اخواني القائمين على هذا المنتدى وجميع الاعضاء...

بناء على ثقتي بحكمتكم واعجابي بأرائكم وقدرتكم على مساعدة بعضكم البعض في حل المشاكل

يسرني ان تشاركوني في مشكلتي



ومشكلتي طبعاً مع زوجي


المشكله هي...ان زوجي يداوم طول الاسبوع فتره صباحيه وفتره مسائيه ماعدا يوم واحد عنده فتره صباحيه فقط(الخميس) ..هذا اليوم هو الي يفضى فيه بالليل يعني اذا بغينا نطلع نتعشى ونسهر او نتسوق مالنا الا هذا اليوم ..لانه طول الاسبوع مجهد و خروجه من العمل بالفتره المسائيه متأخر مانجلس ولاننبسط مع بعض يجي من العمل دااايخ ..معذور..!
لكن بنفس يوم الخميس يجتمعون اصحابه بالليل باستراحه..كان في بداية زواجنا يطنشني ويروح عندهم رغم انه مايفضى الابذاك اليوم
دار بيننا نقاش وجدال حتى توصلنا لحل ,,الحل ,,بالدور..خميس نطلع انا وياه ونقضي حاجاتنا... وخميس يطلع للاستراحه..

المهم الخميس الي فات كان خميس العائله.. (دار بيني وبينه نقاش في موضوع ماا) ذكرته بشي سبق قاله يخص هالموضوع الي نتناقش فيه....بطريقه عفويه..

هو مااعجبه اني اتذكرت هذا الشي برغم اني ماتوقعت انه بيضايقه كنت جدا عفويه...هو انفعل وقالي كذابه انتي كذابه ووتتقولين علي؟؟ رغم انه يدري اني اتمتع بذاكره قويه ماشاء الله ماانسى شي.. حلفت له وحاولت اذكره بادله ..بدى يعلي صوته بالبيت انتي كذابه انتي كذابه وعقابا لك بتنطقين اليوم في البيت ولافيه طلعه وانا بروح لاصحابي حاولت افهمه اتناقش مع لكن يعلي صوته انتي كذابه ..رغم انه يدري اني مو كذابه..

المشكله من فتره صاير اي حدث صغير بيننا وهو الغلطان يقوم يحرمني من ذا الخميس

المشكله مو اني مقهوره من حرمانه لي من الطلعه او التنزه..

المشكله بطريقة تعامل زوجي معي يعاملني كطفله ذليله لاحول لها ولاقووه يهينني وكأن مالي اهل؟؟
يتهمني بالكذب عشان يتخلص او يتهرب؟؟

احس اني مهانه ذليله بين يدي رجل مايعرف الا نفسه اناني...ماكنت اتوقع ان اقع بمثل هذه الزيجه
ماتمنيت فارس احلامي بهذه الصفات؟؟ وهذه ليست المشكله الوحيده في حياتي معه .. هذي امتداد لمشاكل بيني وبينه بسبب اسلوبه وتعامله السئ معي..





والان ساطرح عليكم حلولي الي اتخذتها لحل المشاكل عشان ماتجيبونها لي..



لاتقولون حطي شموع وليله رومنسيه وتكلمي معه وصارحيه..لاني صارحته ويام وعدني بالاقلاع عن الشي الي يضاايقني لكن انعكس علي النتيجه صار لما نقع في مشكله.. الامور الي طلبت منه الاقلاع عنه يجيبها اضعاف مضااعفه عشان يقهرني..يستغلها كنقاط ضعف؟؟

لاتقولون لي لما يهدى تعالي كلميه وفضفضي له وفهميه.لانه لازم يضع علي الخطأ وياما حطيت الخطا مني عشان ترجع امورنا وتصفا حياتنا برغم انه هو الغلطان وللاسف اي مشكله يذكرني بشي انا اتهمت نفسي فيه اغلاطه الي الي ورطت نفسي فيها عشان تسلك امورنا...برغم انه يدري انه هو الغلطان بس يستغل طيبتي وتنازلي عنه..

لاتقولون ابكي وتأسفي منه واشبعي غروره لانه اذا سويت كذا يزيد بأهانتي وتجريحي ..ويحاول اذلالي اكثر واكثــــــــــر؟؟

لاتقولون سوي نفسك زعلانه وتكشخي وتلبسي وتهندمي وتعطري وقدمي له الذ المأكولات عشان ينجذب لك ويجي خاضع..لاني سويت كذا وسفهني..!!

