجه إن الكلام إللي اسمعه مو غريب عليه ..
ولا أحب المسلسلات ولا أحب الأغاني ولله الحمد ...
أحب يكون بيتي نضيف من القنوات الفاضحه والماجنه >>>>>> أقصد mbc وغيرها !!
إنسان محافظ في بيتي ...
أف !!! أنا نسيت أقولكم إني متزوج من 5 سنوات وعندي طفلتين أمورات الكبيره عمرها 4ونصف والصغيره عمرها سنه ونصف ... ( كان المفروض اقول المعلومات هذه في البدايه لكن !!! مو مشكله ))
نكمل حديثنا ...
بحكم إني معلم تصدقون إن بنتي إللي عمرها 4 سنوات ونصف تقرأ الحروف كلها والعجيب إني علمتها كيف تكتب الحروف وبدأت الان تقرأ الكثير من الكلمات ... الحمد لله علمتها القراءه والكتابة وما أنسى دور أمها طبعا !!! إللي راح يجي الكلام عنها بعد شوي !!
عندي طموحات أواصل دراسات عليا لكن وزارة التربية والتعليم ما عندك أحد مع إني تعبت تعب شديد حتى وفرت القبول لدراسة الماجستير ولكن ما كتب الله لي نصيب !!
واحد قالي تحمد ربك إنك تستلم راتب
طبعا أظطريت إني أسمع كلامه مع إني كنت أعارض مثل هذه الجمل الهابطه !! لكن يالله بعض الحكي حلو ولو كان ما له فائده !!
المهم المهم المهم
بصراحه وأقولكم على بلااااااااااااااطه !! على قولتهم !!
أنا ما أحب زوجتي ابد أبد أبد أبد أبد أبد أبد ...
طبعا من اللي دلني عليها .... أكيد الوالده الله يطول في عمرها ... طبعا نفذت كلام الوالده وتقدمت لخطبتها !! وشفتها نظره شرعيه !! بصراحه بصراحه وتبون الصراحه !!!
أنا قلت ما دام إن الوالده راضيه عنها فراح اتزوجها .. وربي بإذن الله راح يعيني عليها
>>>> تزوجنا طبعا !!
ومن هنا بدأت القصه !!
قبل ما ابدأ في القصة ... راح أذكر لكم صفات زوجتي وبين قوسين ( محاسنها ) !!
متدينه + خلوقه + على قولة الناس ( سنعه في البيت ) أقصد الطبخ والترتيب ... الخ
راكده + فطينه + محبوبه جدا عند الوالده والوالد .. مؤدبة عند صديقاتها ولها إحترام عجيب
بعيده عن الغيبه والنميمه ونقل الكلام حق الحريم مو عندها أبد !!!
ملاحضه : الوالده ااااااااالله يطول في عمرها : تحلف لي بالله إن شكلها نادر
إذا جينا عند الجمال وبكل أمانه مملوحه ما عليها .... يجي منها !!!
( السلبيات )
قليلة الكلام مدري هو خجل أو طبع فيها .. لكن الظاهر إنه طبع وأنا متأكد من الشي ذا والاكيد إنه وراثه فيهم السكوت ذا !!
["]
تقاسيم وجهها يوحي إلي إنها كبيره في السن إلى درجة الجدية الزائده في الحياة ... بإختصار ( ليست عصريه !! ) وليست من النوع إللي كنت أتمناه من الفتيات العصريات ... !!
وهذا هو إللي كرهني عيشتي وخلى الظغط عندي يبدأ في الهبوط !!
المهم
هي من عائلة محافظه . الأدب يغلب عليهم إلى درجه الكبت ..
طبعا أنا لاحظت فيها ملاحضه إن ( طاعة الزوج عندها لها قدسية إلى درجة إن تقدم الخدمه على حساب صحتها ونفسيتها >>>>> ونست نفسها !! وأنا ما أحب كذا !!
طبعا أدري راح تقولون تحمد ربك !!! ترا غيرك يتمنى يلقى وحده مثلها ....... و .... و ..... الخ
وراح تقولون لا تركز على سلبياتها بل ركز على الايجابيات !!
وراح تقولون طيب ليش ما تجلس معاها وتقولها وتتحاور معها !!!
ابشركم جلست معاها أكثر من مره .
بل وأقسم لكم إني لو وجدت شخصا عنده نفس مشكلتي بالظبط ربما استطيع الحوار معه وأحاول بأني اقنعه !!
الغريب يا من يقرأ موضوعي بأنه ولا يوم حسيت إني حبيت بنت الناس ذي ..
وبصراحه كنت أحاول إني أمشي أموري وأوهم نفسي بأن الحياة الزوجية ليس شرط بأن يتوفر فيها الحب
والله قال ( وجعل بينكم موده ورحمه )
الموده هي الحب ___ والرحمه هي العطف عل الزوجين لبعضهم .
فإذا لم يتوفر الحب فهناك الرحمه كما قال الله ... وليس كل البيوت تبنا على الحب كما قال عمر بن الخطاب للرجل الذي طلق زوجته فقال لماذا طلقتها قال : إني لا أحبها >>>> الظاهر إنه كان مثلي
حاولت إن حياتي تمشي على السفينه المتأرجحه عل البحر .. ولكن يا أخواني السفينه تكاد تغرق !!
وأقسم لكم بالله إني أعيش أسوأ أيام حياتي .. لا اشعر فيها بأي حب .. حياتي صارت ممله بشكل رهيب ومرعب .. وأحاول بقدر الامكان بأن طفلتي لا تشعر بأي نوع من الحرمان العاطفي .. مع العلم لدي بأنه متى فقد الزوجين العاطفه سيؤثر بالتاكيد على حياة الاطفال ... وأحاول بقدر الامكان بأن أتماشا مع هذا الوضع ولكن أكاد أن ينفجر صدري من البيت ... فأتعمد الخروج من المنزل لمدة ساعه أو ساعتين وأعود ليس لأجل الزوجه ولكن لأجل الاطفال وتعلقهم فيني ولا استطيع الغياب عنهم لكي لا أحرمهم حنان الأبوه ...
طبعا بقولكم على شي مهم ::
كثير من الزملاء وبعض الاقارب بدأ يلاحظ على تعابير وجهي الهم !! وعدم الارتياح النفسي !!
بعضهم يلمح لي وبعضهم يسألني ((( شفيك دايم طفشان )) !!! لكن مشكلتي إني ما أقدر أقول لأحد إني مو مرتاح وما أقدر افضفض لأحد .. أحسها صعبه شوي !!!
تصدقون يا ناس ؟ والله والله والله إني ما أفرح بالإجازه ... وأحس إنها الاجازه ذي ما لها اي داعي
بل افضل العمل في المدرسه أفضل من البيت >>>>>> لأني مو مرتاح معاها !!!
بصراحه إذا كانت عند أهلها ارتاح شوي !!! مدري ليه !!!
أحيانا أقول في نفسي .. أنا مو قد المسؤوليه ولو كنت كذلك كان تحملتها !! لكن ما أظن لأني لو كنت أحبها كان تحملتها بقوووه !!
حاولت أحبها وثم حاولت ولكن 5 سنوات ما قدرت أحبها أبد .. وبصراحه في الآونه الآخيره وخاصه مع بداية السنه الدراسية هذه بدأ الفراغ العاطفي يلملم أوراقه إستعدادا للسفر ... مع العلم بأنه لا يوجد أي عاطفة حب في قلبي لها .. بدأ كل شي واضح الآن !!! أنا ما عاد اقدر أجامل أكثر من كذا !!! وزوجتي تعلم هذا جيدا .. ولكن المسكينه وش في يدها !!!! ما في يدها شي !!
الوالده + الاخوات + الاخوان كلهم بدأوا يرون فيني عدم الارتياح التام .. ولكن أحاول أن أكتم وأظهر لهم بأن أموري تمام في البيت وأن حياتي تمشي لا عوج فيها !!! ولكن حبل الكذب قصير !!!
أعيش الان في ضيقه داخل صدري بشكل رهيب وإضافة على ذلك بقولكم شي !!
مستحيل مستحيل إني أستمتع بإجتماع الاقارب أو الزملاء أو رحلة بريه أو سهره شبابيه مع الزملاء في العمل حتى ايام الأعياد الفطر وعيد الحج ولا كأنها عدت عليه هذه الايام ....
ودااااااااااااااااااااااااااااايم أفكر كثير كثير في حياتي النكديه هذه !!!! إللي كرهتني عيشتي
وما عاد أطيق شي ..
حتى إني ما أحب أطلعها من البيت ولا أحب أنزلها السوق لأنه ما أشوف اي فائده ((( فلانه هي فلانه في البر أو الحديقة أو السوق وش يعني !!! )) ...
وإذا صار إني أطلعها من البيت ... فقط عشانها لا أكثر ولا اقل ...
صرت إنسان عصبي جدا جدا جدا إلى درجة إني إذا عصبت على بنتي أمد يدي عليها بدون شعور !!
والله يا أخوان يا أخوات إذا صار وضربت البنت إني أطلع من البيت عشان أمسح دموعي من الندم !!
وأبدأ أبكي إذا صرت أستعرض فلم حياتي الزوجيه إللي قسم بالله ما عاد تصلح بريال واحد ...
إذا صار وسمعت إنه في أحد راح يتزوج !!!! يجيني حرقه داخل صدري واقول يا ليت الزمن يرجع للوراء عشان ما أكون سويت
غلطة العمر إللي أنا فيها !!!!
أنام وأنا طفشان ... وأصحى من النوم وأنا طفشان ... وأرجع للبيت من الدوام وأنا ما ودي أدخل البيت
حياتي ممله بشكل فضيع !! حياتي صارت مهزله !!
أختم لكم واقول
يا حبي لك يا زمن العزوبيه وبس !!! كانت أيام حلوه ورائعه وضحك ووناسه أما الان فاندثر كل شي !!
أدعوا لي بس
16-02-2010, 03:25 AM
ضوابط المشاركة
العرض المتطور