لاتقولون تهاوشي معه وتعالوا الاصوات لانه برضوا جربته وانا الي تعبت................؟

بس الحل هذه المره جديد وابي رأيكم فيه..

الحل اني من يوم الخميس ماتكلمت معه ولا كلمه واذا تكلم معي ارد عليه بصعوبه مااجلس معه ولا يشوفني طبخ مااطبخ...لاتقولون وش هالزوجه الي ماتعرف واجباتها..لاني والله ماقصرت معه وضحيت كثير اولها ضحيت بكرامتي عشانه...طفح الكيـــــــــــــــــــــــــل.. ولاجاء يكلمني او يعتذر رغم انه يدري بغلطه لكن كبريائه مايسمح له؟؟

بس صعبت علي حالته صار مشتت افكاره مشرده احس انه بركان بينفجر .. مايعرف يجلس بالبيت ضايع..مشتت؟
عن جد حالته يرثى لها ... مايجي الا وقت النوم ويكون مو على بعضه حتى نومه كله احـــــــــلام بصوت مسموع؟؟

لاتقولون لي ابدا انتي فانا استنفذت كرامتي ولازم اقوم نفسي وجربت معه كل شي بعد دعاء الله سبحانه وتعالى باصلاح امورنا

انا الامر عندي عادي ومات الي في قلبي ولاعاد اهتم لان قلبي انجرح وتألم مايهم زعل مو زعل شهر شهرين..

بس هو صعب علي حالته مشتت؟؟ ماارضى لزوجي

وش رايكم مثلا لو تساعدوني في خلق موقف معين يساعدنا على هدم ذالك الحاجز..او طريقه فكره اخليه يبدا هو بالنقاش...؟

__________________

والله محد يلومك ولا احد راح يقولك حطي شموع ولا صيري رومانسيه .. انتو مشكلتكم الاساسية ضيق الوقت

مافيه مجال انه يترك العمل المسائي ؟ او على الاقل اجازه يومين بالاسبوع ؟

على وضعكم الحالي مافيه اي حل الرجال طاقه جبده من الشغل ويبي يفرح مع اصحابه وانتي طاقه جبدك من انتظاره وتبينه يكون معاك

والله مادري شقولك مالك الا هاليومين بالشهر لايوجد حل ثاني

الحين كملي زعلك شوي لكن لاتزودينها (لاتتركين الطبخ) لكن حاولي تصيرين رسميه جدا معاه وبالاسبوع القادم اذا صار دورك للطلعه قوليله لا مالي خلق او تعبانه
خليه هو يفتقد خروجك معاه ويبادر من نفسه

ولا تظغطين عليه كثير لان دوامه الصراحه مافي بشر يستحمل يداوم 7 ايام بالاسبوع صبح وليل زين ماينفجر مسكين

أسلوبك جيد ..
استمري عليه ..

__________________
أحب جبالك يالجنوب وأحبك لأنك أنتي الجنوب

شوفي حبيبتي تووته

انت ماعليك الا تشلينه وتوديه بيت أهله
وقولي لامه هذا ولدك لكِ تاعبني وقاهرني
ولا فيه فائدة ...
<<<<<أمزح بس اريد أغير جوك شوي

أسمعي غاليتي تووته

في عبارة أبغاك تفهمينها تمام وهي >>(( أن تركيزنا على امر ما أو مشكلة تكبر أكثر من المتوقع))

مو يعني كلامي الاهمال وعدم المبالاه لالالا
بالعكس انا أبغاك توازني الأمور
بمعنى تعطي مشكلتك حجمها الطبيعي...

أختي أولا مشكلتك تعتبر من الدرجات الوسط والشبه منتشرة وموجوده بكثر
بالحياة الزوجية ...
وكوني على ثقة أن هذا أمر وارد ومحتمل وحله سهل جدا جدا
فقط يحتاج منك الى تفكير تمعن أكثر ...


انتي خذي المشكلة من بدايتها لا من نتائجها <<<هذا مهم
حددي نوع المشكلة هو ..( في التعامل ....في الواجبات.....في الثقة والأحترام.....الخ)

بعدها شوفي سلبيات الامر وأيجابياته

ولاتنظري للموضوع من زاويتك فقط
قد تكون احد المشاكل من ناحيتك وطريقتك واسلوبك
ممكن تكوني انت احد عوامل هذي المشكلة

وحتى تكوني واضحة وبالطريق الصواب

أكتشفي المنافذ المخفية في حقيقة مشكلتك

بعطيك طريقة وجربيها وشوفي
بس بصدق تعاملي معها....

أتركي الموضوع لفترة محدد ولنقول أسبوع أو اسبوعين
ولكن أتركية بحق وحقيقه ....
شرط أن تعود حياتك عادية وتعاملك معه طبيعي...
ولا كان شي صار فقط للمدة التى حددتها لنفسك


وأذا صعب عليك اتفقي معه أن اسبوع ممنوع الكلام في هذا الامر
وبعد الاسبوع مسموح..... وحطوا تاريخ من كذا...... الى كذا.....

وشوفي نتائجها ....

وعندي لك اقتراح اخر ...

اعرضي عليه فكرة مباره بينك وبينه
( هو طبعا بيوافق لانه في وضع متشدد ويبحث عن مشكلة وثغرات لك)

ضعوا جدول لكِ وله...
وكل واحد يغلط على الثاني تحسب نقطة لصالح المغلط عليه
وان كل عمل مرضي من قبل الاخر تحسب نقطة له

مثال:
جدول لقسمين قسم باسمك وقسم با أسمه ونسخه معك وواحده معه
أذا رفع صوته عليك سجلي في خانه اسمك x واذا عمل شي حلو لكِ سجلي
في خانه أسمه x.....
وهو بنفس الطريقه
وحددوا مدة شهر وشوفوا من المنتصر والحاصل على نقاط اكثر


أخيتي ما ذكرته لك حلول بسيطه قد لاتعني الكثير لك
ولكن ركزت اكثر اهتمامي في حالتك النفسية وروحك الطيبة
أحببت ان انعشها وأجدد نشاطها وحيوتها
وحبها لحياتها الزوجية وسيدها .....

كوني على ثقة ان كل الامور بيدك وحدك
وتحسنها ونجاحها يعني انتصارك انتي فقط

لك كل الود أختي الغاليه

أختك فجر

المشكلة في الأسلوب ..

فلو أن كل امرأة أتخذت الأسلوب المناسب مع زوجها , لأخذت ما تريد ..

أأما أساليب الإستفزاز , فالرجل لا يغفر لها , وسيؤلب نفسه عليكِ ..

ومثل دوام زوجك مرهق جدا .. ولا تستطيعين اداراك الإرهاق الذي ينتابه ..

فهو لا يجدك تشعرين به ..وخلقت فجوة بينك وبينه .. فمع أي خصام ..

سينفجر عليك , ليخرج ما في أعماقه ..

فلو عشتِ معاناته , وشعرتِ به , ووجد ذلك منك , لنسي الإرهاق والتعب ..

حينما يراك , ولتلذذ بالتعب لأجلك , لأن روحت تمزجت مع روحه ..

__________________

قال ابن الجوزي لأهل زمانه :
أيها الناس ..
لقد دارت رحى الحرب ، و نادى منادي الجهاد ، و تفتحت أبواب السماء ، فإن لم تكونوا من فرسان الحرب ،
فافسحوا الطريق للنساء، يدرنَ رحاها ، و اذهبوا و خذوا المجامر والمكاحل يا نساء بعمائم و لحى .

زرقة البحر

شكرا لك وادعي لي ان الله يثبتني على موقفي لاني اعرف نفسي حنونه..ادعي بالخيره ..جزاك الله كل خير

__________________

__________________

الاخت توته 000

الله يعينك ويهدي لك زوجك إن شاء الله
ولكن احب اذكرك بحديث الرسول صلى الله عليه وسلم حيث قال :


{ أيما امرأة باتت وزوجها عليها غضبان باتت تلعنها الملائكة حتى تصبح" }

بالكلمه الطيبه والمعامله الحسنه سيهدي الله زوجك

ادعو الله في هذا الثلث الاخير من الليل ان يهدي لك زوجك وان يسعدك

في حياتك وان يبعد عنك كل مايغضبه عز وجل

وتقبلي مروري 000




الأخ الكريم . أرجو التكرم بترك رسالة باسمي في عالم الرسائل الخاصة . شكرا

اخوي شكرا لمرورك ومشاركة الوجدانيه لمشكلتي

اما بالنسبه للحديث الرسول صاى الله عليه وسلم ....ماذا افعل معه هل اهدر كرامتي..تعبت مليت..؟؟
لا اظن انه ينام غضب علي..مجــــــــــــرد كبرياء..يريدني ان اخضع له برغم انه يهينني ويذلتي ويجرحنــــــــــــــي؟؟

اين حقوق الانســـــــــــــــــــــــــــــــــــــــــــــ ــــــــان

__________________